Ndaciarĩirũo Montreal, taũni ĩrĩa nene thĩinĩ wa gĩcigo gĩa Quebec, Canada. Twarerirũo tũrĩ ciana inya nĩ aciari maatwendete thĩinĩ wa gĩcagi gĩthaka kĩa Rosemont. Twatũũraga ũtũũro mũhooreru na wa thayũ tũrĩ hamwe.

 Ndĩ kamwana, nĩ ndendete gũthoma Bibilia. Nĩ ndĩraririkana ndĩ na mĩaka 12, ngĩthoma thĩinĩ wa Kĩrĩkanĩro Kĩrĩa Kĩerũ ũhoro wĩgiĩ ũtũũro wa Jesu na ngĩkenera mũno. Nĩ ndendaga kũhaana take nĩ ũndũ wa kũhutio nĩ wendo na ũcayanĩri wake harĩ andũ arĩa angĩ. Ũndũ wa kĩeha nĩ atĩ, wendi ũcio nĩ wathirire o ũrĩa ndanenehaga na ngĩambĩrĩria kũnyitanĩra na andũ oru.

 Baba nĩ aahuuhaga karumbeta getagwo saxophone, na nĩ aaheire karumbeta kau na ningĩ agĩtũma nyende nyĩmbo nginya igĩtuĩka ũndũ ũrĩa mũnene ũtũũro-inĩ wakwa. Nĩ ndakenagio mũno nĩ nyĩmbo nginya thutha wa kahinda kanini ngĩĩruta gũthaaka ngita. Thutha wa ihinda nĩ ndathondekire gĩkundi gĩa kũina hamwe na arata maigana ũna, na nĩ twathiaga kũina kũndũ gũtiganĩte. Andũ amwe arĩa moĩkaine mũno harĩ gũthondeka nyĩmbo nĩ moonire ũhoti wakwa na makĩnjĩra atĩ nĩ mekũndeithĩrĩria. Tũkĩandĩkanĩra kandarathi na kambuni ĩmwe nene ya kũrekondi nyĩmbo. Nyĩmbo ciakwa nĩ ciagĩire ngumo mũno na nĩ ciathaakagwo kaingĩ redio-inĩ thĩinĩ wa Quebec.

 Ndonekaga ta ndarĩ na kĩrĩa gĩothe ingĩerĩgĩrĩire. Ndarĩ mũndũ mwĩthĩ na nĩ ndarĩ na igweta, na nĩ ndonaga mbeca nyingĩ kuumana na gwĩka ũndũ ũrĩa ndendete. Mũthenya nĩ ndathiaga kũndũ gwa kwĩmenyeria, ngahoywo ũhoro, ngandĩkĩra andũ thaĩri yakwa, na ngaria TV-inĩ. Narĩo ũtukũ ndathiaga kũinĩra andũ na ndĩa-inĩ. Nĩguo ngĩe na ũmĩrĩru wa gũkorũo kĩrĩndĩ-inĩ, nĩ ndambĩrĩirie kũnyua njohi ndĩ o mwĩthĩ ngĩcoka ngĩambĩrĩria kũhũthĩra ndawa cia kũrebia. Ningĩ ndatũũraga mũtũũrĩre mũũru na wa waganu.

 Andũ amwe nĩ meeriragĩria mũtũũrĩre wakwa tondũ ndonekaga ta ndarĩ na gĩkeno. No thĩinĩ wakwa, ndaiguaga itarĩ kĩene, makĩria rĩrĩa ndĩ nyiki. Ndaiguaga thuthĩkĩte ngoro na ndĩ na mĩtangĩko. Ũndũ wa kĩeha nĩ atĩ, hĩndĩ ĩrĩa ndagaacĩrĩte mũno, andũ erĩ arĩa maandutagĩra nyĩmbo nĩ maakuire kuumana na mũrimũ wa mũkingo. Nĩ ndamakire mũno! O na gũtuĩka nĩ ndendete ũini, mũtũũrĩre ũrĩa woimanaga naguo nĩ wanjiguithagia ũũru.

 O na gũtuĩka nĩ ndagaacĩrĩte, nĩ ndamenyaga atĩ harĩ ũndũ warĩ mũhĩtanu mũno thĩinĩ wa thĩ. Nĩ kĩĩ gĩtũmĩte gũkorũo na wagi mũingĩ ũguo wa kĩhooto? Nĩ ndeyũragia kĩrĩa gĩtũmĩte Ngai age kuoya ikinya. O na nĩ ndahoyaga Ngai kaingĩ nĩguo nyone macokio ma ciũria icio. Hĩndĩ ĩmwe hurũkĩte kuumana na thabarĩ ciakwa, nĩ ndambĩrĩirie gũthoma Bibilia rĩngĩ. O na gũtuĩka ndiataũkagĩrũo nĩ maũndũ maingĩ marĩa ndathomaga, nĩ ndonire atĩ no mũhaka akorũo ithirĩro rĩa thĩ rĩrĩ hakuhĩ.

