“Mono vandaka kukinga yo yai bamvula 19!” Inki mpangi na beto ya bakala vandaka kukinga? Biblia—Mbalula ya Nsi-Ntoto ya Mpa (Matayo-Kusonga) na ndinga Bengali, ndinga na yandi ya kubutukila. Bantu mingi ke tubaka mpi mpidina kana Mbalula ya Nsi-Ntoto ya Mpa me basika na ndinga na bo. Kansi, keti nge me kudiyulaka dezia inki yo ke lombaka kusala sambu na kubalula mpi kubasisa Babiblia yina?

 Kima ya ntete, bampangi-babakala mpi bampangi-bankento yina ke salaka kisalu yai ke salaka yo na nsi ya lutwadisu ya Komite Sambu na Kusonika ya Nto-Kimvuka. Sambu na kubalula Biblia, yo ke lombaka nde bampangi yina ke salaka kisalu yango kubaka bamvula ikwa? Nicholas Ahladis, mpangi yina ke sadilaka Yehowa diboko na diboko ti Departema Yina Ke Talaka Kisalu ya Kubalula na Warwick na New York ke tuba nde: “Mambu ke vandaka mingi, mu mbandu yo ke lombaka kuzaba bampangi ikwa yo ta lomba kusadila sambu na kusala kisalu yai, keti ndinga yina bo ta balula kele mpasi, keti bantu yina ta tanga yo ke bakisaka mutindu bantu vandaka kuzinga na nsungi yina bo sonikaka Biblia mpi kana ndinga yina bo ta balula, bantu ke tubaka yo mutindu ya nkaka na kutadila bisika yina bo ke zinga. Yo ke lombaka nde bampangi yina ke sala kisalu ya kubalula kubaka kiteso ya mvula mosi, zole to tatu sambu na kubalula Masonuku ya Kigreki ya Bukristu mpi mingi-mingi bamvula iya to kuluta sambu na kubalula Biblia ya mvimba. Kisalu yai ke bakaka diaka bamvula mingi kuluta sambu na kubalula na ndinga ya bidimbu.”

 Katula bampangi yina ke salaka kisalu yango ya kubalula, yo ke lombaka mpi kusadila bampangi ya nkaka. Bo ke sadilaka mpi bampangi-babakala mpi bampangi-bankento ya bisika ya mutindu na mutindu, mpi bantangu ya nkaka ya bansi ya mutindu na mutindu, sambu na kutanga mpi kutala kana bampangi yina me sala kisalu ya kubalula me sala yo mbote. Bampangi yai ya ke tangaka ke salaka kisalu yina ya ofele. Mambu ya bo ke tubaka na nima ya kutanga ke sadisaka bampangi yina me sala kisalu ya kubalula na kubalula Biblia na mutindu ya siki-siki, ya pwelele mpi na mutindu yina bantu ta bakisa. Kansi diambu ya kuluta mfunu kele yai ya mpangi-bakala mosi ya ke pesaka bampangi yina ke balulaka Biblia formasio ke tuba. Yandi ke vandaka na Afrique du Sud. Yandi ke tuba nde: “Bampangi yina ke salaka kisalu ya kubalula ke zabaka nde bo kele ti mukumba mosi ya nene na ntwala ya Yehowa mpi ya bantu yina ta tanga Ndinga na yandi.”

 Kana bo me manisa kisalu ya kubalula Biblia, yo ke lombaka kubasisa yo na bapapie mpi kuvukisa bapapie yina kisika mosi sambu yo sala Biblia. Sambu na kusala kisalu yina, yo ke lombaka nde bamasini yina bo ke basisilaka mikanda na bapapie kuvanda ti “bisadilu” kiteso ya kumi: bapapie, tinta (encre), bima ya kusadila kimpusu, bakole, bima yina bo ke bingaka doublures de couverture, feuille d’argent, rubans, bandeaux, bima yina bo ke sadilaka sambu na kusala mukongo ya mukanda, mpi bima yina bo ke sadilaka sambu na kusala kimpusu ya mukanda yina ke sadisaka sambu na kuvukisa bapapie yina ta sala Biblia. Na 2019, bo basisaka mbongo ya badolare kuluta bamilio 20 kaka sambu na kusumba bima yina sambu na kusala Biblia. Bampangi yina ke sadilaka bamasini yina beto ke basisilaka mikanda na bapapie salaka bangunga kuluta 300 000 na 2019 sambu na kubasisa Babiblia na bapapie mpi kutinda yo na bisika yina yo fwete kwenda.

