DILONGI 04
Nani Kele Nzambi ya Kieleka?
Banda ntama, bantu ke sambilaka banzambi mingi. Kansi Biblia ke tubilaka Nzambi mosi mpamba yina “kele nene kuluta banzambi yonso ya nkaka.” (2 Bansangu 2:5) Nani kele Nzambi yango? Mpi nki ke salaka nde yandi vanda nene kuluta banzambi yonso ya nkaka yina bantu ke sambilaka? Na dilongi yai, tala mutindu Nzambi ke zabisa nge zina na yandi.
1. Zina ya Nzambi kele nani mpi nki ke monisa nde yandi ke zolaka nde beto zaba zina yango?
Nzambi ke songaka beto zina na yandi na Biblia. Yandi ke tuba nde: “Mono kele Yehowa. Yo yina zina na mono.” (Tanga Yezaya 42:5, 8.) Zina “Yehowa” kele na Kiebreo. Bantu mingi ya mayele ke tubaka nde yo ke tendula “Yandi Ke Kumaka.” Yehowa ke zolaka nde beto zaba zina na yandi. (Kubasika 3:15) Inki ke ndimisa beto yo? Zina na yandi kele mbala kuluta 7 000 na Biblia! a Zina Yehowa, kele zina ya ‘Nzambi mosi ya kieleka na zulu mpi na ntoto.’—Kulonga 4:39.
2. Inki Biblia ke songaka beto sambu na Yehowa?
Biblia ke tubaka nde na kati ya banzambi yonso yina bantu ke sambilaka, Yehowa mpamba kele Nzambi ya kieleka. Sambu na nki? Bikuma kele mingi. Yehowa kele Nzambi ya kuluta nene mpi yandi mpamba kele “Muntu ya Kuluta Zulu na ntoto ya mvimba.” (Tanga Nkunga 83:18.) Yandi kele “Nkwa-Ngolo Yonso.” Yo ke tendula nde yandi kele ti ngolo ya kusala konso kima yina yandi me zola. Yandi Muntu “gangaka bima yonso”—na zulu mpi na ntoto. (Kusonga 4:8, 11) Yehowa kele ve bonso banzambi yonso ya nkaka sambu yandi ke zingaka ntangu yonso mpi yandi ta landa kuzinga mvula na mvula.—Nkunga 90:2.
LONGUKA MAMBU MINGI
Beto tala mutindu batitre ya Nzambi me swaswana ti zina na yandi. Na nima, beto sosa kuzaba mutindu yandi me songaka beto zina na yandi mpi sambu na nki yandi me songaka beto yo.
3. Nzambi kele ti batitre mingi kansi yandi kele ti zina mosi
Sambu na kuzaba nde titre ya muntu kele ve mpila mosi ti zina na yandi, beno tala VIDEO mpi na nima beno pesa mvutu na ngiufula yai ya ke landa.
-
Inki ke monisa nde titre, mu mbandu “Mfumu” kele ve mutindu mosi ti zina?
Biblia ke tubaka nde bantu ke sambilaka banzambi mpi bamfumu mingi. Beno tanga Nkunga 136:1-3 mpi na nima beno pesa mvutu na ngiufula yai:
-
Nani kele “Nzambi ya banzambi” mpi “Mfumu ya bamfumu”?
4. Yehowa ke zola nde nge zaba zina na yandi mpi nge sadila yo
Inki ke monisa nde Yehowa ke zolaka nde nge zaba zina na yandi? Beno tala VIDEO mpi na nima beno pesa mvutu na bangiufula yai ya ke landa.
-
Nge ke ndimaka nde Yehowa ke zolaka nde bantu kuzaba zina na yandi? Sambu na nki?
Yehowa ke zolaka nde bantu kusadila zina na yandi. Beno tanga Baroma 10:13 mpi na nima beno pesa mvutu na bangiufula yai:
-
Sambu na nki yo kele mfunu na kusadila zina ya Nzambi Yehowa?
-
Inki mutindu nge ke kudiwaka kana muntu mosi ke binga nge na zina na nge mpi ke vila yo ve?
-
Nge ke yindula nde Yehowa ke kudiwaka nki mutindu ntangu nge ke sadilaka zina na yandi?
5. Yehowa ke zola nde nge kuma nduku na yandi
Nkento mosi na zina ya Soten na Cambodge tubaka nde kuzaba zina ya Nzambi sadisaka yandi na kuvanda “na kiese mingi.” Beno tala VIDEO mpi na nima beno pesa mvutu na ngiufula yai ya ke landa.
-
Mutindu video me monisa yo, nki mutindu kuzaba zina ya Nzambi simbaka ntima ya Soten?
Na ntwala nde nge kuma nduku ya muntu mosi, yo ke lombaka ntete nde nge zaba zina na yandi. Beno tanga Yakobo 4:8a mpi na nima beno pesa mvutu na bangiufula yai:
-
Yehowa ke lombaka nge na kusala nki?
-
Inki mutindu kuzaba mpi kusadila zina ya Nzambi ke sadisaka nge na kudiwa pene-pene na yandi?
BANTU YA NKAKA KE TUBAKA NDE: “Nzambi kele kaka mosi. Yo yina, yo ta sala ve ata kima kana beto ke binga yandi na konso zina yina.”
-
Nge ke ndimaka nde Yehowa kele zina ya Nzambi?
-
Inki mutindu nge ta tendudila bantu ya nkaka nde Nzambi ke zolaka nde beto sadila zina na yandi?
NA BUNKUFI
Yehowa kele zina ya Nzambi mosi kaka ya kieleka. Yandi ke zolaka nde beto zaba zina na yandi mpi beto sadila yo sambu na kukuma banduku na yandi.
Inki Nge Me Simba?
-
Na nki mutindu Yehowa kele ve mutindu mosi ti banzambi yonso ya nkaka yina bantu ke sambilaka?
-
Sambu na nki beto fwete sadila zina ya Nzambi?
-
Inki ke monisa nde Yehowa ke zolaka nde nge kuma nduku na yandi?
TALA MPI
Tala bikuma tanu ya mfunu ya ke ndimisaka nde Nzambi kele.
Tala sambu na nki yo me fwana na kundima nde Nzambi ke zingaka ntangu yonso.
Tala sambu na nki beto fwete sadila zina ya Nzambi ata beto me zaba ve mutindu bo vandaka kubinga yo na ntangu ya ntama.
Keti mutindu beto ke bingaka Nzambi kele mfunu? Tala sambu na nki beto ke tubaka nde Nzambi kele kaka ti zina mosi.
a Sambu na kuzaba mambu mingi ya me tala ntendula ya zina ya Nzambi mpi sambu na nki Babiblia ya nkaka me katulaka yo, tala Bangindu ya Ngika A4 na Biblia-Mbalula ya Nsi-Ntoto ya Mpa.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