 Ngĩthoma Bibilia, nĩ ndonire atĩ hĩndĩ ĩmwe Jesu nĩ eehingire kũrĩa arĩ werũ-inĩ ihinda rĩa thikũ 40. (Mathayo 4:1, 2) Ngĩciria atĩ o na niĩ ingĩekire ũguo, no kũhoteke Ngai nĩ angĩeguũririe harĩ niĩ, na kwoguo ngĩtua mũthenya wa kwambĩrĩria. Ciumia igĩrĩ itanambĩrĩria kwĩhinga, Aira a Jehova erĩ nĩ maaringaringire mũrango wakwa, na ngĩmanyita ũgeni nyũmba thĩinĩ ta ndamerĩgĩrĩire. Ngĩrora ũmwe wao wetagwo Jacques maitho-inĩ ngĩmũũria, “Tũngĩmenya atĩa atĩ tũratũũra matukũ-inĩ ma kũrigĩrĩria ma thĩ ĩno?” Nake akĩhingũra Bibilia yake na agĩthomera 2 Timotheo 3:1-5. Nĩ ndamoririe ciũria ingĩ nyingĩ na nĩ ndakenirio mũno nĩ macokio mao mega marĩa maatũmire njiganĩre, na mothe mooimaga Maandĩko-inĩ. Thutha wao kũnjeerera maita maigana ũna, ngĩona atĩ hatiarĩ na bata wa kwĩhinga.

 Ngĩambĩrĩria kwĩruta Bibilia hamwe na Aira a Jehova itegũtĩrĩria. Mũthia-inĩ, ngĩenja njuĩrĩ ndaihu ĩrĩa ndarĩ nayo na ngĩambĩrĩria gũthiaga mĩcemanio yothe thĩinĩ wa Nyũmba ya Ũthamaki. Ũrĩa ndanyitirũo ũgeni na njĩra ya wendo ndathiĩ mĩcemanio nĩ watũmire ngĩe na ma biũ atĩ nĩ ndonete ũhoro wa ma.

 Hatarĩ nganja, nĩguo hũthĩre maũndũ marĩa nderutaga thĩinĩ wa Bibilia, nĩ ndabataraga gwĩka mogarũrũku manene mũtũũrĩre-inĩ wakwa. Ũndũ ũmwe nĩ atĩ, nĩ ndabataraga gũtigana na ndawa cia kũrebia na mũtũũrĩre wakwa wa waganu. Ningĩ nĩ ndabataraga kũgarũrĩra mwerekera wakwa wa mwĩyendo na nyambĩrĩrie kũrũmbũiya andũ arĩa angĩ makĩria. Ndĩ mũciari ũmwe, no mũhaka ingĩerutire kũrũmbũiya mabataro ma ngoro na ma kĩĩroho ma ciana ciakwa igĩrĩ. Nĩ ũndũ ũcio, ngĩtigana na wĩra wakwa wa ũini na ngĩambĩrĩria kũruta wĩra warĩ na mũcara mũnini thĩinĩ wa kĩganda.

 Gwĩka mogarũrũku macio mothe gũtiarĩ ũndũ mũhũthũ. Rĩrĩa nderutanagĩria gũtiga ndawa cia kũrebia, nĩ ndagĩire na mathĩna ma mwĩrĩ marĩa moimanaga na gũtiga ndawa icio, na nĩ ndacicokereire maita maigana ũna. (Aroma 7:19, 21-24) Gũtigana na mũtũũrĩre wakwa wa waganu kwarĩ ũndũ mũritũ o na makĩria. Ningĩ wĩra ũrĩa ndarutaga warĩ mũritũ mũno, na mũcara mũnini ũrĩa ndaheagwo nĩ watũmaga njigue nguĩte ngoro. Ndahũthagĩra mĩeri ĩtatũ gũthũkũma mbeca iria ndathũkũmaga na mathaa merĩ tu ndĩ mũini.

 Mahoya nĩ maandeithirie gũthiĩ na mbere gwĩka mogarũrũku macio maritũ. Ningĩ nĩ ndonire atĩ gũthomaga Bibilia itegũtĩrĩria kwarĩ kwa bata mũno. Nĩ harĩ mĩhari ya Bibilia yanjĩkĩrire ngoro mũno. Mũhari ũmwe nĩ 2 Akorintho 7:1, ũrĩa wĩkĩraga Akristiano ngoro ‘metherie ũndũ o wothe ũrĩa ũngĩmathahia mwĩrĩ na roho.’ Rĩandĩko rĩngĩ rĩaheire ũũma atĩ nĩ ingĩahotire gũtigana na mĩtugo yakwa mĩũru nĩ Afilipi 4:13, rĩrĩa riugaga ũũ: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.” Jehova Ngai nĩ aacokirie mahoya makwa na mũthia-inĩ akĩndeithia gũtaũkĩrũo na kũhũthĩra ma ya Bibilia. Ũndũ ũcio nĩ wanjĩkĩrire ngoro ndĩmwĩyamũrĩre. (1 Petero 4:1, 2) Ndabatithirio mwaka wa 1997 ngĩtuĩka Mũira wa Jehova.

 Ndĩ na ma atĩ korũo nĩ ndathiire na mbere na mũtũũrĩre wakwa wa hau kabere, ingĩrĩ mũkuũ. No rĩu nĩ ngoragwo na ũtũũro ũrĩ na gĩkeno mũno! Mũtumia wakwa, Elvie, akoretwo arĩ kĩrathimo kĩnene mũno. Tũrĩ hamwe nake, nĩ tũkenagĩra kũruta andũ Bibilia tũrĩ ndungata cia mahinda mothe. Ũndũ ũcio nĩ ũndehagĩra gĩkeno kĩnene na ũgatũma njiganĩre. Nĩ njokagĩria Jehova ngatho mũno nĩ ũndũ wa kũngucĩrĩria harĩ we.​—Johana 6:44.