Samueli wa Mbere 1:1-28
1 Na rĩrĩ, nĩ kwarĩ na mũndũ wa kuuma Ramathaimu-zofimu*+ gĩcigo-inĩ kĩrĩa kĩrĩ irĩma kĩa Efiraimu+ wetagwo Elikana,+ mũrũ wa Jerohamu, mũrũ wa Elihu, mũrũ wa Tohu, mũrũ wa Zufi, Mũefiraimu.
2 Aarĩ na atumia erĩ; ũmwe eetagwo Hana, nake ũcio ũngĩ eetagwo Penina. Penina nĩ aarĩ na ciana, no Hana ndaarĩ na ciana.
3 Mũndũ ũcio nĩ aambataga kuuma itũũra-inĩ rĩake o mwaka o mwaka agathiĩ Shilo gũthathaiya* na kũrutĩra Jehova mũnene wa ita igongona.+ Na kũu nĩkuo ariũ erĩ a Eli, Hofini na Finehasi,+ maatungatagĩra Jehova marĩ athĩnjĩri-Ngai.+
4 Mũthenya ũmwe rĩrĩa Elikana aarutire igongona, nĩ aaheire mũtumia wake Penina o hamwe na ariũ ake na aarĩ ake othe icunjĩ cia igongona rĩu,+
5 no akĩhe Hana gĩcunjĩ kĩmwe kĩa mwanya tondũ Hana nĩwe eendete mũno; ĩndĩ Jehova ndaaheete Hana ciana.*
6 Ningĩ mũiruwe aaikaraga akĩmũnyũrũragia nĩguo amũtuurithie tondũ Jehova ndaamũheete ciana.
7 Ũguo nĩguo eekaga o mwaka o mwaka; rĩrĩa rĩothe Hana aambataga agathiĩ nyũmba-inĩ ya Jehova,+ mũiruwe aamũnyũrũragia mũno nginya akarĩra na akaga kũrĩa irio.
8 No mũthuriwe Elikana akĩmũũria atĩrĩ: “Hana, ũrarĩra nĩkĩ, na ũraaga kũrĩa irio nĩkĩ, na nĩ kĩĩ kĩratũma ũkorũo na kĩeha ũguo?* Na githĩ niĩ ndikĩrĩte ariũ ikũmi harĩ wee?”
9 Na rĩrĩ, rĩrĩa maarĩkirie kũrĩa na kũnyua marĩ kũu Shilo, Hana agĩũkĩra. Hĩndĩ ĩyo, Eli mũthĩnjĩri-Ngai aaikarĩte thĩ gĩtĩ-inĩ hakuhĩ na gĩtugĩ kĩa mũrango wa hekarũ*+ ya Jehova.
10 Hana aarĩ na marũrũ maingĩ mũno, na akĩambĩrĩria kũhoya Jehova+ akĩrĩraga ategũtigithĩria.
11 Akĩĩhĩta mwĩhĩtwa ũyũ: “Wee Jehova mũnene wa ita, ũngĩtĩkĩra kũrora thĩna ũyũ wa ndungata yaku na ũndirikane na wage kũriganĩrũo nĩ ndungata yaku na ũhe ndungata yaku mwana wa kahĩĩ,+ nĩ ngaamũneana kũrĩ Jehova matukũ mothe ma ũtũũro wake, na rwenji rũtikahutia mũtwe wake.”+
12 Na hĩndĩ ĩyo Hana aahoyaga ihinda iraya arĩ mbere ya Jehova, Eli aaikarĩte amũrorete kanua.
13 Hana aaragia na ngoro, iromo ciake nocio tu ciainainaga no mũgambo wake ndwaiguĩkaga. Nĩ ũndũ ũcio Eli agĩĩciria atĩ Hana nĩ kũrĩĩo arĩĩtwo.
14 Eli agĩkĩmwĩra atĩrĩ: “Ũgũikara ũrĩ mũrĩĩu nginya rĩ? Tiga kũnyua ndibei ĩyo yaku.”
15 Nake Hana akĩmũcokeria ũũ: “Aca mwathi wakwa, niĩ ndĩ mũtumia ũrĩ na mĩtangĩko mĩnene;* ti kũnyua nyuĩte ndibei kana kĩndũ kĩngĩ o gĩothe kĩngĩtũma mũndũ arĩĩo, no nĩ ngoro* yakwa ndĩraitũrũra mbere ya Jehova.+
16 Ndũkone ndungata yaku ta arĩ mũtumia ũtarĩ kĩene, tondũ nĩ kwaria ndĩraria nginyagia rĩu ndĩ na ruo rũingĩ na mĩtangĩko.”
