Luzingu ya Kele ti Lukanu—Yezu Songaka Nzila
“Tambula kaka mutindu Yezu tambulaka.”—1 Yoane 2:6, NET Bible.
MUTINDU beto tubilaka yo na disolo yina me luta, Yezu vandaka na luzingu ya kele ti lukanu. Kana beto ke zola kuvanda ti luzingu yina kele ti lukanu, yo ta vanda mbote na kulanda mbandu na yandi mpi bandongisila na yandi.
Nkutu, Yehowa ke longisila beto na kusala mpidina, mutindu verse yina kele na zulu ke monisa yo. Kutambula mutindu Yezu tambulaka, ke tendula kufulula mbandu mpi malongi na yandi na mambu yonso ya luzingu na beto. Kusala mpidina ta sadisa beto na kundimama na Nzambi mpi kuvanda ti luzingu ya kele ti lukanu.
Malongi ya Yezu yika mpi minsiku yina lenda sadisa beto na kutambula mutindu yandi tambulaka. Beto lenda mona minsiku yina na Disolo na yandi na Zulu ya Ngumba ya me zabanaka mingi. Bika beto tadila mwa minsiku yango mpi mutindu beto lenda sadila yo na luzingu na beto.
MUNSIKU: “Kiese na bantu yina kele na nzala ya mambu ya kimpeve.”—Matayo 5:3.
MUTINDU MUNSIKU YAI KE SADISAKA NA KUVANDA TI LUZINGU YA KELE TI LUKANU: Yezu monisaka nde bantu ke butukaka ti nzala ya mambu ya kimpeve.
Beto ke vandaka na mpusa ya ngolo ya kuzaba bamvutu na bangiufula bonso yai: Sambu na nki beto kele na ntoto? Sambu na nki bampasi kele mingi na nsi-ntoto yai? Keti Nzambi ke kudibanzaka sambu na beto? Keti kele ti luzingu na nima ya lufwa? Beto fwete zaba bamvutu na bangiufula yina sambu na kuvanda ti luzingu ya kele ti lukanu. Yezu zabaka nde kele kaka ti nto mosi ya me fwana yina lenda sadisa beto na kuzaba bamvutu na bangiufula yina—Ndinga ya Nzambi. Na kisambu mosi yina yandi salaka na Tata na yandi, Yezu tubaka nde: “Ndinga na nge kele kieleka.” (Yoane 17:17) Keti Ndinga ya Nzambi lenda sadisa beto mpenza na kulungisa nzala na beto ya kimpeve?
MBANDU YA LUZINGU:
Esa yina vandaka ntwadisi ya kimvuka mosi yina zabanaka mingi ya bantu yina vandaka kubula miziki ya rock, mpi yo bikalaka fioti nde yandi kuma mizisie ya nene ya miziki ya rock. Ata mpidina, Esa vandaka mpenza ve na kiese. Yandi ke tuba nde: “Ata mono vandaka kusepela kuvanda na orkestre yina, mono vandaka ti mpusa ya ngolo ya kuvanda ti luzingu ya kele ti lukanu.” Kansi na nima, Esa kutanaka ti Mbangi mosi ya Yehowa. Yandi ke tuba nde: “Mono yulaka yandi bangiufula mingi. Bamvutu na yandi ya siki-siki mpi ya me simbama na Masonuku yitukisaka mono ngolo, yo yina mono ndimaka nde yandi longuka Biblia ti mono.” Mambu yina Esa longukaka na Biblia simbaka ntima na yandi mpi pusaka yandi na kudipesa na Yehowa. Yandi ke tuba nde: “Na ntama, mono vandaka kudiyangisa ntangu yonso sambu na bampasi. Ntangu yai, mono kele ti luzingu yina kele ti lukanu ya kieleka.” *
MUNSIKU: “Kiese na bantu yina ke wilaka bantu ya nkaka mawa.”—Matayo 5:7.
MUTINDU MUNSIKU YAI KE SADISAKA NA KUVANDA TI LUZINGU YA KELE TI LUKANU:
Kuwila bantu mawa ke tendula kufwila bankaka nkenda, kumonisila bo ntima ya mbote mpi kuditula na kisika na bo. Yezu wilaka bansukami mawa. Mawa ya ngolo pusaka yandi na kusala bitambi sambu na kulembika bampasi ya bantu ya nkaka. (Matayo 14:14; 20:30-34) Ntangu beto ke landa mbandu ya Yezu ya kuwila bankaka mawa, beto ke vandaka ti luzingu ya kele ti lukanu, sambu bantu yina ke wilaka bankaka mawa ke vandaka na kiese. (Bisalu 20:35) Beto lenda wila bankaka mawa na bangogo mpi na bisalu na beto ya mawete, mpi na kupesaka ndembikilu na bantu yina kele na mfunu ya lusadisu. Keti kuwila bankaka mawa ke tomisaka mpenza mambote na beto?
Maria mpi Carlos
MBANDU YA LUZINGU:
Maria mpi bakala na yandi Carlos, kele bambandu ya mbote na yina me tala kuwila bankaka mawa. Tata ya Maria kele mufwidi, mpi na bamvula yina me katuka kuluta yandi belaka maladi ya ngolo mpi yandi ke lalaka kaka na mbeto. Maria mpi Carlos nataka yandi na nzo na bo mpi vandaka kusala yonso sambu na kulungisa bampusa na yandi. Bo vandaka kulutisa bampimpa mingi kukonda kulala, mpi bantangu ya nkaka yo vandaka kulomba nde bo nata yandi nswalu na lupitalu kana maladi na yandi ya diabete me bwisa yandi. Bo ke tuba nde, na bantangu ya nkaka bo vandaka kulemba nitu. Kansi, bo vandaka na kiese kaka mutindu Yezu tubaka, sambu bo zabaka nde bo vandaka kupesa tata ya Maria yonso yina yandi vandaka na yo mfunu.
