Lufutumuku ya Yezu ke tendula luzingu!
LUFUTUMUKU ya Yezu kele ve diambu mosi buna yina salamaka na ntangu ya ntama, mpi ya kele ti ntendula ya fioti sambu na beto bubu yai. Ntumwa Polo tubilaka ntendula na yo ntangu yandi sonikaka nde: “Nzambi tedimisaka Kristu na bafwa, mbuma ya ntete ya bantu yina me lalaka na lufwa. Sambu lufwa kwisaka na nzila ya muntu mosi, lufutumuku ya bafwa mpi ke kwisa na nzila ya muntu mosi. Sambu kaka mutindu na Adami bantu yonso ke fwaka, mutindu mosi mpi na Kristu bantu yonso ta baka luzingu.”—1 Bakorinto 15:20-22.
Yezu futumukaka na Nisani 16, ya mvu 33 T.B., kilumbu yina Bayuda vandaka kupesa Yehowa Nzambi bimenga na bo ya bambuma ya ntete ya bilanga na kisika ya santu ya tempelo na Yeruzalemi. Ntangu Polo bingaka Yezu mbuma ya ntete, yandi zolaka kutuba nde yo zolaka kuvanda mpi ti bantu ya nkaka yina zolaka kufutumuka.
Bangogo yina Polo tubaka na nima ke tendula mambote yina lufutumuku ta nata. Yandi ke tuba nde: “Sambu lufwa kwisaka na nzila ya muntu mosi, lufutumuku ya bafwa mpi ke kwisa na nzila ya muntu mosi.” Sambu beto me bakaka disumu mpi kukonda kukuka na Adami, beto yonso ke fwaka. Kansi, ntangu Yezu pesaka luzingu na yandi ya kimuntu ya kukuka bonso nkudulu, yandi kangudilaka bantu nzila ya kufutumuka mpi katulaka bo na kimpika ya malanda ya disumu mpi ya lufwa. Polo tubilaka mbote-mbote na bunkufi diambu yina ntangu yandi sonikaka na Baroma 6:23 nde: “Lufutu yina disumu ke futaka kele lufwa, kansi dikabu yina Nzambi ke pesaka kele luzingu ya mvula na mvula na nzila ya Kristu Yezu, Mfumu na beto.”
Yezu yandi mosi pesaka ntendula ya lufwa mpi ya lufutumuku na yandi sambu na beto. Yandi tubaka sambu na yandi mosi nde: “Bo fwete tedimisa Mwana ya muntu, sambu konso muntu yina ke kwikila na yandi kubaka luzingu ya mvula na mvula. Sambu Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, na mpila nde konso muntu yina ke monisa lukwikilu na yandi kufwa ve kansi yandi baka luzingu ya mvula na mvula.”—Yoane 3:14-16.
Yindula—luzingu mosi ya kukonda nsuka, bampasi mpi mawa! (Kusonga 21:3, 4) Yai kivuvu mosi ya mbote mpenza! Muntu ya mayele mosi tubilaka mambu yina na mutindu yai: “Maziamu ke yibusaka muntu bunkufi ya luzingu, kansi lufutumuku ke ndimisaka muntu nsuka ya lufwa.” Ya kieleka, lufutumuku ya Yezu ke tendula luzingu!
