Ũhoro Mwega Ũrĩa Waandĩkirũo nĩ Luka 9:1-62
-
Arĩa Ikũmi na Erĩ kũheo ũtaaro wĩgiĩ ũtungata (1-6)
-
Herode kũmakio nĩ Jesu (7-9)
-
Jesu kũhũnia andũ 5,000 (10-17)
-
Petero gũkũũrana Kristo (18-20)
-
Ũrathi wĩgiĩ gĩkuũ kĩa Jesu (21, 22)
-
Gũtuĩka mũrutwo wa ma (23-27)
-
Jesu kũgarũrũka ũrĩa aatariĩ (28-36)
-
Kamwana kaarĩ na ndaimono kũhonio (37-43a)
-
Ũrathi ũngĩ wĩgiĩ gĩkuũ kĩa Jesu (43b-45)
-
Arutwo gũkararania nũũ mũnene gũkĩra arĩa angĩ (46-48)
-
Mũndũ o wothe ũtareganaga na ithuĩ arĩ mwena witũ (49, 50)
-
Gĩcagi kĩmwe kĩa Asamaria kũrega Jesu (51-56)
-
Kũrũmĩrĩra Jesu (57-62)
9 Agĩcoka agĩta arĩa Ikũmi na Erĩ hamwe, na akĩmahe hinya na wathani igũrũ rĩa ndaimono ciothe+ na wa kũhonia mĩrimũ.+
2 Na akĩmatũma makahunjie ũhoro wĩgiĩ Ũthamaki wa Ngai na makahonanie,
3 na akĩmeera atĩrĩ: “Mũtigakuue kĩndũ o na kĩ nĩ ũndũ wa rũgendo, kana nĩ mũtirima kana mondo ya irio kana mũgate kana mbeca;* o na kana nguo igĩrĩ.*+
4 No rĩrĩa rĩothe mwatonya mũciĩ mũna, ikaragai kuo o nginya rĩrĩa mũkooima kuo mũgĩthiĩ.+
5 Na rĩrĩa rĩothe andũ maga kũmwamũkĩra, mũkiuma itũũra rĩu, ringithiai magũrũ manyu thĩ rũkũngũ rũitĩke nĩguo ũndũ ũcio ũtuĩke ũira harĩ o.”+
6 Nao makĩambĩrĩria gũthiĩ gĩcigo-inĩ kĩu kuuma gĩcagi kĩmwe nginya kĩrĩa kĩngĩ, makĩhunjagia ũhoro ũrĩa mwega kũndũ guothe makĩhonanagia.+
7 Na rĩrĩ, Herode* mũtongoria wa gĩcigo kĩu akĩigua ũhoro wĩgiĩ maũndũ mothe marĩa meekĩkaga, na akĩmaka mũno tondũ andũ amwe mooigaga atĩ Johana nĩ ariũkĩtio kuuma kũrĩ arĩa akuũ,+
8 no angĩ mooigaga atĩ Elija nĩwe woimĩrĩte, nao angĩ makoiga atĩ ũmwe wa anabii arĩa a tene nĩ ariũkĩte.+
9 Herode akiuga atĩrĩ: “Johana-rĩ, nĩ ndamũrengire mũtwe.+ Ũcio ndĩraigua ũhoro wake akĩrĩ ũ?” Nĩ ũndũ ũcio nĩ aageragia ũrĩa angĩmuona.+
10 Rĩrĩa atũmwo maacokire, makĩra Jesu ũhoro wa maũndũ mothe marĩa meekĩte.+ Nake akĩmatwara handũ marĩ oiki itũũra-inĩ rĩtagwo Bethisaida.+
11 No rĩrĩa kĩrĩndĩ kĩamenyire, gĩkĩmũrũmĩrĩra. Nake agĩkĩamũkĩra wega na akĩambĩrĩria gũkĩhe ũhoro wĩgiĩ Ũthamaki wa Ngai, na akĩhonia arĩa maabataraga kũhonio.+
12 Na rĩrĩ, nĩ gwakuhĩrĩirie gũtuka. Arĩa Ikũmi na Erĩ magĩthiĩ harĩ we makĩmwĩra: “Ĩra kĩrĩndĩ gĩkĩ kiumagare, nĩguo gĩthiĩ icagi-inĩ iria ithiũrũrũkĩirie na mĩgũnda-inĩ gĩĩcarĩrie gwa gũkoma na gĩa kũrĩa, tondũ gũkũ nĩ werũ-inĩ.”+
13 No we akĩmeera: “Inyuĩ mahei kĩndũ gĩa kũrĩa.”+ Makĩmwĩra: “Tũtirĩ na kĩndũ kĩngĩ tiga mĩgate ĩtano na thamaki igĩrĩ, no tũgĩthiire ithuĩ ene tũkagũrĩre andũ aya othe irio.”
