Isaia 65:1-25
65 “Nĩ njĩtĩkĩrĩte gũcario nĩ arĩa matarĩ moria ũhoro wakwa;Nĩ njĩtĩkĩrĩte kuonwo nĩ arĩa matarĩ manjetha.+
Ngiuga atĩrĩ, ‘Ndĩ haha, ndĩ haha!’ kũrĩ rũrĩrĩ rũrĩa rũtarĩ rwakaĩra rĩĩtwa rĩakwa.+
2 Ndindaga ndambũrũkĩtie moko makwa mũthenya wothe harĩ andũ aremi,Harĩ arĩa+ mageragĩra njĩra ĩtarĩ njega,+Makarũmĩrĩra meciria mao ene;+
3 Acio mandakaragia hingo ciothe mbere ya ũthiũ wakwa,+Makarutĩra magongona mĩgũnda-inĩ+ na makarutĩra ndogo ya magongona maturubarĩ igũrũ.
4 Maikaraga thĩ mbĩrĩra-inĩ,+Na ũtukũ makaraara kũndũ kwĩhithĩte,*Makĩrĩa nyama cia ngũrũe,+Na thubu wa indo njũru* ũrĩ thĩinĩ wa nyũngũ na ngĩo ciao.+
5 Makoiga atĩrĩ, ‘Wĩikarie; ndũkanguhĩrĩrie,Tondũ niĩ ndĩ mũtheru gũgũkĩra.’*
Andũ acio nĩ ndogo maniũrũ-inĩ makwa, nĩ mwaki wakanaga mũthenya wothe.
6 Na rĩrĩ, nĩ kwandĩke mbere yakwa;Ndikũrũgama ngindĩirie,No nĩ ngaamarĩha,+Ngaamarĩha na gĩthimi kĩiyũru*
7 Nĩ ũndũ wa mahĩtia mao na mahĩtia ma maithe mao ma tene,”+ ũguo nĩguo Jehova ekuuga.
“Tondũ nĩ marutĩire ndogo ya magongona irĩma-inĩNa magatũma nyararũo tũrĩma igũrũ,+Ngaamba gũthima irĩhi rĩao na gĩthimi kĩiyũru.”*
8 Jehova ekuuga ũũ:
“O ta hĩndĩ ĩrĩa ndibei njerũ* yonekaga kĩmanjĩka-inĩ gĩa thabibũ
Na mũndũ akoiga atĩrĩ, ‘Ndũgagĩthũkie, tondũ harĩ na kĩndũ kĩega* thĩinĩ wakĩo,’No taguo ngeeka nĩ ũndũ wa ndungata ciakwa;Ndigaciniina ciothe.+
9 Nĩ ngaaruta mbeũ* thĩinĩ wa JakubuNa thĩinĩ wa Juda ndute ũrĩa ũkaagaya irĩma ciakwa;+Arĩa thuurĩte nĩo magaacigaya,Na ndungata ciakwa nĩcio igaaikaraga kuo.+
10 Sharoni+ gũgaatuĩka kũndũ gwa kũrĩithio ng’onduNaguo Mũkuru wa* Akori+ ũtuĩke kũndũ gwa kũhurũkagwo nĩ ng’ombe,Nĩ ũndũ wa andũ akwa arĩa manjaragia.
11 Ĩndĩ mũrĩ amwe a arĩa matiganagĩria Jehova,+Arĩa mariganagĩrũo nĩ kĩrĩma gĩakwa kĩamũre,+Arĩa mahaaragĩria metha nĩ ũndũ wa ngai ya Mũnyaka,Na arĩa maiyũragia ikombe ndibei ndukanie nĩ ũndũ wa ngai ĩrĩa yathagĩrĩra andũ maũndũ.
12 Nĩ ũndũ ũcio-rĩ, ngaamwathĩrĩra rũhiũ rwa njora,+Na inyuĩ inyuothe mũkaainamĩrĩra thĩ nĩguo mũũragwo,+Tondũ ndetanire, no mũtietĩkire,Ngĩaria, no mũtiathikĩrĩirie;+Mwathiire o na mbere gwĩka maũndũ moru maitho-inĩ makwa,Na mũgĩthuura maũndũ marĩa mataangenagia.”+
13 Nĩ ũndũ ũcio ũũ nĩguo Jehova Mwathani Ũrĩa Mũnene oigĩte:
“Atĩrĩrĩ, ndungata ciakwa nĩ ikaarĩaga, no inyuĩ mũgaaikaraga mũrĩ ahũtu.+
Atĩrĩrĩ, ndungata ciakwa nĩ ikaanyuaga,+ no inyuĩ mũgaaikaraga mũrĩ anyotu.
Atĩrĩrĩ, ndungata ciakwa nĩ igaacanjamũka,+ no inyuĩ nĩ mũgaaconoka.+
14 Atĩrĩrĩ, ndungata ciakwa ikaanĩrĩra icanjamũkĩte nĩ ũndũ wa ngoro gũkorũo ĩrĩ na gĩkeno,Ĩndĩ inyuĩ nĩ mũkaarĩra nĩ ũndũ wa ruo rwa ngoroNa mũcakae nĩ ũndũ wa gũkua ngoro.
