Mateus tỹ rá 24:1-51
24 Kỹ Jesus tóg Topẽ ĩn tá kãkutẽ kỹ tĩ mũ sir. Kỹ ti mré mũ tĩ ag tóg, ti tá junjun mũ, kỹ ag tóg ti mỹ Topẽ ĩn ẽn ag vinven mũ sir.
2 Kỹ tóg ag mỹ: “ãjag mỹ pó tỹ ĩn mág tag vigvég mũꞌ?“ he mũ. “Kejẽn pó tag tóg jagnẽ kri nỹtĩ mãn ke tũ nĩ. Gũm ke kãn jé tóg ke mũ. Ki hã sóg tó mũ,” he tóg
Ẽg jagtar ke
3 Kar kỹ tóg krĩ tỹ Oliveiras ra tĩ mũ sir. Ti tỹ tá nĩ kỹ ti mré mũ tĩ ag tóg ti mỹ: “ẽg tỹ ne ve kỹ ẽg ki kanhró nỹtĩnh mũ, ã kãtĩg mãn ke kurã ẽn ti, nén kar tũg ke kurã ẽn ti?“ he mũ.
4 Kỹ tóg: “ker ũ ãjag mỹ ón hẽꞌ,” he mũ.
5 “Cristo vỹ tỹ inh nĩ,” he jé ag tóg ke mũ, inh jiji tó kỹ, ũ tỹ hẽn ri ke ag. Kỹ ũ tỹ hẽn ri ke ag tóg ag vĩ kri nĩm ke mũ.
6 Vẽnh génh kãme mẽgmẽ jé ãjag tóg ke mũ, tag ki vẽnh génh to, kuvar há tá vẽnh génh to ke gé. Mũmẽg tũg nĩ, hã ra. Vẽnh génh enh ke vẽ. Hã ra kurã tỹ ẽgno to hã ke vẽ ver.
7 Nação ag tỹ jagnẽ kato tẽgtẽnh ke vẽ, pãꞌi ag ke gé. Ũ tỹ hẽn ri ke ag tỹ, jagnẽ to jũnh ke vẽ gé. Ga tỹ ragra ke tỹ hẽn ri ke han ke vẽ, ẽmã tỹ hẽn ri ke mĩ. Vẽjẽn tỹ tũꞌ henh ke vẽ gé.
8 Hã ra ãjag jagtar ke vẽnh ven vén vẽ ver,” he tóg.
9 “Kar kỹ ãjag jagtar ke mũ, ãjag tỹ inh ki ge kỹ nỹtĩ tugrĩn. Ãjag vóg kónãn jé ag tóg ke mũ, ãjag kãgtén jé ag tóg ke mũ gé. Nação kar vỹ, ãjag to vĩ kónãn ke mũ, ãjag tỹ inh jiji tó tugrĩn.
10 Kỹ ũ tỹ hẽn ri ke vỹ, isogvãnh ke mũ sir, ẽn kã. Ãjag mré ke fag tó jé ag tóg ke mũ, inh kato vãsãnsãn mũ ag mỹ, kỹ ag tóg jagnẽ to vĩ kónãn ke mũ gé.
11 Ón kỹ inh vĩ tó tĩ ag vỹ junjun ke mũ gé, ag tỹ ũn e krĩn jé sir, ag tỹ isogvãnh jé.
12 Kỹ vẽnh kar vỹ vẽjykre pãno han ke mũ, hã kỹ ũ tỹ ón kỹ iso há nỹtĩ ve ẽn ag tóg, isogvãnh ke mũ gé, ũn e ag.
13 Hã ra ũ tỹ isovãnh tũ pẽ ẽn ag tóg, krenkren ke mũ.
14 Kỹ nação kar vỹ, vẽnh vĩ sér ẽn mẽnh mũ, ga kar mĩ hã, kỹ ag tóg, Topẽ tỹ tỹ ẽg pãꞌi nĩnh ke ẽn mẽnh mũ. Ag tỹ mẽ kãn kỹ kurã tỹ ẽgno vẽ sir,” he tóg, Jesus ti.
Ẽg jagtar mág pẽ ti
15 “Kejẽn ãjag tóg, ãjag tỹ nén kamẽg tĩ ẽn venh ke mũ sir, ẽg kavénh tĩ ẽn ti,” he tóg. “Topẽ vĩ tó tĩ tỹ Daniel vỹ ti tó ja nĩgtĩ. Topẽ ĩn tá tóg jẽnh mũ, ẽg kavénh tĩ ẽn ti. Ũ tỹ vẽnh rá tag to ke mũ jé ki kanhró nĩ.
16 Ãjag tỹ ti ve kỹ ga tỹ Judéia ki ke kar jé, vẽnh pigjunh mũjẽg, pãnónh ra.
17 Kỹ ũ tỹ re tá nĩ ẽn jé, ti ĩn kã ra rã tũg, ti tũ mãn jé. Vẽsỹmér tóg vẽnh péjunh tĩg ke mũ.
18 Kar kỹ ũ tỹ ti japỹ tá jẽ ẽn jé, vỹn ke tũg gé, ti kur mãn jé. Vẽsỹmér tóg vẽnh péjunh tĩg ke mũ gé.
19 Ũn kufy fag jagtar mág ke vẽ, kurã ẽn kã, ũ tỹ gĩr pygfãm mũ fag ke gé.