14 Andũ acio maarĩ arũme ta 5,000. No akĩra arutwo ake atĩrĩ: “Meerei maikare thĩ marĩ ikundi cia andũ ta 50.”
15 Nao arutwo magĩka o ũguo, makĩra andũ othe maikare thĩ.
16 Nake akĩoya mĩgate ĩyo ĩtano na thamaki icio igĩrĩ, akĩrora igũrũ na agĩcirathima. Agĩcoka agĩcienyũranga na akĩambĩrĩria kũnengera arutwo matwarĩre kĩrĩndĩ.
17 Nao othe makĩrĩa makĩhũna, na makĩũngania cienyũ iria ciatigarire, ikabu 12.+
18 Thutha ũcio, rĩrĩa aarĩ wiki akĩhoya-rĩ, arutwo magĩthiĩ harĩ we, nake akĩmoria atĩrĩ: “Kĩrĩndĩ kiugaga niĩ ndĩ ũ?”+
19 Makĩmũcokeria makĩmwĩra: “Moigaga wee nĩwe Johana Mũbatithania, no angĩ makoiga wee nĩwe Elija, nao angĩ makoiga atĩ ũmwe wa anabii arĩa a tene nĩ ariũkĩte.”+
20 Agĩcoka akĩmoria atĩrĩ: “Ĩ inyuĩ na inyuĩ muugaga ndĩ ũ?” Petero agĩcokia: “Wee nĩwe Kristo wa Ngai.”+
21 Agĩcoka akĩmahe mũkaana mũrũmu, akĩmeera matikeere mũndũ o na ũrĩkũ ũndũ ũcio,+
22 no akiuga atĩrĩ: “No mũhaka Mũrũ wa mũndũ acemanie na mĩnyamaro mĩingĩ na aregwo nĩ athuri na anene a athĩnjĩri Ngai na andĩki-watho, na oragwo,+ acoke ariũkio mũthenya wa gatatũ.”+
23 Agĩcoka agĩthiĩ na mbere kũmeera othe atĩrĩ: “Mũndũ o wothe angĩenda kũnũmĩrĩra, nĩ erege+ na oe mũtĩ wake wa kũnyarirĩrũo* mũthenya o mũthenya na anũmagĩrĩre.+
24 Nĩ gũkorũo mũndũ o wothe wendaga kũhonokia muoyo wake nĩ akoorũo nĩguo, no mũndũ o wothe ũkũrũo nĩ muoyo wake nĩ ũndũ wakwa nĩwe ũkaaũhonokia.+
25 Atĩrĩrĩ, mũndũ angĩgunĩka atĩa angĩĩgwatĩra thĩ yothe no orũo nĩ muoyo wake kana anangwo?+
26 Nĩ gũkorũo mũndũ o wothe ũconokaga nĩ ũndũ wakwa na nĩ ũndũ wa ciugo ciakwa, Mũrũ wa mũndũ nĩ akaamũconokera rĩrĩa agooka arĩ na riri wake na wa Ithe na wa araika arĩa atheru.+
27 No ngũmwĩra atĩrĩ na ma, nĩ harĩ amwe marũgamĩte haha matagacama gĩkuũ o rĩ nginya mambe mone Ũthamaki wa Ngai.”+
28 Na gũgĩkinya atĩrĩ, matukũ ta manana thutha wa kwaria ciugo icio, akĩoya Petero, Johana, na Jakubu akĩambata nao kĩrĩma-inĩ nĩguo akahoe.+