15 Nĩ mũgaatiga rĩĩtwa na arĩa thuurĩte makaarĩhũthagĩra rĩhaana ta kĩrumi,Na Jehova Mwathani Ũrĩa Mũnene nĩ akaamũũraga inyuothe;No ndungata ciake we mwene agaaciĩta rĩĩtwa rĩngĩ;+
16 Nĩgetha ũrĩa wothe ũgeecarĩria kĩrathimo thĩinĩ wa thĩAkaarathimwo nĩ Ngai wa ũhoro wa ma,*Na mũndũ o wothe ũkeehĩta mwĩhĩtwathĩinĩ wa thĩAkeehĩta na rĩĩtwa rĩa Ngai wa ũhoro wa ma.*+
Tondũ mĩtangĩko ya* hau kabere nĩ ĩkaariganĩra;Nĩ ĩkaahithwo kuuma maitho-inĩ makwa.+
17 Tondũ rĩrĩ! Nĩ kũũmba ngũũmba igũrũ rĩerũ na thĩ njerũ;+Na maũndũ marĩa ma hau kabere matikaaririkanwo,O na kana maikare ngoro-inĩ.+
18 Nĩ ũndũ ũcio canjamũkai na mũtũũre mũkenete nĩ ũndũ wa kĩrĩa ndĩromba.
Tondũ rĩrĩ! Ndĩromba Jerusalemu ĩtuĩke kĩhumo gĩa gĩkenoNa andũ a kuo matuĩke kĩhumo gĩa gĩkeno.+
19 Na nĩ ngaakenera Jerusalemu na njanjamũke nĩ ũndũ wa andũ akwa;+Gũtirĩ hĩndĩ ĩngĩ thĩinĩ wayo gũkaiguĩka mũgambo wa kĩrĩro kana mũcaayo wa mĩtangĩko.”+
20 “Kũndũ kũu gũtigaacoka rĩngĩ gũkorũo na kaana gegũikara o matukũ manini,Kana mũthuri mũkũrũ ũkũremwo nĩ gũtũũra matukũ make.
Tondũ mũndũ ũrĩa ũgaakua arĩ na mĩaka igana akoonagwo ahaana o ta kahĩĩ kanini,Na mũndũ ũrĩa mwĩhia nĩ akaanyitwo nĩ kĩrumi, o na arĩ na ũkũrũ wa mĩaka igana.*
21 Nĩ magaaka nyũmba na matũũre thĩinĩ wacio,+Na mahande mĩgũnda ya mĩthabibũ na marĩe maciaro mayo.+
22 Matigaaka nyũmba itũũrũo nĩ mũndũ ũngĩ,O na kana mahande icoke irĩo nĩ andũ angĩ.
Nĩ gũkorũo matukũ ma andũ akwa magaakorũo matariĩ ta matukũ ma mũtĩ,+Andũ akwa arĩa athuure nĩ magaakenagĩra wĩra wa moko mao biũ.
23 Matikaaruta wĩra wa* tũhũ,+O na kana maciare ciana na mĩtangĩko,Tondũ acio nĩ mbeũ ya* andũ arathime nĩ Jehova,+O hamwe na njiarũa ciao.+
24 O na matetanĩte, nĩ ngaamacokeria;O makĩaragia, nĩ ngaamaigua.
25 Njũi na kagondu ikaarĩaga hamwe,Mũrũthi ũkaarĩaga nyeki o ta ndegwa,+Nacio irio cia nyoka igaakorũo irĩ tĩri.
Itikagera ngero o na kana irehe mwanangĩko o wothe kĩrĩma-inĩ gĩakwa gĩothe kĩamũre,”+ ũguo nĩguo Jehova oigĩte.
Tũũhoro twa magũrũ-inĩ
^ Kana “itarĩ theru.”
^ Kana hihi, “tũnyũmba-inĩ twa kũrangĩra.”
^ Kana hihi, “Tondũ nĩ ngũgũkinyĩria ũtheru wakwa.”
^ Ũkk., “nginya gĩthũri-inĩ kĩao.”
^ Ũkk., “nginya gĩthũri-inĩ kĩao.”
^ Kana “ndibei ya mũhihano.”
^ Ũkk., “kĩrathimo.”
^ Kana “rũciaro.”
^ Kana “Nakĩo Kĩanda kĩa.”
^ Kana “wĩhokeku.” Ũkk., “Ameni.”
^ Kana “wĩhokeku.” Ũkk., “Ameni.”
^ Kana “mathĩna ma.”
^ Kana hihi, “Na ũrĩa ũkaaga gũkinyia igana akoonagwo arĩ na kĩrumi.”
^ Kana “wĩra na kĩyo.”
^ Kana “rũciaro rwa.”
