Ũhoro Mwega Ũrĩa Waandĩkirũo nĩ Mariko 14:1-72
-
Athĩnjĩri-Ngai kũbanga kũũraga Jesu (1, 2)
-
Jesu gũitĩrĩrio maguta manungi wega (3-9)
-
Judasi gũkunyanĩra Jesu (10, 11)
-
Pasaka ya mũico (12-21)
-
Kwambĩrĩrio kwa Irio cia Hwaĩ-inĩ cia Mwathani (22-26)
-
Ũrathi wĩgiĩ Petero gũkaana Jesu (27-31)
-
Jesu kũhoya arĩ Gethisemane (32-42)
-
Jesu kũnyitwo (43-52)
-
Gũciirithio nĩ Sanhedrini (53-65)
-
Petero gũkaana Jesu (66-72)
14 Na rĩrĩ, Pasaka+ na Gĩathĩ kĩa Mĩgate Ĩtarĩ Mĩimbie+ ciatigarĩtie thikũ igĩrĩ.+ Na anene a athĩnjĩri-Ngai na andĩki-watho nĩ maacaragia ũrĩa mangĩmũnyita na njĩra ya wara nĩguo mamũũrage,+
2 nĩ gũkorũo mooigaga atĩrĩ: “Tũtikaamũnyita hĩndĩ ya gĩathĩ; tondũ kwahota gũkaagĩa gĩcanjama gatagatĩ-inĩ ka andũ.”
3 Na rĩrĩa aarĩ Bethania akĩrĩa* mũciĩ gwa Simoni ũrĩa warĩ na mangũ, mũtumia ũmwe agĩũka na cuba ya alabasta ya maguta manungi wega, ma nado ĩtatukanĩtio na kĩndũ, ma goro mũno. Agĩkunũra cuba ĩyo ya alabasta na akĩambĩrĩria kũmũitĩrĩria maguta mũtwe.+
4 Rĩrĩa moonire ũguo, amwe ao makĩĩrana marakarĩte atĩrĩ: “Nĩ kĩĩ gĩatũma maguta maya manungi wega maitangwo?
5 Nĩ gũkorũo maguta maya manungi wega nĩ mangĩendio makĩria ma dinari* 300 na mbeca icio iheo athĩni!” Nĩ ũndũ ũcio makĩigua marakarĩtio mũno nĩ mũtumia ũcio.*
6 No Jesu akiuga: “Tiganai nake. Mũramũthĩnia nĩkĩ? Ũndũ ũrĩa anjĩka nĩ mwega.+
7 Tondũ athĩni mũkoragwo nao hĩndĩ ciothe,+ na no mũmeke maũndũ mega rĩrĩa rĩothe mũngĩenda, no mũtirĩkoragwo na niĩ hĩndĩ ciothe.+
8 Mũtumia ũyũ eka ũrĩa angĩahota; aitĩrĩria mwĩrĩ wakwa maguta manungi wega akĩũhaarĩria o mbere nĩ ũndũ wa gũthikwo.+
9 Ngũmwĩra atĩrĩ na ma, kũrĩa guothe ũhoro ũrĩa mwega ũkaahunjio thĩinĩ wa thĩ,+ ũndũ ũcio mũtumia ũyũ eka o naguo nĩ ũkaagwetagwo nĩguo aririkanagwo.”+
10 Nake Judasi Mũisikariota, ũmwe wa arĩa Ikũmi na Erĩ, agĩthiĩ kũrĩ anene a athĩnjĩri-Ngai nĩguo amũkunyanĩre kũrĩ o.+
11 Rĩrĩa maaiguire ũguo, magĩkena na makĩmwĩrĩra mbeca cia betha.+ Nĩ ũndũ ũcio, akĩambĩrĩria gũcaria mweke wa kũmũkunyanĩra.