 Sambu na nki beto ke salaka bamvula mingi, bantangu mingi mpi beto ke sadilaka mbongo mingi sambu na kusala bisalu yina? Joe Blue yina ke sadilaka Yehowa na Biro ya Ke Talaka Kisalu ya Kubasisa Mikanda na Bapapie na Ntoto ya Mvimba ke tuba nde: “Biblia kele mukanda ya kuluta mfunu ya beto ke basisaka. Yo yina, beto ke zolaka nde mutindu yo fwete monana kupesa Nzambi yina beto ke sambilaka lukumu mpi nsangu yina beto ke longaka.”

 Katula Mbalula ya Nsi-Ntoto ya Mpa yina bantu yonso lenda sadila, beto ke basisaka mpi Biblia yai sambu na bantu yina ke tangaka yo kansi ya lenda sadila ve yina bantu yonso lenda tanga. Mu mbandu, Mbalula ya Nsi-Ntoto ya Mpa na bisono ya bifwa-meso kele na bandinga kumi. Biblia ya mvimba na bisono yai lenda baka bangunga nana sambu na kusala yo, mpi mutindu yo ke vandaka na bavolime mingi, yo ke lombaka kisika yina kele bametre 2.3 sambu na kutanda yo. Beto ke salaka mpi Babiblia sambu na bantu yina kele na boloko sambu kuna, bo ke kotisaka kaka mikanda yina kele ve ti kimpusu ya ngolo.

 Mbalula ya Nsi-Ntoto ya Mpa ke vandaka ti bupusi na luzingu ya bantu. Beto baka mbandu ya dibundu mosi ya ke salaka balukutakanu na ndinga Kiluba. Yo kele na République démocratique du Congo. Tombe kele na bakilometre kuluta 1, 700 kana nge ke sala nzietelo na kaminio katuka na nto-mbanza ya insi yai. Na bwala yina, Bambangi ya Yehowa vandaka kaka ti Biblia mosi mpi Biblia yango vandaka na Kiluba yina bantu vandaka kutuba na ntangu ya ntama. Sambu na kuyidika masolo ya kusala na lukutakanu, bampangi yonso vandaka kusadila kaka Biblia yina mosi. Kansi banda na ngonda ya Augusti 2018, konso muntu na dibundu yina zwaka Biblia ya mvimba Mbalula ya Nsi-Ntoto ya Mpa na Kiluba yina bantu ke tubaka bilumbu yai.

 Mpangi-nkento mosi ya ke tubaka Ki-Alema tubaka sambu na Biblia Mbalula ya Nsi-Ntoto yina bo me tomisa na ndinga na yandi nde: “Mono ke tubaka diaka ve nde mono fwete tanga Biblia. Kansi, mono ke kudiyulaka nde, ‘Inki ntangu mono lenda tanga diaka?’” Muntu mosi ya boloko sonikaka nde: “Bo pesaka mono Biblia mosi Mbalula ya Nsi-Ntoto ya Mpa, mpi yo ke soba luzingu na mono. Mono me bikaka ve kuzaba Ndinga ya Nzambi mbote mutindu mono me kuma kuzaba yo banda mono ke tanga Biblia yai. Mono ta sepela kuzaba mambu mingi na yina me tala Bambangi ya Yehowa mpi mutindu mono lenda kuma Mbangi ya Yehowa.”

 Bantu yonso ya ke tangaka Biblia yai Mbalula ya Nsi-Ntoto ya Mpa ke pesa mersi sambu na makabu yina bantu ke pesaka sambu Biblia yai kubasika. Bantu ke pesaka makabu yina ke sadisaka na kisalu yai ya ke salama na ntoto ya mvimba na nzila ya bametode yina kele na donate.ps8318.com. Mersi mingi sambu na kikalulu na beno ya kukaba.