Yehowa Nzambi ke zolaka nde beto zabisa yandi bampasi na beto mbala na mbala. (Luka 18:1-7) Yandi ke waka bisambu sambu yandi ke tudilaka beto dikebi. Sambu Tata na beto ya zulu ke lomba beto na kusamba yandi na zola yonso, beto fwete ndima emvitasio na yandi.—Tanga Bafilipi 4:6.

Kisambu ke tendula kaka ve kulomba lusadisu. Kansi, yo ke sadisaka beto na kukwenda pene-pene na Nzambi. (Nkunga 8:4, 5) Ntangu beto ke songaka Nzambi mawi na beto mbala na mbala, beto ke salaka bangwisana ya ngolo ti yandi.—Tanga Yakobo 4:8.

Nzambi ke zolaka ve nde beto sadila bangogo sambu na kudisonga na meso ya bantu to kuvutukila bisambu ya beto me kanga na ntu ntangu beto ke samba. Yandi ke lombaka beto mpi ve pozisio mosi ya siki-siki. Yehowa ke zolaka nde bisambu na beto kukatuka na ntima. (Matayo 6:7) Mu mbandu, na Izraele ya ntama, Ana sambaka sambu na mambu yina vandaka kuyangisa yandi. Na nima, ntangu mpasi na yandi kitukaka kiese, yandi sambaka Nzambi na ntima ya mvimba mpi pesaka yandi matondo.—Tanga 1 Samuele 1:10, 12, 13, 26, 27; 2:1.

Beto kele ti dibaku mosi ya kitoko kibeni! Beto lenda zabisa Ngangi bampasi na beto. Beto lenda kumisa mpi kupesa yandi matondo sambu na mambu yina yandi ke salaka. Ntembe kele ve nde beto fwete mona ve mpamba dibaku yai ya mfunu mingi.—Tanga Nkunga 145:14-16.