12 Na rĩrĩ, mũthenya wa mbere wa Mĩgate Ĩtarĩ Mĩimbie+ rĩrĩa maarutaga igongona rĩa Pasaka,+ arutwo ake makĩmũũria atĩrĩ: “Ũkwenda tũthiĩ kũ tũgakũhaarĩrĩrie gwa kũrĩĩra Pasaka?”+
13 Nĩ ũndũ ũcio agĩtũma arutwo ake erĩ na akĩmeera ũũ: “Thiĩi thĩinĩ wa itũũra, na nĩ mũgũtũngwo nĩ mũndũ ũkuuĩte ndigithũ ya rĩũmba ya maĩ. Mũmũrũmĩrĩre,+
14 na kũrĩa egũtonya, mwĩre mwene mũciĩ ũcio atĩrĩ, ‘Mũrutani aroria ũũ: “Ĩrĩ ha rumu ya ageni kũrĩa niĩ na arutwo akwa tũngĩrĩĩra Pasaka?”’
15 Na nĩ ekũmuonia rumu nene ya igũrũ, ĩrĩ na indo na ĩkahaarĩrio. Mũmĩhaarĩrĩrie kuo nĩ ũndũ witũ.”
16 Kwoguo arutwo acio magĩthiĩ, magĩtonya itũũra rĩu na magĩkora o ta ũrĩa aameerĩte, na makĩhaarĩria Pasaka.
17 Na gwakinya hwaĩ-inĩ, agĩũka hamwe na arĩa Ikũmi na Erĩ.+
18 Na rĩrĩa maaikarĩte metha-inĩ makĩrĩa, Jesu akĩmeera ũũ: “Ngũmwĩra atĩrĩ na ma, ũmwe wanyu ũrĩa ũrarĩanĩra na niĩ nĩ ekũngunyanĩra.”+
19 Makĩnyitwo nĩ kĩeha na marĩ ũmwe ũmwe makĩmũũria ũũ: “Nĩ niĩ?”
20 Nake akĩmacokeria atĩrĩ: “Nĩ ũmwe wa arĩa Ikũmi na Erĩ, ũrĩa ũrarikia guoko hamwe na niĩ mbakũri-inĩ.+
21 Nĩ gũkorũo Mũrũ wa mũndũ nĩ egũthiĩ, o ta ũrĩa kwandĩkĩtwo ũhoro wake, no kaĩ mũndũ ũrĩa ũgũkunyanĩra Mũrũ wa mũndũ arĩ na haaro-ĩ!+ Nĩ kaba mũndũ ũcio atangĩaciarirũo.”+
22 Na o makĩrĩaga akĩoya mũgate, akĩhoya kĩrathimo, akĩwenyũranga, akĩmanengera na akĩmeera ũũ: “Kei; ũyũ ũrũgamĩrĩire mwĩrĩ wakwa.”+
23 Ningĩ akĩoya gĩkombe, agĩcokia ngatho na akĩmanengera, nao othe makĩnyuĩra gĩkombe-inĩ kĩu.+
24 Na akĩmeera atĩrĩ: “Ĩno ĩrũgamĩrĩire ‘thakame yakwa+ ya kĩrĩkanĩro,’+ ĩrĩa ĩgũitwo nĩ ũndũ wa andũ aingĩ.+
25 Ngũmwĩra atĩrĩ na ma, ndikanyua rĩngĩ ndibei ya maciaro ma mũthabibũ o nginya rĩrĩa ngaamĩnyua ĩrĩ njerũ thĩinĩ wa Ũthamaki wa Ngai.”
26 Na thutha wa kũina nyĩmbo cia kũgooca,* magĩthiĩ Kĩrĩma-inĩ kĩa Mĩtamaiyũ.+
27 Jesu akĩmeera atĩrĩ: “Inyuothe nĩ mũkũhĩngĩka, tondũ nĩ kwandĩke ũũ: ‘Nĩ ngaaringa mũrĩithi,+ nacio ng’ondu ihurunjũke.’+
28 No thutha wa kũriũkio, nĩ ngaathiĩ Galili mbere yanyu.”+
29 No Petero akĩmwĩra atĩrĩ: “O na arĩa angĩ othe mangĩhĩngĩka, niĩ ndikũhĩngĩka.”+
30 Nake Jesu akĩmũcokeria ũũ: “Ngũkwĩra atĩrĩ na ma, ũtukũ ũyũ wa ũmũthĩ, ngũkũ ĩtanakũga maita merĩ, nĩ ũkũngaana maita matatũ.”+
31 No we akiuga atĩtĩrithĩtie mũno atĩrĩ: “O na angĩkorũo nĩ gũkua ngũkua hamwe nawe, ndirĩ hