Bingana 16:1-33
16 Muntu ke yidikaka bangindu ya ntima na yandi,*Kansi mvutu yina yandi ke pesaka* ke katukaka na Yehowa.+
2 Banzila yonso ya muntu ke monanaka mbote* na meso na yandi,+Kansi Yehowa ke talaka bikuma ya ke pusaka yandi na kusala mambu.*+
3 Pesa mambu yonso ya nge ke sala na Yehowa,*+Ebuna balukanu na nge ta nunga.
4 Yehowa me sala nde mambu yonso kulungana sambu na lukanu na yandi,Ata muntu ya mbi sambu na kilumbu ya mpasi.+
5 Muntu yina kele lulendo na ntima kele kima ya nzanzi na meso ya Yehowa.+
Ndima* nde yandi ta baka kibeni ndola.
6 Bo ke fikaka kifu na zola ya kwikama mpi kwikama,+Mpi muntu ke tinaka mambu ya mbi kana yandi ke wa Yehowa boma.+
7 Kana Yehowa ke wa kiese na banzila ya muntu,Yandi ke salaka nde ata bambeni na yandi kuzinga na ngemba ti yandi.+
8 Kuvanda ti bima fioti na lunungu kele mbote+Kuluta kuvanda ti mbongo mingi kukonda lunungu.+
9 Muntu lenda kana nzila na yandi na ntima,Kansi Yehowa muntu ke twadisaka bitambi na yandi.+
10 Lukanu ya Nzambi* fwete vanda na bikobo ya ntotila;+Yandi fwete teka ve lunungu ata fioti.+
11 Bima ya kutesila mpi bakilo ya masonga ke katukaka na Yehowa;Bakilo yonso ya kele na saki kele kisalu na yandi.+
12 Bisalu ya mbi kele kima ya nzanzi na meso ya bantotila,+Sambu bo me tulaka kiti ya kimfumu ngolo na nzila ya lunungu.+
13 Kutuba ya lunungu ke pesaka bantotila kiese.
Bo ke zolaka muntu yina ke tubaka na masonga.+
14 Makasi ya ntotila kele bonso kinati-nsangu ya lufwa,+Kansi muntu ya mayele ke lembikaka* yo.+
15 Luzingu ke vandaka na nsemo ya luse ya ntotila;Kundimama na yandi kele bonso dituti ya mvula na nsungi ya mvula.+
16 Kubaka mayele kele mbote mingi kibeni kuluta kubaka wolo!+
Yo kele mbote na kusola kubaka mayele ya kubakisa mambu na kisika ya arza.+
17 Bantu ya mbote ke buyaka nzila ya nene ya mbi.
Muntu yina ke kebaka nzila na yandi ke taninaka luzingu* na yandi.+
18 Lulendo ke vandaka na ntwala ya kubwa,Mpi mpeve ya lulendo na ntwala ya kubula sakuba.+
19 Kudikulumusa* na kati ya bantu ya kudikulumusa kele mbote+Kuluta kukabula bima yina bantu ya lulendo me botula.
20 Muntu yina ke monisa mayele ya kubakisa mambu mbote-mbote na diambu mosi ta nunga,*Mpi kiese na muntu yina ke tudilaka Yehowa ntima.
21 Muntu yina kele mayele,* bo ta binga yandi muntu yina kele ti mayele ya kubakisa mambu,+Mpi muntu yina ke tubaka na mawete* ke yikaka mayele ya kundimisa.+
22 Mayele ya kubakisa mambu mbote-mbote kele nto ya luzingu sambu na bantu yina kele ti yo,Kansi bazoba ke bakaka ndola na buzoba na bo mosi.
23 Ntima ya muntu ya mayele ke pesaka munoko na yandi mayele ya kubakisa mambu mbote-mbote+Mpi ke yikaka mayele ya kundimisa na kutuba na yandi.
24 Kutuba yina ke pesaka kiese kele nzo ya bwiki,Yo kele ntomo sambu na moyo* mpi yo ke belulaka mikwa.+
25 Kele ti nzila yina ke monanaka mbote na meso ya muntu,Kansi na nsuka yo ke nataka na lufwa.+
26 Nzala* ya muntu ya kisalu ke salaka nde yandi sala ngoloSambu nzala* na yandi ke pusaka yandi na kusala.+
27 Muntu ya kukonda mfunu ke futumunaka mambu ya mbi;+Kutuba na yandi kele bonso tiya ya ke yokaka.+
28 Muntu yina ke nataka mavwanga* ke kabulaka bantu,+Mpi muntu yina ke kusilaka bantu makambu ke kabulaka banduku ya ngolo.+
29 Muntu ya mubulu ke pukumunaka nkweno na yandiMpi ke nataka yandi na nzila ya mbi.
30 Yandi ke bwetaka meso na yandi ntangu yandi ke kana kusala mambu ya mbi.
Yandi ke tatika-tatika bikobo na yandi ntangu yandi ke sala mbi.
31 Nsuki ya mpembe kele mpu ya kimfumu ya kitoko*+Kana yo kele na nzila ya lunungu.+
32 Muntu yina ke waka makasi nswalu ve+ kele mbote kuluta muntu ya ngolo,Mpi muntu yina ke yalaka makasi* na yandi kele mbote kuluta muntu yina me botula mbanza.+
33 Bo ke bulaka zeke na poshi ya lele,+Kansi konso lukanu ya bo ke bakaka na nzila na yo ke katukaka na Yehowa.+
Banoti na nsi ya lutiti
^ To “mvutu ya mbote.” Na kisina, “mvutu ya ludimi.”
^ Na kisina, “Kuyidika mambu ya ntima kele ya muntu.”
^ Na kisina, “bunkete.”
^ Na kisina, “ke talaka bampeve.”
^ Na kisina, “Bikila Yehowa bisalu na nge.”
^ Na kisina, “Diboko na diboko.”
^ To “Lukanu ya kupemama.”
^ To “tinaka.”
^ To “moyo.”
^ Na kisina, “Kuvanda ti mpeve ya kudikulumusa.”
^ Na kisina, “ta baka mambote.”
^ To “Mpi kutuba ya mbote.” Na kisina, “Mpi sukadi ya bikobo.”
^ Na kisina, “mayele na ntima.”
^ To “kana nge meka yo.” Tala Bantendula ya Bangogo.
^ Na kisina, “munoko.”
^ To “Moyo.”
^ To “Muntu yina ke bakaka balukanu ya mbi.”
^ To “kele nkembo.”
^ Na kisina, “mpeve.”