17 Nake Eli akĩmwĩra ũũ: “Thiĩ na thayũ, na Ngai wa Isiraeli arohingia ũndũ ũrĩa wamũhoya.”+
18 Nĩ ũndũ ũcio Hana akĩmwĩra atĩrĩ: “Reke ndungata yaku ĩtĩkĩrĩke maitho-inĩ maku.” Na mũtumia ũcio agĩĩthiĩra na akĩrĩa irio, na ndaacokire gũtuka gĩthiithi rĩngĩ.
19 Magĩcoka magĩũkĩra rũcinĩ tene makĩinamĩrĩra mbere ya Jehova, thutha ũcio magĩcoka kwao mũciĩ kũu Rama.+ Elikana agĩkoma na mũtumia wake Hana, nake Jehova akĩririkana Hana.+
20 Ihinda-inĩ rĩa mwaka ũmwe* Hana akĩgĩa nda na agĩciara kahĩĩ, agĩgeta+ Samueli,* tondũ ooigire atĩrĩ, “nĩ gũkahoya ndakahoire harĩ Jehova.”
21 Thutha wa ihinda Elikana akĩambata hamwe na andũ othe a nyũmba yake nĩguo akarutĩre Jehova+ igongona rĩa o mwaka na akarute igongona rĩake rĩa mwĩhĩtwa.
22 No Hana ndaathiire,+ nĩ gũkorũo eerire mũthuriwe atĩrĩ: “Rĩrĩa kahĩĩ gaka gagaatigithio kuonga-rĩ, nĩrĩo ngaagatwara; nako karũgame mbere ya Jehova na gatũũre kuo kuuma hĩndĩ ĩyo gũthiĩ na mbere.”+
23 Nake mũthuriwe Elikana akĩmwĩra ũũ: “Ĩka ũrĩa ũkuona arĩ wega.* Ikara gũkũ mũciĩ o nginya rĩrĩa ũgaagatigithia kuonga. Jehova arohingia ũguo woiga.” Kwoguo mũtumia ũcio agĩikara kũu mũciĩ agĩkarera o nginya rĩrĩa aagatigithirie kuonga.
24 Na rĩrĩa aagatigithirie kuonga, agĩgatwara Shilo, hamwe na ndegwa ya mĩaka ĩtatũ, eba ĩmwe* ya mũtu, na ndigithũ ĩmwe nene ya ndibei,+ agĩgĩkinya nyũmba-inĩ ya Jehova kũu Shilo+ arĩ hamwe na kahĩĩ kau.
25 Magĩcoka magĩthĩnja ndegwa ĩyo na magĩtwara kahĩĩ kau kũrĩ Eli.
26 Nĩ ũndũ ũcio Hana akĩmwĩra ũũ: “Atĩrĩrĩ mwathi wakwa, o ta ũrĩa ũtũũraga muoyo wee mwathi wakwa, niĩ nĩ niĩ mũtumia ũrĩa warũgamĩte haha nawe ngĩhoya Jehova.+
27 Kahĩĩ gaka nĩko ndahoyaga heo, na Jehova akĩhingia ũrĩa ndamũhoete.+
28 Na rĩu na niĩ nĩ ndakaheana* kũrĩ Jehova. Matukũ-inĩ mako mothe, ndakaheana kũrĩ Jehova.”
Nake* akĩinamĩrĩra hau mbere ya Jehova.
Tũũhoro twa magũrũ-inĩ
^ Kana “wa kuuma Rama, Mũzufi.”
^ Kana “kũinamĩrĩra.”
^ Ũkk., “nĩ aahingĩte nda ya Hana.”
^ Kana “nĩ kĩĩ kĩratũma ũigue ũũru ngoro?”
^ Hekarũ ĩyo nĩ gĩikaro kĩrĩa kĩamũre.
^ Kĩhibirania, ne′phesh. Rora Ũthathaũri wa Ciugo.
^ Kana “mũtumia ũthuthĩkĩte roho.”
^ Kana hihi, “Thutha wa ihinda.”
^ Rĩĩtwa rĩu riugĩte “Rĩĩtwa rĩa Ngai.”
^ Ũkk., “ũrĩa ũkuona kwagĩrĩire maitho-inĩ maku.”
^ Kĩndũ ta lita 22. Rora Ũhoro Muongerere B14.
^ Ũkk., “nĩ ndagakombithia.”
^ No kũhoteke nĩ Elikana.
