“Kumta kein ka dei ïa ki shynrang ban ieid ïa ki tnga jong ki kumba ïa ki met jong ki hi. Jar uba ieid ïa la ka jong ka tnga, u ieid ïalade hi. Namar ym ju don mynno mynno uba la isih ïa la ka jong ka met; hynrei u bsa bad u sumar ïa ka.”​—EPHESOS 5:28, 29.

U Lok u long u khlieh jong ka ïing. (Ephesos 5:23) Hynrei u lok uba bha um ju kren khor ne leh donbor. U ñiewkor ïa la ka lok, bad u pynbiang ïa ki jongdonkam jong ka. U pyrshang katba lah ban pynkmen ïa ka, bad haba ka sngewdiaw u ai mynsiem ïa ka. Um ju pyrkhat ba ka lok ka dei ban kohnguh ïa kat kaba u ong. (Philipi 2:4) U ïathuh lut ha ka ïa la ki jingsngew bad ki jingpyrkhat jong u, bad u sngap ruh haba ka kren. Um ju “bitar” ïa ka bad um ju shoh ne pynmong ïa ka.​—Kolossai 3:19.

“Ka tnga ruh to kan tieng burom ïa la u tnga.”​—EPHESOS 5:33.

Haba ka lok ka burom ïa la u lok, bad ka kyrshan ïa ki rai jong u, ka wanrah jingsuk ha ïing ha sem. Lada u leh bakla, kam ju ibeiñ ïa u, hynrei ka ïai long kaba jemnud bad ka ïai burom ïa u. (1 Petros 3:4) Haba ka donkam ban ïathuh ha u ïa ki jingeh, ka ap ïa ka por kaba biang, bad ka kren ïa u da ka jingjai jai.​—Eklesiastis 3:7.

“U briew . . . un ïaineh bad la ka tnga, bad kin ïa long ruh kawei ka doh.”​—JENESIS 2:24.

Haba u shynrang bad ka kynthei ki ïathoh shongkurim, ki pynlong ïa ka ïing ka sem ban don ka jingïadei kaba jan. Te ki shi kurim ki dei ban trei shitom ban pynkhlaiñ ïa ka jingïadei jong ki, da kaba kren naduh ka dohnud, bad da kaba leh bha iwei ïa iwei da ki kam kiba rit ba rit. Ki dei ruh ban bat skhem ïa la ka jingkular ban ym don kano kano ka jingïadei bad kiwei ha ka liang ka shongkha shongman, nalor jong ki. Ka jingshet kylla ïa la u lok ne ka lok ka pynmong bha ïa ki. Ka pynduh noh ïa ka jingshaniah bad ka lah ruh ban pynpra ïa ka ïing ka sem.​—Hebru 13:4.

“To hikai ïa u khynnah ha ka lynti ba u dei ban leit, te un ym kynriah na ka wat haba u la tymmen.”​—PROBERB 22:6.

U Blei u la ai ïa ki kmie ki kpa ïa ka kamram ban hikai ïa la ki khun. Kata ka kynthup ban hikai ïa ki kumno ban long kiba don akor, bad ban pyni ka nuksa kaba bha na ka bynta jong ki. (Deuteronomi 6:6, 7) Haba ki khun ki leh ïa kabym dei, ki kmie ki kpa kiba shemphang, kim ju kloi ban bitar. Ki long kiba kloi ban sngap, kiba suki ban kren, bad kiba suki ban bitar. (Jakob 1:19) Lada ki kmie ki kpa ki sngew ba ki donkam ban pynbeit ïa la ki khun, ki dei ban leh da ka jingieid, ym da ka jingbitar.

“Phi ki khun, to kohnguh ïa la ki kmie ki kpa . . . ‘To burom ïa la u kpa bad ïa la ka kmie.’”​—EPHESOS 6:1, 2.

Ki khun ki dei ban kohnguh ïa la ki kmie ki kpa, bad ban burom bha ïa ki. Lada ki khun ki burom ïa la ki kmie ki kpa, ki wanrah shibun ka jingkmen bad jingsuk ha ka ïing ka sem. Ki khun kiba la heh la san ki burom ïa la ki kmie ki kpa da kaba ki phikir bad sumar bha ïa ki. Kata lehse ka lah ban kynthup ban pynbha ïa ka ïing jong ki ne ban pyndap pynbiang ïa ki jingdonkam jong ki.​—1 Timothi 5:3, 4.