Irma aikaraga Njĩrĩmani, na arĩ na hakuhĩ mĩaka 90. Thutha wa kũgwa ũũru maita merĩ na gũthĩnjwo maita maigana ũna, rĩu ndahotaga kũhunjia nyũmba kwa nyũmba ta ũrĩa eekaga tene. Rĩu Irma eraga andũ a famĩlĩ yao na arĩa oyaine nao ũhoro wĩgiĩ wĩtĩkio wake na njĩra ya kũmaandĩkĩra marũa. Marũa ma Irma ma gwĩkĩra ngoro na kũũmanĩrĩria nĩ mamũkagĩrũo wega ũũ atĩ kaingĩ andũ nĩ mamũhũũragĩra thimũ kũmũũria rĩrĩa akaamaandĩkĩra marũa mangĩ. Ningĩ nĩ amũkagĩra marũa ma andũ aingĩ makĩmũcokeria ngatho na makĩmũũria amaandĩkĩre rĩngĩ. Irma ooigire ũũ: “Maũndũ macio mothe nĩ matũmaga ngorũo na gĩkeno na makandeithia thiĩ na mbere gũkorũo na kĩyo maũndũ-inĩ ma kĩĩroho.”

 Ningĩ Irma nĩ atũmaga marũa mĩciĩ-inĩ ya kũrũmbũiya andũ akũrũ. Ooigire ũũ: “Mũtumia ũmwe mũkũrũ nĩ aahũũrĩire thimũ akĩnjĩra atĩ marũa marĩa ndaamũtũmĩire mũthuri wake akua nĩ maamũũmĩrĩirie mũno. Aigaga marũa macio Bibilia-inĩ yake na nĩ amathomaga kaingĩ hwaĩ-inĩ. Mũtumia ũngĩ wĩrĩga gũkuĩrũo nĩ mũthuri wake ooigire atĩ marũa makwa maamũteithirie gũkĩra mĩario ya mũhunjia wao. Aarĩ na ciũria nyingĩ eendaga gũcokerio na kwoguo akĩnjũria kana no anjeerere.”

 Mũtumia ũngĩ ũtaarĩ Mũira wa Jehova mooyaine na Irma wathamĩire kũndũ kũraihu nĩ ooririe Irma kana no amwandĩkagĩre marũa. Irma ooigire, “Mũtumia ũcio aaigaga marũa makwa mothe. Rĩrĩa aakuire, mũirĩtu wake nĩ aahũũrĩire thimũ. Aanjĩrire atĩ nĩ aathomete marũa mothe marĩa ndandĩkĩire nyina na akĩnjũria kana o nake no ndĩmwandĩkagĩre marũa marĩ na ũhoro wa Bibilia.”

 Irma nĩ akenagĩra ũtungata wake biũ. Ooigire ũũ: “Thaithaga Jehova athiĩ na mbere kũhe hinya wa kũmũtungatĩra. O na gũtuĩka rĩu ndihotaga gũthiĩ nyũmba kwa nyũmba, njĩkaga ũrĩa ingĩhota.”