Mono butukaka na Riga, ntu-mbanza ya Lettonie. Mama muntu sansaka mono ti mpangi na mono ya nkento. Ata mama vandaka muntu ya Katolika, beto vandaka kukwenda na nzo-nzambi kaka na bilumbu ya nkinsi. Ntangu yonso mono vandaka kundima nde kele ti ngolo mosi ya kuluta nene, kansi sambu mono vandaka toko, bampusa mingi ya nkaka katulaka dikebi na mono.

Ntangu mono yelaka, mama bakisaka nde mono vandaka ti makuki ya kukangula bima (ba apareyi) mpi ya kuyidika yo diaka. Sambu bima vandaka mingi na nzo yina mono lendaka kukangula mpi mono vandaka ve na bisadilu ya mbote, mama vandaka kudiyangisa mbala mingi na kuyambula mono mosi na nzo. Yo yina, yandi pesaka mono bisadilu yonso ya kisalu, yina sadisaka mono na kukangula mpi kuyidika bima. Mpusa yina butaka mpusa ya nkaka ya mono vandaka ti yo—kisalu ya kupusa moto. Mama sonikisaka zina na mono na nsaka ya moto ya bo ke bingaka Zelta Mopēds (The Golden Moped). Mono yantikaka kupusa vélomoteur, na nima mono kumaka kupusa moto.

Mono sukininaka ve na kulonguka kisalu yango mpi na nima mono kumaka kununga na nsaka yai ya ntinu mpi ya kigonsa. Mbala tatu mono nungaka na nsaka ya nene yina bo yidikaka na Lettonie, mpi mbala zole mono nungaka na nsaka ya nene yina bansi mingi yidikaka (Baltic States Superbike Championship).

Ntangu mono bakaka lukanu ya kubika kisalu na mono, Evija nduku na mono (yina kumaka nkento na mono) solulaka ti Bambangi ya Yehowa. Yandi zwaka mwa mikanda na bo yina vandaka ti formilere ya bo ke fulusaka sambu na kulomba kulonguka ya Biblia. Yandi fulusaka yo mpi tindaka yo. Ntama mingi ve, Bambangi zole ya Yehowa kwendaka kutala yandi mpi yandi yantikaka kulonguka Biblia. Kulonguka Biblia vandaka mbote kansi na ntangu yina mono vandaka kusepela ve ti mambu ya kimpeve.

 Na nima, Bambangi ya Yehowa lombaka mono na kulanda masolo ya Biblia yina bo vandaka kulonguka ti Evija. Mono ndimaka, mpi sepelaka ti mambu ya mono waka. Lusilu ya paladisu na ntoto simbaka mpenza ntima na mono. Mu mbandu, bo songaka mono verse ya Nkunga 37:10, 11, yina ke tuba nde: “Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto.” Lusilu yai sepedisaka mono mpenza.

Mpusa na mono ya mambu ya kimpeve landaka na kuyela. Mono yantikaka kubakisa nde malongi ya mabundu mingi vandaka ya luvunu. Kansi, malongi ya Biblia yitukisaka mono sambu yo vandaka kibeni pwelele mpi mbote.

Ntangu mono landaka kulonguka Biblia mono bakisaka nde Yehowa ke bakaka luzingu na valere, mpi yo ke vandaka mfunu mingi na meso na yandi. (Nkunga 36:10) Malongi yai vandaka ti bupusi na nsaka na mono ya moto—mono zolaka diaka ve kutula luzingu na mono na kigonsa. Kansi, mono zolaka kusadila luzingu sambu na kupesa Yehowa nkembo. Yo yina, kuzabana, lukumu mpi kiese ya mingi sambu na nsaka ya moto vandaka diaka mfunu ve sambu na mono.

Na mvu 1996, mono kwendaka na lukutakanu ya bansi mingi ya Bambangi ya Yehowa na Tallinn, ntu-mbanza ya Estonie, yo vandaka ntama ve ti stade kisika ya mono vandaka kusala nsaka mbala na mbala. Na lukutakanu ya distrike, mono monaka bantu yina katukaka na bansi mingi me vukana na bumosi mpi na ngemba. Mu mbandu, ntangu Mbangi mosi vidisaka ka-saki ya bo ke tulaka mbongo, mono yindulaka nde yandi ta mona yo diaka ve ata fioti. Kansi ntangu fioti na nima, Mbangi mosi monaka ka-saki yango mpi vutudilaka yandi yo ti bima yonso yina vandaka na kati. Yo yitukisaka mono ngolo! Mono bakisaka nde Bambangi ya Yehowa ke zitisaka mpenza minsiku ya kuzanguka ya Biblia. Mono ti Evija landaka na kulonguka, mpi na mvu 1997 beto bakaka mbotika.

Banduku na mono ya nkaka me fwaka sambu na nsaka yina ya kigonsa. Ntangu mono longukaka Biblia, mono bakisaka nde mono kele ti mukumba ya kulungisa na Yehowa, Muntu Yina Ke Pesaka luzingu. Ziku, nzayilu yai me gulusaka luzingu na mono.

Beto vandaka ti dibaku ya kusala kisalu ya ntangu yonso na biro ya filiale ya Bambangi ya Yehowa na Riga bamvula iya. Bubu yai, beto ke vandaka na kiese na kusansa mwana na beto ya nkento Alise, mpi kusadisa yandi na kuyela na zola ya Yehowa. Mono ke vandaka mpi ti dibaku ya kulutisa kilumbu mosi konso mposo na biro ya traduction sambu na kuyidika bakamio mpi bima ya nkaka yina me beba. Yo ke pesaka mono kiese mingi na kusadila makuki yina mono longukaka na bumwana na mutindu ya mbote! Ya kieleka, tii bubu yai mono ke kangulaka bima mpi ke yidikaka yo.

Mono ti dibuta na mono ke bakaka na valere dibaku yai ya kuta kimbangi sambu na Nzambi mosi kaka ya kieleka mpi ke monisaka ntonda sambu na mambu yonso ya mono me longukaka na Biblia. Ya kieleka, lusilu ya paladisu na ntoto sobaka luzingu na mono!