Isaia 59:1-21
59 Atĩrĩrĩ, guoko kwa Jehova ti gũkuhĩ gũkaremwo nĩ kũhonokania,+Kana gũtũ gwake gũkahingĩka* gũkaaga kũigua.+
2 Aca, mahĩtia manyu inyuĩ ene nĩmo mamwamũranĩtie na Ngai wanyu.+
Mehia manyu nĩmo matũmĩte amũhithe ũthiũ wake,Na akarega kũmũigua.+
3 Tondũ moko manyu nĩ mathahĩtio nĩ thakame+Nacio ciara cianyu igathahio nĩ mahĩtia.
Mĩromo yanyu yaragia ndeto cia maheeni,+ naruo rũrĩmĩ rwanyu rũkang’ung’ua ndeto itarĩ cia ũthingu.
4 Gũtirĩ mũndũ wanagĩrĩra ageeta ũthingu,+Na gũtirĩ mũndũ ũthiaga igooti-inĩ arĩ na ũhoro wa ma.
Mehokaga maũndũ matarĩ kĩene*+ na makaria maũndũ ma tũhũ.
Mohaga nda ya thĩna na magaciara maũndũ moru.+
5 Matũrĩkagia matumbĩ ma nyoka ĩrĩ thumu,Na magatuma rũrenda rwa mbũmbũĩ.+
Mũndũ ũrĩa ũngĩrĩa matumbĩ ma cio no gũkua angĩkua,Na itumbĩ rĩrĩa rĩatũrĩkio riumaga nyoka ĩrĩ thumu.
6 Rũrenda rwao rũtingĩhũthĩka ta nguo,O na kana mehumbĩre na kĩrĩa mathondekete.+
Wĩra wao nĩ mũũru,Na ciĩko cia ũhinya nĩcio irĩ moko-inĩ mao.+
7 Magũrũ mao mateng’eraga gwĩka ũũru,Na mahiũhaga nĩguo magaite thakame ĩtarĩ na mahĩtia.+
Meciria mao nĩ meciria moru;Njĩra ciao ikoragwo na mwanangĩko na kĩeha.+
8 Matimenyete njĩra ya thayũ,Na njĩra-inĩ ciao gũtikoragwo na kĩhooto.+
Mogomagia njĩra ciao;Gũtirĩ mũndũ ũgeraga thĩinĩ wacio ũkaamenya ũhoro wa thayũ.+
9 Nĩkĩo kĩhooto gĩkoragwo kũraihu mũno na ithuĩ,Na ũthingu ndũtũkinyagĩra.
Tũikaraga twĩrĩgĩrĩire ũtheri, no atĩrĩ, nduma nĩyo ĩkoragwo kuo;Tũikaraga twĩrĩgĩrĩire ũtheri, no tũthiaga na mbere kũgerera nduma-inĩ.+
10 Tũhambataga tũgĩetha rũthingo ta andũ atumumu;O ta andũ matarĩ maitho tũikaraga tũkĩhambataga.+
Tũhĩngagwo hĩndĩ ya mĩaraho o ta hwaĩ-inĩ kũrĩ na nduma;Tũrĩ gatagatĩ-inĩ ka arĩa marĩ hinya tũkoragwo tũhaana o ta andũ akuũ.
11 Ithuothe tũikaraga tũkĩraramaga o ta ndubaNa kũrĩra na kamũgambo gaceke ta ndutura.
Twĩrĩgagĩrĩra kĩhooto, no tũtikĩonaga;Tũkerĩgĩrĩra ũhonokio, no ũkoragwo haraihu mũno na ithuĩ.
12 Tondũ ũremi witũ nĩ mũingĩ mũno mbere yaku;+Mehia maitũ nĩ marutaga ũira ũtwĩgiĩ.+
Nĩ gũkorũo ũremi witũ ũrĩ hamwe na ithuĩ;Na nĩ tũĩ wega mahĩtia maitũ.+
13 Nĩ twĩhĩtie na tũgakaana Jehova;Nĩ tũhũgũkĩire Ngai witũ.
Nĩ twarĩtie ndeto cia kũhinyanĩrĩria na cia ũremi;+Tũkoha nda ya maheeni na tũkang’ung’ua ciugo cia maheeni ngoro-inĩ.+
14 Kĩhooto nĩ kĩgirĩrĩirio,+Naguo ũthingu ũkarũgama handũ haraihu;+Tondũ ũhoro wa ma* nĩ ũhĩngĩtwo kĩhaaro-inĩ kĩa mũingĩ,Na ũndũ ũrĩa mũrũngĩrĩru ũkaremwo kũingĩra.
15 Ũhoro wa ma* nĩ ũthirĩte biũ,+Na mũndũ ũrĩa wĩthemaga ũũru nĩ atahĩtwo.
Jehova nĩ oonire ũndũ ũcio na akĩigua ũũru,*Tondũ gũtiarĩ na kĩhooto.+
16 Akĩona atĩ gũtiarĩ na mũndũ,Na akĩmaka tondũ gũtiarĩ na mũndũ wa gũtuithania,Kwoguo guoko gwake we mwene gũkĩrehe ũhonokio,*Na ũthingu wake we mwene ũkĩmũtiirĩrĩra.
17 Agĩcoka akĩĩhumba ũthingu o ta kagooti ga cuma*Na ngũbia ya ũhonokio* akĩmĩkĩra mũtwe-inĩ wake.+
Akĩĩhumba nguo cia kũrĩhanĩria ikorũo irĩ nguo ciake+Na akĩĩhumba kĩyo o ta kagooti.*
18 Akaamarĩha kũringana na maũndũ marĩa mekĩte:+
Arĩa mamũkararagia amarĩhe na marakara, thũ ciake acirĩhe na gũciherithia.+
Nacio icigĩrĩra nĩ agaacirĩha irĩhi rĩacio.
19 Kuuma ithũĩro nĩ mageetigĩra rĩĩtwa rĩa Jehova
Na kuuma irathĩro metigĩre riri wake,Nĩ gũkorũo agooka o ta rũũĩ rũratherera na ihenya,Rũrĩa rũtindĩkagwo nĩ roho wa Jehova.
20 “Mũkũũri+ nĩ agooka Zayuni,+Oke kũrĩ njiarũa cia Jakubu iria itiganĩte na mehia,”+ ũguo nĩguo Jehova oigĩte.
21 “Ha ũhoro wakwa-rĩ, gĩkĩ nĩkĩo kĩrĩkanĩro gĩakwa hamwe nao,”+ ũguo nĩguo Jehova oigĩte. “Roho wakwa ũrĩa ũrĩ igũrũ rĩaku o na ciugo ciakwa iria njĩkĩrĩte kanua-inĩ gaku—itikeeherio kanua-inĩ gaku, kanua-inĩ ga ciana ciaku,* kana kanua-inĩ ga ciana cia ciana ciaku,* kuuma rĩu nginya tene na tene,” ũguo nĩguo Jehova oigĩte.
Tũũhoro twa magũrũ-inĩ
^ Ũkk., “gũkaritũha.”
^ Kana “kĩndũ hatarĩ.”
^ Kana “wĩhokeku.”
^ Kana “wĩhokeku.”
^ Ũkk., “na warĩ mũũru maitho-inĩ make.”
^ Kana “ũhootani harĩ we.”
^ Kana “kagooti gatarĩ moko.”
^ Kana “ũhootani.”
^ Nĩ kagooti geekĩragwo ga kwĩgitĩra mbaara-inĩ.
^ Ũkk., “ka mbeũ yaku.”
^ Ũkk., “ka mbeũ ya mbeũ yaku.”
