Kũrĩ Aroma 7:1-25
7 Ariũ a Ithe witũ, hihi no mũkorũo mũtoĩ (tondũ ndĩrarĩria andũ moĩ watho) atĩ Watho ũtũũraga wathaga mũndũ rĩrĩa rĩothe arĩ muoyo?
2 Kwa ngerekano, mũtumia mũhiku akoragwo ohetwo nĩ watho harĩ mũthuri wake rĩrĩa rĩothe mũthuri wake arĩ muoyo; no mũthuri wake angĩkua, nĩ ohoragwo kuuma harĩ watho wa mũthuri wake.+
3 Gũkĩrĩ ũguo-rĩ, mũtumia ũcio angĩtuĩka wa mũthuri ũngĩ mũthuri wake arĩ muoyo, angĩkorũo arĩ mũtharia.+ No mũthuri wake angĩkua, mũtumia ũcio nĩ muohore kuuma harĩ watho ũcio wake, kwoguo ndangĩkorũo arĩ mũtharia angĩtuĩka wa mũthuri ũngĩ.+
4 Nĩ ũndũ ũcio ariũ a Ithe witũ, o na inyuĩ nĩ mwakuire ũhoro-inĩ wĩgiĩ Watho kũgerera mwĩrĩ wa Kristo, nĩgetha mũtuĩke a mũndũ ũngĩ,+ ũrĩa wariũkirio kuuma kũrĩ arĩa akuũ,+ nĩguo tũciarage maciaro magĩrĩire Ngai.+
5 Nĩ gũkorũo hĩndĩ ĩrĩa twatũũraga kũringana na mwĩrĩ, merirĩria ma mehia marĩa maarahũrirũo nĩ Watho nĩ maarutaga wĩra mĩĩrĩ-inĩ itũ,* magaciaraga maciaro ma gĩkuũ.+
6 No rĩu nĩ tuohoretwo kuuma harĩ Watho,+ tondũ nĩ tũkuĩte ũndũ-inĩ ũrĩa watũgiragĩrĩria, nĩguo tũtuĩke ngombo na njĩra njerũ kũgerera roho+ no ti na njĩra ĩrĩa ya tene ya watho ũrĩa mwandĩke.+
7 Nĩ ũndũ ũcio-rĩ, tũkiuge atĩa? Hihi Watho nĩ mehia? Aca o na hanini! Tiga nĩ Watho ndingĩamenyire mehia.+ Kwa ngerekano-rĩ, ndingĩamenyire ũhoro wa gũcumĩkĩra korũo Watho ndwoigĩte: “Ndũkanacumĩkĩre.”+
8 No mehia, nĩ ũndũ wa mweke ũrĩa woimĩririo nĩ rĩathani, nĩ maatũmire ngĩe na mĩthemba yothe ya gũcumĩkĩra thĩinĩ wakwa, tondũ hatarĩ watho mehia maarĩ makuũ.+
9 Ma nĩ atĩ, nĩ harĩ hĩndĩ ndarĩ muoyo hatarĩ watho. No rĩrĩa rĩathani rĩokire, mehia magĩcoka muoyo, ĩndĩ niĩ ngĩkua.+
10 Na rĩathani rĩrĩa rĩarĩ rĩtongorie muoyo-inĩ,+ ngĩona rĩratongoria gĩkuũ-inĩ.
11 Nĩ gũkorũo mehia, nĩ ũndũ wa mweke ũrĩa woimĩririo nĩ rĩathani, nĩ maaheenereirie na makĩnjũraga kũgerera harĩ rĩo.
12 Kwoguo Watho guo mwene nĩ mũtheru, narĩo rĩathani nĩ itheru na nĩ rĩa ũthingu na nĩ rĩega.+
13 Hakĩrĩ ũguo-rĩ, hihi ũndũ ũrĩa mwega nĩguo wandeheire gĩkuũ? Aca o na hanini! No mehia nĩmo maandeheire gĩkuũ nĩguo kuoneke atĩ mehia nĩmo maarehaga gĩkuũ thĩinĩ wakwa kũgerera ũndũ ũrĩa mwega,+ nĩguo kũgerera rĩathani mehia matuĩke mehia kũna.+
14 Tondũ nĩ tũĩ atĩ Watho nĩ wa kĩĩroho, ĩndĩ niĩ ndĩ wa kĩĩmwĩrĩ, ngendio rungu rwa mehia.+
15 Nĩ gũkorũo nditaũkagĩrũo nĩ maũndũ marĩa njĩkaga. Tondũ ndiĩkaga maũndũ marĩa nyendaga, no njĩkaga marĩa thũire.
16 No rĩrĩ, angĩkorũo njĩkaga maũndũ marĩa itarenda, nĩ ndĩretĩkĩra atĩ Watho nĩ mwega.
17 No rĩu ti niĩ ndĩmekaga, ĩndĩ nĩ mehia marĩa maikaraga thĩinĩ wakwa.+
18 Tondũ nĩ njũĩ atĩ thĩinĩ wakwa, ũguo nĩ kuuga thĩinĩ wa mwĩrĩ wakwa, gũtirĩ ũndũ o na ũmwe mwega ũikaraga kuo; nĩ gũkorũo nĩ ndĩriragĩria gwĩka ũndũ ũrĩa mwega no ndikoragwo na ũhoti wa kũwĩka.+
19 Tondũ ndiĩkaga ũndũ ũrĩa mwega nyendaga gwĩka, no njĩkaga ũndũ ũrĩa mũũru itendaga gwĩka.
20 Nĩ ũndũ ũcio, angĩkorũo njĩkaga ũndũ ũrĩa itendaga gwĩka-rĩ, ti niĩ ngoragwo ngĩwĩka, ĩndĩ nĩ mehia marĩa maikaraga thĩinĩ wakwa.
21 Nĩ ũndũ ũcio, nyonaga watho ũyũ ũhoro-inĩ wakwa: Rĩrĩa ndĩrenda gwĩka ũndũ ũrĩa wagĩrĩire, ũndũ ũrĩa mũũru ũkoragwo hamwe na niĩ.+
22 Nĩ ngenagĩra mũno watho wa Ngai kũringana na mũndũ wakwa wa na thĩinĩ,+
23 no nĩ nyonaga watho ũngĩ thĩinĩ wa mwĩrĩ wakwa* ũkĩrũa na watho wa meciria makwa+ na ũkandongoria ta mũndũ mũnyite mĩgwate harĩ watho wa mehia+ ũrĩa ũrĩ thĩinĩ wa mwĩrĩ wakwa.*
24 Kaĩ ndĩ na thĩna-ĩ! Nũũ ũkũũhonokia kuuma harĩ mwĩrĩ ũrĩa ũrehaga gĩkuũ gĩkĩ?
25 Ndĩracokeria Ngai ngatho kũgerera harĩ Jesu Kristo Mwathani witũ! Nĩ ũndũ ũcio-rĩ, meciria-inĩ makwa niĩ mwene ndĩ ngombo ya watho wa Ngai, ĩndĩ mwĩrĩ-inĩ wakwa ndĩ ngombo ya watho wa mehia.+
