“Nzambi yina ke pesaka kivuvu kupesa beno kiese mingi mpi ngemba mingi sambu beno ke tudilaka yandi ntima, sambu kivuvu na beno kukuma mingi na nsadisa ya ngolo ya mpeve santu.”—Baroma 15:13, Mbalula ya Nsi-Ntoto ya Mpa.

 “Nzambi yina ke songaka beto mpila ya kutula yandi ntima, yandi kupesa beno kiese ti ngemba sambu na lukwikilu yina ya beno ke kwikilaka yandi; mpidina beno ta tula ntima mingi na yandi sambu na ngolo yina ya Mpeve na yandi ke pesaka beno.”—Baroma 15:13, Bible en Kituba.

 Na nsadisa ya mambu yina, ntumwa Polo monisaka mutindu yandi vandaka kuzola nde Nzambi kupesa bampangi na yandi Bakristu “kiese mingi mpi ngemba mingi.” Bikalulu yai ya mbote kele ti kuwakana na kivuvu yina Nzambi ke pesaka mpi ngolo ya mpeve santu.

 Beto ke longukaka mambu ya me tala kivuvu yina Nzambi ke pesaka na Ndinga na yandi, Biblia. Na kutadila Baroma 15:4, “mambu yonso ya bo sonikaka ntama [na Biblia], bo sonikaka yo sambu na kulonga beto, sambu na nzila ya kukanga-ntima mpi ya kulembika yina ke katukaka na Masonuku beto vanda ti kivuvu.” Biblia ke songaka beto nde Nzambi me silaka nde yandi ta manisa mambu yina ke salaka nde luzingu kuvanda kukonda kivuvu bubu yai, mu mbandu kinsukami, mambu ya nku, maladi mpi lufwa. (Kusonga 21:4) Nzambi ta sadila Yezu Kristu sambu na kulungisa balusilu yai, mpi beto lenda tula ntima nde beto ta vanda ti luzingu ya mbote na bilumbu ke kwisa.—Baroma 15:12.

 Kivuvu yai ya Nzambi me pesaka lenda kuma “mingi” kaka kana beto ke tula ntima na Nzambi. Kana beto longuka mambu mingi ya me tala yandi, beto ta kuma kundima mingi nde beto fwete tudila yandi ntima ya mvimba. (Yezaya 46:10; Tito 1:2) Na nsadisa ya kivuvu ya mbote yina Nzambi ke pesaka, beto lenda kuma ti kiese mpi ngemba mingi, ata ntangu beto ke kutana ti mambu ya mpasi.—Baroma 12:12.

 Ngemba, kiese, mpi kivuvu kele mpi na kuwakana ti “mpeve santu,” disongidila ngolo ya Nzambi. a Nzambi ke sadilaka mpeve santu sambu na kulungisa mambu yina yandi me silaka, mpi diambu yai ke pesaka beto kivuvu. Mpeve yai lenda sadisa bantu na kumonisa bikalulu ya mbote, mu mbandu kuvanda ti kiese mpi ngemba mingi.—Bagalatia 5:22.

 Na kutuba ya masonga, mukanda ya Baroma kele mukanda yina Polo sonikilaka Bakristu yina vandaka kuzinga na mbanza Roma. Bakristu ya nkaka na kati na bo vandaka Bayuda, kansi bankaka ve. Polo siamisaka bo yonso na kusala ngolo na kuvanda na bumosi na mbanza mpi na mambu ya bo ke sala ata bo katukaka na bisika mpi na babwala ya kuswaswana.—Baroma 15:6.

 Polo yibusaka Bakristu ya Roma nde Nzambi tubilaka na ntwala ntangu yina bantu ya makanda yonso ta pesaka yandi lukumu na kimvuka. Sambu na kundimisa diambu yina, Polo vutukilaka mbala iya mambu yina kele na Masonuku ya Kiebreo. b (Baroma 15:9-12) Diambu ya yandi vandaka kutubila yo yai: Kumosi ti Bayuda, bantu ya makanda yonso lenda baka mambote na kisalu ya kulonga ya Kristu. Bimvuka yina zole kele ti kivuvu yina Nzambi ke pesaka. Yo yina, yo vandaka kulomba nde bantu yonso ya mabundu ya Roma, ata bo katukaka na wapi, bo ‘yambana,’ disongidila, bo sadila bo mambu na ntima ya mbote.—Baroma 15:7.