Mutindu nge me zaba yo, kuta luvunu ke tendula kutuba diambu mosi yina nge me zaba nde yo kele ve kieleka. Keti nge me taka dezia luvunu?— a Ata mpi bambuta yankaka yina ke zolaka Nzambi me taka luvunu. Mbala ya nkaka, nge zaba muntu mosi yina Biblia ke tubilaka ya kutaka luvunu. Zina na yandi Piere, yandi vandaka mosi ya bantumwa 12 ya Yezu. Bika beto tadila disolo yina ke monisa kikuma yina yandi taka luvunu.

Ntangu bo kangaka Yezu, bo nataka yandi na nzo ya nganga-nzambi ya nene. Yo vandaka na kati ya mpimpa. Piere kotaka na kibansala ya nzo ya nganga-nzambi kukonda nde bantu kuzaba yandi. Na nsemo ya tiya, nkento mosi yina vandaka kusala na nzo ya nganga-nzambi ya nene, yina kotisaka Piere zabaka yandi. Yandi tubaka nde: “Nge mpi nge vandaka ti Yezu.” Ti boma yonso, Piere vutulaka nde yandi zabaka Yezu ve.

Biblia ke tuba nde na nima “nsadi ya nkaka ya nkento monaka yandi.” Yandi tubaka nde: “Muntu yai vandaka ti Yezu.” Sambu na mbala ya zole, Piere buyaka nde ya zabaka Yezu ve. Na nima ya ntangu fioti, bantu ya nkaka kwendaka na Piere mpi tubaka nde: “Ya kieleka nge mpi kele mosi na kati na bo.”

Piere waka boma. Yo yina na mbala ya tatu, yandi taka luvunu mpi tubaka nde: “Mono me zaba ve muntu yina!” Mpi nsusu ya bakala kokulaka. Yezu talaka Piere mpi yandi yibukaka mambu yina Yezu zabisaka yandi ntangu fioti nde: “Na ntwala nde nsusu kukokula, nge ta buya mono mbala tatu.” Piere waka mawa mpi dilaka ngolo. Yandi waka mpasi mpenza!

Keti diambu ya mutindu yina lenda kumina nge mpi?— Nge lenda vanda na nzo-nkanda, mpi bana ya nzo-nkanda me yantika kutuba mambu ya mbi sambu na Bambangi ya Yehowa. Mosi me tuba nde: “Bambangi ke pesaka ve lusaku na drapo.” Mpi ya nkaka me yika nde: “Bo ke nwanaka ve sambu na insi na bo.” Mwana ya nzo-nkanda ya nkaka me tuba diaka nde: “Bo kele mpenza ve Bakristu sambu bo ke sungiminaka ve nkisi ya lubutuku.” Na  nima, mosi na bo me tala nge mpi me yula nge nde: “Keti nge kele ve Mbangi ya Yehowa?” Inki nge ta tuba?—

Nge fwete yilama sambu na kupesa mvutu ya mbote na ntwala nde diambu ya mutindu yina kukumina nge. Kansi Piere yilamaka ve. Ntangu mbangika kwisilaka yandi, yandi taka luvunu! Ata mpidina, yandi waka mawa ya ngolo sambu na diambu yina yandi salaka, mpi Nzambi lolulaka yandi.

Ananiasi, Mukristu ya nkaka ya mvu-nkama ya ntete taka mpi luvunu. Kansi Nzambi lolulaka yandi ve, ata nkutu nkento na yandi, Safira. Yandi wakana ti bakala na yandi sambu na kuta luvunu. Bika beto tadila kikuma yina Nzambi buyaka kulolula Ananiasi ti Safira.

Ntangu Yezu yambulaka balongoki na yandi mpi vutukaka na zulu, bilumbu kumi na nima bantu kiteso ya 3 000 bakaka mbotika na Yeruzalemi. Mingi na bo katukaka na babwala ya ntama mpi kwisaka kusungimina nkinsi ya Pantekoti, mpi na nima ya kukuma Bakristu, bo bikalaka mwa ntangu na Yeruzalemi sambu na kulonguka mambu mingi sambu na lukwikilu na bo ya mpa. Yo yina, balongoki ya nkaka ya Yezu basisaka mbongo na bo mosi sambu na kusadisa bampangi yina.

Ananiasi ti nkento na yandi tekaka ndambu ya ntoto na bo sambu na kubaka mbongo ya kusadisa Bakristu ya mpa yina bakaka mbotika. Ntangu Ananiasi natilaka bantumwa mbongo, yandi tubaka nde yo vandaka mbongo yonso yina bo tekaka. Kansi, yo vandaka kieleka ve! Yandi bumbaka mbongo ya nkaka sambu na yandi mosi! Nzambi monisaka Piere diambu yango, mpi Piere zabisaka Ananiasi nde: “Nge me kusa bantu ve, kansi nge me kusa Nzambi.” Kaka na ntangu yina, Ananiasi bwaka na ntoto mpi fwaka! Kiteso ya bangunga tatu na nima, nkento na yandi kwisaka. Sambu yandi zabaka ve mambu yina kuminaka bakala na yandi, yandi mpi taka luvunu; yandi bwaka na ntoto mpi fwaka.

Yai dilongi mosi ya mfunu. Kutuba kieleka kele mfunu mingi mpenza! Ya kieleka, beto yonso fwete baka dilongi na diambu yina. Ata mpidina, beto yonso ke salaka bifu, mingi-mingi ntangu beto kele baleke. Keti nge ke sepelaka ve mutindu Yehowa ke zolaka nge mpi ta lolula nge mutindu yandi lolulaka Piere?— Kansi yibuka nde, beto fwete tubaka kieleka. Mpi kana beto me sala kifu ya nene mu mbandu kuta luvunu, beto fwete lomba Nzambi ndolula. Yo kele mambu yina Piere salaka, mpi Nzambi lolulaka yandi. Kana beto ke sala bikesa sambu na kuta ve luvunu, Nzambi ta lolula beto mpi!