MUNSIKU: “Kiese na bantu yina ke tulaka ngemba.”—Matayo 5:9.
MUTINDU MUNSIKU YAI KE SADISAKA NA KUVANDA TI LUZINGU YA KELE TI LUKANU: ‘Kutula ngemba’ ke tendula kuvanda muntu yina ke kotisaka ngemba.
Inki mutindu kuvanda muntu yina ke kotisaka ngemba lenda sadisa na kuvanda na luzingu yina kele mpenza ti lukanu? Sambu na kikuma mosi, beto ke vandaka na bangwisana ya mbote ti bantu yina ke vandaka na nziunga na beto. Yo ta vanda mbote nde beto tula dikebi na ndongisila yai ya Biblia: “Kana mpila kele, beno sala yonso yina beno lenda sala sambu na kuzinga na ngemba ti bantu yonso.” (Baroma 12:18) “Bantu yonso” ke tadila bantu ya dibuta na beto mpi bantu ya nkaka yina kele ve Bakristu. Keti kuvanda muntu yina ke tulaka ngemba na kati ya “bantu yonso” ta sala nde luzingu na beto kuvanda ti lukanu mpenza?
Nair
MBANDU YA LUZINGU:
Beto tadila mambu yina kuminaka nkento mosi na zina ya Nair. Na nsungi ya bamvula, yandi kutanaka ti mambu mingi yina tulaka yandi na kumekama na yina me tala kutanina ngemba, mingi-mingi ti bantu ya dibuta na yandi. Tuka bakala na yandi me yambulaka yandi bamvula 15 me luta, yandi ke sansaka bana na yandi, yandi mosi. Mwana na yandi mosi ya bakala kumaka kunwa makaya ya ngolo mpi nkolami, mpidina yandi kumaka kigonsa sambu na yandi ti mwana na yandi ya nkento. Nair ke ndima nde mambu yina yandi longukaka na Biblia pesaka yandi kikesa ya kuvanda muntu yina ke tulaka ngemba, ata na bantangu ya mpasi ya mutindu yina. Yandi vandaka kusala bikesa sambu na kutulana ve ntembe to kunwana ti mwana na yandi. Yandi salaka ngolo sambu na kumonisa ntima ya mbote, kuwila bankaka mawa, mpi kubakisa bo. (Baefezo 4:31, 32) Yandi ndimaka nde kulonguka na kuvanda muntu yina ke tulaka ngemba sadisaka yandi na kuvanda na bangwisana ya mbote mpenza ti dibuta na yandi mpi bantu ya nkaka.
TADILA MAKWISA
Kana beto landa bandongisila ya mayele ya Yezu, beto ta vanda na kiese mingi na luzingu. Kansi, sambu na kuvanda ti luzingu yina kele ti lukanu beto fwete zaba mpi mambu yina makwisa ke bumbila beto. Nkutu, nki mutindu luzingu lenda vanda ya mbote kana beto yonso me zaba nde nsuka-nsuka beto ta nuna, ta bela mpi na nima beto ta fwa? Ata mpidina, yo kele mambu yina beto ke kutanaka ti yo na luzingu na nsi-ntoto.
Kansi kele ti nsangu mosi ya mbote! Yehowa me bumbaka balusakumunu mingi sambu na bantu yonso yina ke sala bikesa sambu na “kutambula mutindu Yezu tambulaka.” Yehowa ke sila nde, kubika fioti yandi ta sala nsi-ntoto mosi ya lunungu, kisika bantu ya kwikama ta zinga mutindu yandi kanaka yo tuka luyantiku—kimakulu mpi na mavimpi ya kukuka. Ndinga na yandi ke tuba nde: “Tala! Tenta ya Nzambi kele ti bantu, yandi ta zinga ti bo, mpi bo ta vanda bantu na yandi. Mpi Nzambi yandi mosi ta vanda ti bo. Mpi yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:3, 4.
Maria, nkento yina ya bamvula 84 ya beto tubilaka na disolo ya ntete na masolo yai ya kulandana, ke monaka kiese mpi ke vingila na kumona kulungana ya bangogo yai. Ebuna nge? Keti nge ta zola kuzaba mambu ya nkaka na yina me tala “luzingu ya kieleka”—yina beto ta vanda ti yo na nsi ya Kimfumu ya Nzambi? (1 Timoteo 6:19) Kana yo kele mpidina, lomba lusadisu na Bambangi ya Yehowa ya kisika yina nge ke zingaka to sonikila bambasisi ya zulunalu yai. *
^ par. 8 Nge lenda tanga disolo ya Esa na lutiti 8-9 ya zulunalu yai.
^ par. 18 Mukanda Inki Biblia Kelongaka Mpenza?, yina Bambangi ya Yehowa me basisaka, me sadisaka bantu mingi na kulonguka masolo ya Biblia.
Nge Lenda Sepela Mpi Ti
BAMVUTU NA BANGIUFULA YA BIBLIA
Sambu na Nki Beto Kele na Luzingu?
Keti nge me kudiyulaka dezia, ‘Sambu na nki beto ke zingaka?’ Tala mvutu ya Biblia ke pesaka na ngiufula yai.