20 Topẽ mré vĩm nĩ, ti tỹ kusa kã vẽnh ven tũ nĩ jé, ti tỹ vẽnhkán ke kurã ki vẽnh ven tũ nĩ jé.
21 Jagtar mág tỹ ge han ja tũ ẽg tóg nỹtĩ, Topẽ tỹ mundo han jãn ki. Kỹ ẽg ge han mãn ke tũ nĩ gé, kar kỹ.
22 Ẽg tỹ kurã ki jagtar ke mũ ẽn vỹ e nỹtĩnh mũ vẽ, hã ra tóg térem kỹ nỹtĩ nĩ, Topẽ tỹ ũn kuprẽg ja ẽn ag tugrĩn. Ti tỹ térem tũ nĩ ra ũ vỹ, kren ke tũ pẽ nĩ vẽ, vẽnh jagtar mág ẽn to,” he tóg, Jesus ti.
23 “Ẽn kã ũ tỹ ãjag mỹ: “Cristo vỹ tag kã jẽ nĩ,” he mũ ra kri nĩm tũg nĩ, ag tỹ: “tãtá ti jẽ,” he mũ ra.
24 Ón kỹ Cristo ag vỹ vẽnh venven ke mũ, ón kỹ Topẽ vĩ tó tĩ ag ke gé. Ẽn ag vỹ ẽg tỹ nén han vãnh hynhan ke mũ, milagre tỹ hẽn ri ke ti. Ag tỹ vẽnh kar krĩn kónãn sór vẽ, ag tỹ kygnẽ jé, Topẽ tỹ ũn kuprẽg ja ẽn ag mré hã, hẽn ri ke mũn.
25 Ãjag mỹ sóg tó kãn mũ, ti kutẽnh ke to hã,” he tóg, Jesus ti.
26 “Kejẽn ag tóg ãjag mỹ: “ẽmã kórég tá tóg jẽ, Cristo ti,” henh ke mũ. Ra ti venh mũ tũg nĩ. Ag tỹ ãjag mỹ: “ĩn kã tá tóg nĩ nĩ,” he mũ ra kri fi tũg nĩ.
27 Inh kãtĩg mãn ke vỹ, ta tỹ kóm kóm ke ri ke nĩnh mũ. Ti tỹ kóm kóm ke kỹ ẽg tóg, nén kar vég tĩ, rã jur ja tá, rã pur ja tá ke gé. Inh kãtĩg mãn ke vỹ ri ke nĩnh mũ. Tỹ sóg ẽprã ke fi kósin nĩ,” he tóg.
28 “Nén ũ ter nỹgja ri ke ti nĩ gé. Hã tá tóg vẽnh mãn tĩ, jãtã ti. Tag ri ke ti nĩnh mũ, inh kãtĩg mãn ke ti,” he tóg.
Topẽ kósin kãtĩg mãn ke
29 “Vẽnh jagtar ẽn kar kỹ rã vỹ nhyr ke mũ, kỹ kysã vỹ jẽngrẽg mãn ke tũ nĩ gé. Krĩg vỹ vár ke mũ gé, kanhkã krẽm. Ẽg tỹ kanhkã tá nén vég tũ kar ẽn vỹ ragra ke kãn mũ gé.
30 Kỹ vãhã ẽprã ke fi kósin vỹ vẽnh ven ke mũ, kanhkã tá. Kỹ ga kri mũ kar vỹ kygfỹ kãn ke mũ sir, povo kar ti, vẽnh kar tỹ inh kãtĩg ven kỹ. Kanhkã góg kã mĩ sóg kãtérenh ke mũ. Tar pẽ sóg nĩnh mũ, ha vem nĩ, kỹ inh ve vỹ kókov pẽ nĩnh mũ gé.
31 Kỹ sóg isỹ jẽgnẽ jafã ag jẽgnẽnh mũ, ag tỹ téntén kynkyn jé, kỹ ag tóg isỹ ũn kuprẽg mũ ag jé prẽnprẽr kãn ke mũ sir, ga kar mĩ hã, kanhkã fyr mĩ hã,” he tóg, Jesus ti.
Ka tỹ figueira kãme
32 “Ka tỹ figueira to jykrén nĩ. Ti pẽ tánh kỹ, ti féj tãg han kỹ ẽkré tygtánh ke kurã tóg kakó tĩ sir.
33 Ri ke ti nĩ, ãjag tỹ inh kãtĩg mãn ke kurã ki kanhró nỹtĩnh ke ti. Ãjag tỹ isỹ ãjag mỹ nén tó mũ tag ve kỹ tóg, kakó tãvĩ tĩ sir, inh kãtĩg mãn ke ti, ẽn kã.