29 Na rĩrĩa aahoyaga, ũthiũ wake ũkĩgarũrũka, nacio nguo ciake ikĩerũha mũno igĩkenga.
30 Na rĩrĩ, haarĩ na arũme erĩ maaragia nake; nĩo Musa na Elija.
31 Makiumĩra marĩ na riri na makĩambĩrĩria kwaria ũhoro wĩgiĩ we gũthiĩ, ũndũ ũrĩa aarĩ hakuhĩ kũhingia thĩinĩ wa Jerusalemu.+
32 Petero na arĩa maarĩ nao nĩ maatooretio mũno nĩ toro, no rĩrĩa meeiguire biũ, makĩona riri wake+ na arũme acio erĩ marũgamĩte hamwe nake.
33 Na rĩrĩa arũme acio maamweheragĩra, Petero akĩra Jesu atĩrĩ: “Mũrutani, nĩ wega gũkorũo tũrĩ haha. Nĩ ũndũ ũcio reke twambe hema ithatũ, ĩmwe yaku, ĩmwe ya Musa, na ĩmwe ya Elija.” Ndaamenyaga ũrĩa ooigaga.
34 No rĩrĩa aaragia maũndũ macio, hakĩgĩa itu na rĩkĩambĩrĩria kũmahumbĩra. Rĩrĩa maahumbĩrirũo nĩ itu rĩu, magĩĩtigĩra.
35 Na mũgambo+ ũkiuma thĩinĩ wa itu rĩu, ũkiuga: “Ũyũ nĩ Mũrũ wakwa, ũrĩa ũthuurĩtwo.+ Mũthikagĩrĩriei.”+
36 Na rĩrĩa mũgambo ũcio waiguirũo, Jesu akĩoneka arĩ wiki. No magĩkira na matierire mũndũ o na ũrĩkũ matukũ-inĩ macio maũndũ marĩa meeyoneire.+
37 Mũthenya ũyũ ũngĩ rĩrĩa maaikũrũkire kuuma kĩrĩma-inĩ, kĩrĩndĩ kĩnene gĩkĩmũtũnga.+
38 Na rĩrĩ, mũndũ warĩ thĩinĩ wa kĩrĩndĩ akĩanĩrĩra akiuga: “Mũrutani, ndagũthaitha ũrore mũrũ wakwa, tondũ ndirĩ ũngĩ.+
39 Na nĩ harĩ roho mũũru ũmũnyitaga, o hĩndĩ ĩyo agakayũrũrũka, ũgacoka ũkamũtugutania akaruta mũhũyũ na kanua, na ndwĩtĩkagĩra kũmũtiga o tiga thutha wa kũmũguraria.
40 Na nĩ thaithire arutwo aku maũingate, no matinahota.”
41 Nake Jesu agĩcokia akiuga: “Inyuĩ rũciaro rũrũ rũtarĩ wĩtĩkio na rũhĩngĩcanu,+ ngũtũũra hamwe na inyuĩ ndĩmũkiragĩrĩria nginya rĩ? Rehe mũrũguo haha.”+
42 No rĩrĩa aakuhagĩrĩria, ndaimono ĩyo ĩkĩmũgũithia thĩ na ĩkĩmũtugutania ũũru mũno. No rĩrĩ, Jesu agĩkũũma roho ũcio mũũru na akĩhonia kamwana kau na agĩkaneana kũrĩ ithe.
43 Na othe makĩgega nĩ ũndũ wa hinya mũnene wa Ngai.
Na rĩrĩa othe maagegete nĩ maũndũ mothe marĩa eekaga, akĩra arutwo ake atĩrĩ:
44 “Thikĩrĩriai na kinyi na mũririkane ciugo ici, tondũ Mũrũ wa mũndũ nĩ egũkunyanĩrũo moko-inĩ ma andũ.”+
