Bonso Alex, bantu mingi bubu yai ke zolaka ve kusala kisalu ya ngolo. Aaron muntu mosi ya ke yidikaka bakamio ke tuba nde: “Bantu mingi ke yindulaka nde kusala bisalu ya ‘mpamba-mpamba’ ke kulumusaka bo. Bo ke tubaka nde: ‘Mono ke sala ntete kisalu yai tii kuna kisalu ya nkaka ya mbote ta monana.’”

Sambu na nki bantu ya nkaka ke yindulaka nde bisalu ya ngolo me fwana ve sambu na bo? Ziku, baradio, batelevizio mpi bazulunalu ke kusaka bo. Bimwangi-nsangu yai ke monisaka mbala mingi nde “luzingu ya mbote” ke tendulaka kuvanda ti bima mingi ya kinsuni. Matthew, muntu mosi ya ke yidikaka bima ke tuba nde: “Bantu ke yindulaka nde kana muntu ke sala kisalu ya ngolo sambu na kuzwa kaka bima ya fioti-fioti ya kuzingila, luzingu na yandi ta kwenda ve na ntwala.” Shane, muntu mosi ya ke tulaka bunkete mpi ya ke yidikaka banzo ke yindulaka mpi mutindu mosi. Yandi ke tuba nde: “Bantu ke salaka diaka ve kisalu ya ke lombaka nde bo futa bo mbongo na nsuka ya kilumbu.”

Kansi, bantu mingi yina luzingu na bo me tomaka ke sepelaka na kusala kisalu ya ngolo. Daniel, toko mosi ya bamvula 25 ya ke tungaka banzo ke tuba nde: “Mono ke monaka nde kusala kisalu ya ngolo ke nataka mambote, mingi-mingi kana muntu ke sala yo ti mabanza ya mbote.” Andre, toko mosi ya bamvula 23 ke ndima mpi dibanza yai. Yandi ke tuba nde: “Mono ke ndimaka nde kisalu ke nataka kiese. Kansi, kusala kisalu fioti lenda nata ve kiese ya ntangu ya nda. Yo ke nataka kaka bampasi!”

Inki me sadisaka Daniel mpi Andre na kuvanda ti mabanza ya mbote sambu na kisalu ya ngolo? Na bunkufi, bo ke sadilaka minsiku ya Biblia na luzingu na bo. Na kisika ya kubuyisa kisalu ya ngolo, Biblia ke siamisaka beto na kusala kisalu ya ngolo mpi na kukwamina. Yo ke siamisaka beto ve kaka na kusala kisalu kansi yo ke monisaka mpi mutindu ya kusepela ti kisalu yango.

Inki minsiku ya Biblia lenda sadisa nge na kusepela ti kisalu na nge? Beto ke lomba nge na kutadila mwa minsiku yango na disolo ya ke landa.