34 Sỹ ke há vẽ, ha mẽ: ũri ũn rĩnrĩr nỹtĩ ag tỹ nén kar ẽn venh ke vẽ, ag kãgter ke to hã.
35 Kanhkã vỹ tũꞌ henh ke mũ, ga ti ke gé. Jãvo inh vĩ vỹ tũꞌ henh ke tũ nĩ,” he tóg.
Jesus kãtĩg mãn ke kurã
36 “Hã ra ũ pijé, isỹ kurã ki kãtĩg mãn ke mũ ki kanhró nĩꞌ, óra ki ke géꞌ. Topẽ tỹ jẽgnẽ jafã ag pijé ki kanhró nỹtĩꞌ. Inh pijé ki kanhró nĩ géꞌ. Ẽg jóg mág hã vỹ ti pin kỹ ki kanhró nĩꞌ, kurã kã nén kutẽnh ke mũ ẽn ki.
37 Inh kãtĩg mãn ke kurã vỹ Noé tỹ ga mĩ tĩg ja ẽn ri ke nĩnh mũ.
38 Ta kutẽnh ke to hã ag tóg jẽn ja nĩgtĩ, kron ja nĩgtĩ, jagnẽ tỹ prũg ja nĩgtĩ, jagnẽ tỹ mén ja nĩgtĩ, Noé mré ke ag. Ẽn kã Noé tóg kejẽn canoa tỹ ĩn kã ra rã mũ.
39 Hã ra tóg ag mỹ tỹ nén ũ tũ tĩ, ti tỹ canoa kã ra rã ẽn ti. Kejẽn ta tóg kutẽ mũ, kỹ goj tóg var mũ sir. Kỹ ag tóg vãhã, kãgter kãn mũ sir. Ge ti nĩnh mũ, ẽprã ke fi kósin kãtĩg mãn kỹ mỹr.
40 Ẽn kã ũn régre ag vỹ ag japỹ ki rãnhrãj ke mũ. Kỹ sóg ũn pir jé prẽr ke mũ, jãvo ti régre vỹ tá jẽnh mũ sir.
41 Kỹ ũn régre fag vỹ ẽgtynyn nỹtĩnh ke mũ, jagnẽ mré. Kỹ sóg ũn pir fi jé prẽr ke mũ, jãvo fi régre fi vỹ tá jẽnh mũ gé sir.
42 Vẽnh ki ẽmẽm nĩ, nũr ri ke han tũg nĩ. Inh kãtĩg ke óra ki kagtĩg ãjag tóg nỹtĩ. Ãjag Senhor vỹ tỹ inh nĩ,” he tóg.
43 “Kỹ tag to jykrén nĩ, ha mẽ. Ẽg pijé, ũ tỹ ẽg tỹ nén péju sór mũ kãtĩg ke ki kanhró nỹtĩꞌ. Ẽg tỹ ki kanhró nỹtĩ ra ẽg tóg, ti jo ẽg tỹ nén ki rĩr ke mũ vẽ, kỹ ũ pijé, ẽg ĩn kã ra rãnh ke mũ vẽꞌ.
44 Ge ti nĩ, ẽprã fi kósin kãtĩg mãn ke ti. Ha vẽnh kãn, ha vẽnh ki ẽmẽ. Ãjag tỹ inh kãtĩg ke to jykrén tũ ra sóg kãtĩg ke mũ,” he tóg, Jesus ti.
Camarada ag kãme
45 Kỹ tóg ag mỹ ti kãtĩg mãn ke tó mãn mũ. “Kejẽn patrão tóg hẽn ra tĩg sór mũ. Kỹ tóg ti camarada ag kã ũ kuprẽg mũ, ti tỹ ti jo ti mré camarada ag ki rĩr jé, ag mỹ vẽjẽn ven jé, vẽjẽn ke horan ki.
46 Ti tỹ ag ki rĩr há han kỹ ti patrão vỹ ti mỹ vĩ há han ke mũ, ti kãtĩg mãn ke ẽn kã.
47 Ti tỹ tóg pãꞌi han ke mũ, ti tỹ ti tũ ki rĩr kãn jé sir. Ki hã sóg tó mũ, ha mẽ.
48 Kejẽn ti camarada ũ tóg hã ra jykre pãno nĩ. Kỹ tóg: “ẽg patrão vỹ kãtĩg vãnh han mũ,” he mũ sir.
49 Kỹ tóg ti mré camarada ag vóg kónãn mũ sir, ag mrãnmrãn kỹ. Kỹ tóg ũ ag mré kron mũ gé, jẽn mág tóg mũ gé sir.
50 Hã ra ũn jykre kórég ẽn patrão vỹ, ti kãnhmỹ kãtĩg ke mũ sir, ha vem nĩ.
51 Ti kãtĩg kỹ tóg ti kapãn mũ sir, kỹ tóg ti fón ke mũ gé, ũn jykre régre ag mré. Tá ag tóg jagtar ke mũ, ag jã tỹ ag tóg gyngyn kenh mũ, jũ kỹ, ũn jykre kórég ẽn ag,” he tóg, Jesus ti. Ti tỹ ũ tỹ ti rãnhrãj han kónãn mũ kãmén hã vẽ.
