KWENDA PENE-PENE NA NZAMBI
“Beno Landa na Kulomba, Ebuna Bo Ta Pesa Beno”
“Mfumu, longa beto mutindu ya kusamba.” (Luka 11:1) Longoki mosi ya Yezu lombaka yandi diambu yina. Na mvutu yina yandi pesaka yandi, Yezu tubilaka bingana zole yina ke longa beto mutindu ya kusamba na mpila nde Nzambi kuwa bisambu na beto. Ziku nge ke kudiyulaka kana Nzambi ke waka mpenza bisambu na nge, mvutu yina Yezu pesaka ta sepedisa nge.—Tanga Luka 11:5-13.
Kingana ya ntete ke benda dikebi na muntu yina ke samba. (Luka 11:5-8) Na disolo yango, muntu mosi me yamba nzenza na mpimpa mpi yandi kele ve ti madia sambu na kupesa nzenza yina. Sambu na muntu yina me yamba nzenza, yo kele diambu yina ke lomba kusala mambu nswalu. Ata yo kele na kati ya mpimpa, muntu yango me kwenda na nzo ya nduku na yandi sambu na kuzwa mwa mampa. Na luyantiku, nduku na yandi ke zola ve kutelama sambu yandi ti dibuta na yandi lalaka banda ntama. Kansi sambu muntu yango ke landa kukwamina mpi ke bondila nduku na yandi, nsuka-nsuka nduku na yandi me telama mpi me pesa yandi mwa madia. *
Kingana yai ke pesa beto nki dilongi na yina me tala kusamba? Yezu ke zabisa beto nde, beto fwete kwamina disongidila beto fwete landa na kulomba, kusosa, mpi kubula na kielo. (Luka 11:9, 10) Sambu na nki? Keti Yezu ke zola kutuba nde ntangu beto ke sambaka yo ke vandaka bonso nde beto me telama na kielo ya Nzambi mosi yina ke buya kuwidikila bisambu na beto? Ve. Dilongi ya Yezu kele nde, na kuswaswana ti nduku yina vandaka kubuya kutelama mpi kukangula kielo, Nzambi ke vandaka na mpusa ya ngolo ya kupesa mvutu na bisambu ya bantu yina ke sambaka yandi ti lukwikilu. Beto ke monisaka lukwikilu na kikalulu na beto ya kukwamina. Ntangu beto ke landaka kulomba yandi, beto ke monisaka nde beto kele mpenza na mfunu ya mambu yina beto ke lomba mpi beto ke kwikila mpenza nde Nzambi lenda pesa beto yo kana yo kele luzolo na yandi.—Marko 11:24; 1 Yoane 5:14.
Kingana ya zole ke benda dikebi na ‘Muntu yina ke waka bisambu.’ (Nkunga 65:3) Yezu yulaka nde: “Inki tata na kati na beno, kana mwana na yandi kulomba mbisi ya masa, ta pesa yandi nioka na kisika ya mbisi ya masa? To kana yandi lomba mpi diaki, ta pesa yandi nkutu?” Mvutu na yandi kele pwelele—ata kibuti mosi ve ya zola ke pesaka bana na yandi bima ya mbi. Na nima, Yezu pesaka ntendula ya kingana yina: Kana bibuti ya kukonda kukuka ke pesaka “makabu ya mbote” na bana na bo, “beno fwete zaba kibeni nde Tata yina kele na zulu ta pesa mpeve santu”—dikabu ya kuluta mbote—na bana na yandi yina kele na ntoto kana bo me lomba yandi yo! *—Luka 11:11-13; Matayo 7:11.
Nzambi ke vandaka na mpusa ya ngolo na kupesa mvutu na bisambu ya bantu yina ke sambaka yandi ti lukwikilu
Kingana yai ke pesa beto nki dilongi na yina me tala Yehowa, ‘Muntu yina ke waka bisambu’? Yezu ke lomba beto na kumona Yehowa bonso Tata mosi ya zola yina kele na mpusa ya ngolo ya kulungisa bampusa ya bana na yandi. Yo yina, bansadi ya Yehowa fwete wa boma ve na kukwenda pene-pene na yandi sambu na kulomba yandi mambu yina kele na ntima na bo. Mpi sambu bo me zaba nde yandi ke zolaka mambu ya kuluta mbote sambu na bo, bo lenda ndima kukonda kusukinina mvutu na yandi na kisambu na bo, ata mvutu yango kele ve yina bo vandaka kuvingila. *
Lutangu ya Biblia Sambu na Aprili
^ par. 2 Kingana ya Yezu ke monisa kikalulu mosi yina bantu vandaka ti yo na bilumbu yina. Sambu na Bayuda, kuyamba nzenza vandaka mukumba mosi ya santu. Dibuta vandaka kusala mampa mingi mpenza na kilumbu, yo yina bantu vandaka ti kikalulu ya kulomba kana bima na bo me mana. Diaka, kana bo kele bansukami, dibuta ya mvimba vandaka kulala na ntoto na suku mosi.
^ par. 4 Mbala mingi Yezu vandaka kusadila bangogo “beno fwete zaba kibeni nde,”—yandi vandaka kusadila yo sambu na kufwanisa muntu ya kuluta fioti ti muntu ya kuluta nene. Muntu mosi ya mayele tendulaka nde: “Dibanza kele nde, ‘Kana A kele kieleka, ebuna beno fwete zaba kibeni nde B mpi fwete vanda kieleka.’”
^ par. 5 Sambu na kuzaba mambu ya nkaka na mutindu ya kusamba na mpila nde Nzambi kuwidikila beto, tala kapu 17 ya mukanda Inki Biblia Kelongaka Mpenza? yina Bambangi ya Yehowa me basisaka.