45 No matiataũkagĩrũo nĩ ũrĩa ooigaga. Nĩ maahithĩtwo matigataũkĩrũo, na nĩ meetigagĩra kũmũũria ũhoro wĩgiĩ ciugo icio.
46 Gũgĩcoka gũkĩgĩa ngarari gatagatĩ-inĩ kao ciĩgiĩ nũũ warĩ mũnene gũkĩra arĩa angĩ.+
47 Jesu amenya mwĩcirĩrie wa ngoro ciao, akĩoya kaana, agĩkarũgamia hakuhĩ nake,
48 akĩmeera ũũ: “Mũndũ o wothe wamũkagĩra kaana gaka nĩ ũndũ wa rĩĩtwa rĩakwa o na niĩ nĩ anyamũkagĩra; nake mũndũ o wothe ũnyamũkagĩra amũkagĩra nginya Ũrĩa wandũmire.+ Nĩ gũkorũo ũrĩa wĩyonaga arĩ mũnini mũno gatagatĩ-inĩ kanyu inyuothe nĩwe mũnene.”+
49 Johana akĩmũcokeria akĩmwĩra: “Mũrutani, nĩ harĩ mũndũ tuonire akĩruta andũ ndaimono na rĩĩtwa rĩaku, na twageria kũmũgiria tondũ ndekũrũmanagĩrĩra na ithuĩ.”+
50 No Jesu akĩmwĩra: “Mũtikagerie kũmũgiria, tondũ mũndũ o wothe ũtararegana na inyuĩ arĩ mwena wanyu.”
51 Na rĩrĩa matukũ make ma gũthiĩ igũrũ maakuhagĩrĩria,*+ agĩtua itua irũmu rĩa gũthiĩ Jerusalemu.
52 Kwoguo agĩtũma atũmwo mathiĩ mbere yake. Nao magĩthiĩ makĩingĩra gĩcagi kĩmwe kĩa Asamaria nĩguo mamũhaarĩrĩrie.
53 No matiamũnyitire ũgeni,+ tondũ nĩ aatuĩte itua rĩa* gũthiĩ Jerusalemu.
54 Rĩrĩa arutwo ake Jakubu na Johana+ moonire ũguo, makĩmũũria atĩrĩ: “Mwathani, nĩ ũkwenda twĩtie mwaki kuuma igũrũ ũmaniine?”+
55 No we akĩĩhũgũra na akĩmakũũma.
56 Nĩ ũndũ ũcio magĩthiĩ gĩcagi kĩngĩ.
57 Na rĩrĩa maarĩ barabara-inĩ magĩthiĩ, mũndũ ũmwe akĩmwĩra: “Nĩ ndĩkũrũmagĩrĩra kũrĩa guothe ũrĩthiaga.”
58 No Jesu akĩmwĩra atĩrĩ: “Mbwe nĩ irĩ imamo, nacio nyoni cia rĩera-inĩ* nĩ irĩ itara, no Mũrũ wa mũndũ ndarĩ handũ ha kũigĩrĩra mũtwe wake.”+
59 Agĩcoka akĩra ũngĩ: “Tuĩka mũrũmĩrĩri wakwa.” Mũndũ ũcio akiuga: “Mwathani, njĩtĩkĩria nyambe thiĩ ngathike baba.”+
60 No we akĩmwĩra ũũ: “Reke akuũ+ mathike akuũ ao, ĩndĩ wee thiĩ ũkahunjie kũndũ guothe ũhoro wa Ũthamaki wa Ngai.”+
61 Nake ũngĩ akĩmwĩra: “Mwathani, nĩ ngũkũrũmĩrĩra, no amba ũnjĩtĩkĩrie ngoigĩre andũ a nyũmba yakwa ũhoro.”
62 Jesu akĩmwĩra atĩrĩ: “Gũtirĩ mũndũ ũnyitĩte mũraũ na akarora indo iria irĩ thutha+ wagĩrĩire thĩinĩ wa Ũthamaki wa Ngai.”+
Tũũhoro twa magũrũ-inĩ
^ Ũkk., “betha.”
^ Kana “nguo ĩngĩ.”
^ Ũcio nĩ Herode Antipasi. Rora Ũthathaũri wa Ciugo.
^ Rora Ũthathaũri wa Ciugo.
^ Ũkk., “maakuhĩrĩirie kũhinga.”
^ Ũkk., “nĩ eerekeirie ũthiũ wake harĩ.”
^ Kana “nyoni cia igũrũ.”
