“Mambu yonso ya nge ta vanda ti mfunu na yo, zabisa mono mpi mono ta sala yo na kiese yonso.” Ntembe kele ve nde nge ta tuba ve mambu yai na munzenza to na muntu ya nge me zaba mbote ve. Kansi, nge lenda tuba yo na nduku na nge ya ngolo. Banduku ya ngolo ke vandaka ya kuyilama sambu na kusadilana mambu.

Biblia ke monisa nde Yehowa ke salaka mbala na mbala mambu yina ke pesaka bansadi na yandi kiese. Mu mbandu, Ntotila Davidi, nduku ya Nzambi tubaka nde: “Mfumu Nzambi, Nzambi na mono, nge me sadila beto mambu mingi ya mbote, . . . kana mono mekaka na kutuba yo yonso, mono zolaka kukuka ve.” (Nkunga 40:6) Nkutu, Yehowa ke salaka mambu yina ke sepedisaka bantu yina me zabaka yandi ntete ve mpi ‘ke pesaka bo madia mingi mpi ke fulusaka bantima na bo na kiese.’—Bisalu 14:17.

Sambu Yehowa ke salaka mambu yina ke pesaka bantu ya nkaka kiese, yo me fwana nde bantu yina ke zola kukuma banduku na yandi kusala mpi mambu yina ‘ta pesa yandi kiese.’ (Bingana 27:11) Inki nge fwete sala mpenza sambu na kupesa Nzambi kiese? Biblia ke pesa mvutu nde: “Beno vila ve na kusala mambu ya mbote mpi na kukabula ti bankaka bima yina beno kele na yo, sambu Nzambi ke monaka kiese na bimenga ya mutindu yai.” (Baebreo 13:16) Keti mambu ya mfunu ya bantu fwete sala sambu na kusepedisa Yehowa kele kaka kusala mambu ya mbote mpi kukabula ti bankaka bima yina bo kele na yo?

Biblia ke tuba nde: “Kukonda lukwikilu muntu lenda sepedisa Nzambi ve.” (Baebreo 11:6) Yo ke pwelele nde ‘Abrahami tulaka ntete lukwikilu na Yehowa, ebuna bo kumaka kubinga yandi nduku ya Yehowa.’ (Yakobo 2:23) Yezu Kristu tubilaka mpi mfunu ya ‘kumonisa lukwikilu na Nzambi’ kana beto ke zola nde Nzambi kusakumuna beto. (Yoane 14:1) Inki mutindu nge lenda kuma ti lukwikilu yina Nzambi ke lombaka bantu yina ke zola kukwenda pene-pene na yandi? Yantika kulonguka Biblia, Ndinga ya Nzambi mbala na mbala. Kana nge ke sala mutindu yai, nge ta baka “nzayilu ya sikisiki ya luzolo na yandi” mpi nge ta zaba mutindu ya “kupesa yandi kiese kibeni.” Kana nge ke yedisa nzayilu ya sikisiki ya Yehowa mpi ke sadila minsiku na yandi ya lunungu ya nge ke longuka, lukwikilu na nge ta kuma ngolo mpi yandi ta kwisa pene-pene na nge.—Bakolosai 1:9, 10.