“Binga mono, ebuna mono ta ndima mpi ta songa nge na luzolo yonso mambu ya nene mpi ya nge lenda bakisa ve yina nge me zabaka ve.”—Yeremia 33:3, Mbalula ya Nsi-Ntoto ya Mpa.

 “Samba mono, mono ta wila nge; mono ta songa nge mambu ya nene ti ya kuyituka ya nge me zabaka ntete ve.”—Yeremia 33:3, Bible en Kituba.

 Na nsadisa ya bangogo yai, Nzambi ke lomba bantu na kusamba yandi. Kana bantu ya ke wa mambu yai kundima yo mpi kusamba Nzambi, yandi ta songa bo mambu yina ta salama na bilumbu ke kwisa.

 “Binga mono, ebuna mono ta ndima.” Bangogo “binga mono” ke tendula kaka ve kubinga ndinga ya ngolo to kuboka zina ya Nzambi. Kansi, kubinga Nzambi ke tendula kusosa lusadisu mpi lutwadisu na yandi na kisambu.—Nkunga 4:1; Yeremia 29:12.

 Yo ke monana nde Nzambi songaka mambu yai na bantu ya Izraele ya ntama. Dikanda yai yambulaka Nzambi, mpi basoda ya Babilone vandaka kunwanisa bo. (Yeremia 32:1, 2) Yehowa a songaka bantu ya Izraele na kuvutuka na yandi mpi na kubinga yandi na kisambu.

 “Mono . . . ta songa nge na luzolo yonso mambu ya nene mpi ya nge lenda bakisa ve yina nge me zabaka ve.” Mambu yina Nzambi silaka na kusonga bo vandaka mambu ya bo “lenda bakisa ve” sambu bantu lenda zaba yo ve na mayele na bo mosi. Beto lenda balula mpi bangogo ‘mambu ya nge lenda bakisa ve’ nde “mambu ya kubumbana.”

 Inki “mambu ya kubumbana” Nzambi zolaka kusonga bo? Mambu yina ta salama na bilumbu ke kwisa, disongidila mutindu bo ta fwa mbanza Yeruzalemi ya ntama mpi mutindu yo ta bikala mpamba, mpi na nima mutindu bo ta tunga yo diaka mpi bantu ta zinga diaka. (Yeremia 30:1-3; 33:4, 7, 8) Kansi, Nzambi silaka diaka bantu ya ke sambilaka yandi nde yandi ta fwa ve dikanda na bo ya mvimba.—Yeremia 32:36-38.

 Profete Yeremia bakaka nsangu yai na mvu 608 na ntwala ya ntangu na beto, na mvula ya kumi ya luyalu ya ntotila Sidikiya. Yeremia tubaka na ntwala nde Yeruzalemi ta bwa mpi nde bo ta nata Sidikiya na kimpika. Sambu ntotila sepelaka ve ti nsangu yina, yandi tulaka Yeremia na kasho.—Yeremia 32:1-5; 33:1; 37:21.

 Yai mambu yina salamaka ntangu Nzambi songaka bantu mambu yina kele Yeremia 33:3. Kansi yo kele mawa sambu, ntotila Sidikiya mpi bantu mingi ya Izraele landaka kukolama na Nzambi. (Yeremia 7:26; 25:4) Bo sambaka ve Nzambi sambu na kulomba lutwadisu na yandi. Mvula mosi na nima, bo katulaka Sidikiya na kimfumu, bo fwaka Yeruzalemi mpi bo kangaka bantu mingi yina gulukaka mpi bo nataka bo na Babilone.—Yeremia 39:1-7.

 Mambu yina kele na Yeremia 33:3 ke yibusa bantu ya ke tanga yo nde Nzambi lenda pesa “nzayilu ya sikisiki ya luzolo na yandi” mpi kusonga “mambu ya mudindu” na bantu yina ke sambaka yandi mpi ke longukaka Ndinga na yandi, Biblia. (Bakolosai 1:9; 1 Bakorinto 2:10) Mambu yina Nzambi me silaka na kusala ntama mingi ve na bilumbu ke kwisa kele na kati ya mambu yai ya mudindu.—Kusonga 21:3, 4.

 Tala video yai ya nkufi sambu na kumona na bunkufi mambu yina kele na mukanda ya Yeremia.