Nén ũ vẽnh mỹ tỹ hãn ri ken kỹ, ũn e ag vỹ vẽnh ki jẽmẽg tĩ: “Tag ne tugnĩn hãn ri ke ke?” Ẽg tỹ Topẽ Vĩ Rá ki tag to kanhrãnrãn kỹ, tag vỹ ẽg mỹ há han tĩ!

1. Nén ũ kórég ag hã ren kỹ vẽnh ven ke?

Satanás tóg Jeová kato vãsãn mũ. Ti tỹ vẽnh kar tỹ rĩr sór tĩ vã. Hã kỹ, ti tỹ Adão kar Eva fag krĩn kónãn mũ, fag vỹ Topẽ kato vãsãnsãn mũ jé gé. Satanás hã ren kỹ tag han mũ? Ti tỹ Eva fi mỹ vẽnh ó tó ja. (Gênesis 3:1-5) Ti tỹ tó ja, Eva fi mỹ: ‘Jeová pi ũn ag tỹ rĩr há han tĩ’. Ti tóg kãmén mũ, ũn ag pi Topẽ jãmã há ke nỹtĩ, ag tỹ mỹ sigsér nỹtĩ jé. Kỹ, ti vỹ vẽnh ó vén to ja. Ti tóg Eva fi mỹ, fi pi ter ke mũ vã. Tag tugnĩn, Topẽ Vĩ Rá vỹ ẽg mỹ kãmén tĩ, Satanás to: “vẽnh ó vỹ tỹ ti tũ pẽ nĩ. Ti hã vỹ tỹ ũn ón tĩ ag jóg kar nĩ”. — João 8:44.

2. Adão kar Eva fag ne han ké?

Jeová vỹ Adão kar Eva fag to há tãvĩ tĩ vã. Topẽ tỹ fag mỹ tó ja, fag tỹ ka kanẽ e kó ke vẽ, hã ra, ag pi ka kanẽ ũn pir kó ke tũ nĩ. (Gênesis 2:15-17) Hã ra, ag tóg kuprãg mũ, ka kanẽ ẽn kó jé. Eva fi tóg ‘ti kanẽ mãn kỹ ko he mũ sir’. Kar kỹ, Adão tóg ‘fi mré ti ko’ mũ gé. (Gênesis 3:6) Adão kar Eva fag pi fag ki nén ũ kórég nỹtĩ vã, hã kỹ, fag vỹ nén ũ há ag kuprẽg sór ke mũ vã. Jãvo, ag tóg kuprẽg mũ, ag tỹ Jeová kato vãsãnsãn jé. Ag tỹ ge han kỹ, ag tóg Topẽ vĩ mranh mũ, kar ag tóg Topẽ Pãꞌi tugvãnh mũ. Tag tugnĩn, ag vỹ vẽsỹrinhrénh nỹtĩ vã. — Gênesis 3:16-19.

3. Adão kar Eva fag vỹ Topẽ vĩ mranh mũ ti tugrĩn, ne nỹ ẽg mỹ hãn ri ke tĩ?

Adão kar Eva fag vỹ Topẽ vĩ mranh mũ, kỹ fag krẽ krẽ ag vỹ Topẽ vĩ mranh nỹtĩ gé. Topẽ Vĩ Rá vỹ ẽg mỹ ke tĩ, Adão to: “Ũn pir vỹ Topẽ vĩ mranh vén. Kỹ Topẽ vĩ mranh kã nĩ nĩ sir. Ti vĩ mranh tugrĩn tóg ter ja nĩ gé. Ũ tỹ ti vĩ mranh vén ja ẽn ri ke ẽg tỹ nỹtĩ. Topẽ vĩ mranh kãn ja ẽg tóg nĩ gé. Kỹ ẽg tóg kãgter kãn ke mũ gé, Topẽ vĩ mranh kỹ”. — Roma 5:12.

Kỹ, ẽg ne tugnĩn vẽsỹrinhrénh nỹtĩ? Kẽjẽn, ẽg tỹ nén ũ kórég kuprẽg tĩ. Ke tũg nĩn kỹ ũnꞌũ ag vỹ ẽg mỹ nén ũ vẽnh mỹ han tĩ. Kar sir, nén ũ vẽnh mỹ vỹ ẽg mỹ hãn ri ke tĩ. — Eclesiastes 9:11 le kem nĩ.

 VẼNH KANHRÃN KÃFÓR NĨ

4. Ũ nẽ ẽg mỹ vẽsỹrinhrénh han fã ti

Ũn e ag vỹ ãkrén tĩ, Topẽ tỹ Ga tỹ rĩr tĩ. Mỹ ki há mỹ hãn? Ha vé VÍDEO ti.

Tiago 1:13 kar 1 João 5:19 le kem nĩ. Kar jagnẽ mré vãmén nĩ, tag to:

• Topẽ mỹ ẽg mỹ vẽsỹrinhrénh han nĩ hẽn?

5. Ha vé ne nỹ hãn ri ke tĩ ti, Satanás vỹ Ga tỹ rĩr tĩ tugnĩn

1. Adão kar Eva fag vỹ fag ki nén ũ kórég tũ nĩ vã. Hã ra, fag tóg Satanás jẽmẽn mũ kar fag tóg Jeová kato vãsãnsãn mũ.

2.   Tag tugnĩn, vẽnh kar tỹ Topẽ vĩ mranh nỹtĩ, kar vẽnh kar tỹ vẽsỹrinhrénh kar kãgter nỹtĩ gé.

3. Jeová tỹ ẽg tỹ nén ũ kórég han ja ag tỹ tũꞌ kenh ke mũ, kar ti tỹ ẽg vẽsỹrinhrénh kar kãgter tỹ tũꞌ kenh ke gé. Vẽnh kar tỹ rĩnrĩr krỹg ja tũ venh ke mũ, Ga há ki.

6. Ẽg tỹ vẽsỹrinhrénh kỹ, Jeová vỹ ẽg to kanẽ jur tĩ

Ẽg tỹ vẽsỹrinhrénh kỹ, Topẽ mỹ ẽg to kanẽ jur nĩ hẽn? Mũ nỹ venh jé, Pãꞌi tỹ Davi kar apóstolo tỹ Pedro ne ránrán ja ti, tag to. Salmo 31:7 kar 1 Pedro 5:7 le kem nĩ. Kar jagnẽ mré vãmén nĩ, tag to:

• Vẽnh rá ag vỹ ẽg mỹ ven tĩ, Jeová vỹ ẽg vẽsỹrénh ve kỹ, ti tỹ ẽg ajũna ke sór tĩ. Ã ne tag to jykrén tĩ?

 Ã NE KANHRÃN JA TI

Vẽnh kar tỹ vẽsỹrinhrénh nỹtĩ, Satanás, Adão kar Eva ag tóg nén ũ kórég han mũ tugnĩn. Jeová vỹ ẽg to kanẽ jur tĩ, kar, kãnhmar, ti tỹ vẽsỹrénh ti tỹ tũꞌ kenh ke mũ.

Jykrinkrén mũ

• Satanás vỹ vẽnh ó tỹ ne Eva fi mỹ tó ja?

• Adão kar Eva fag vỹ Topẽ vĩ mranh mũ tugnĩn, ne nỹ ẽg mỹ hãn ri ke tĩ?

• Ẽg hã ren kỹ ki kanhrãn nỹtĩ, ẽg tỹ vẽsỹrinhrénh kỹ, Topẽ tỹ ẽg to kanẽ jur tĩ?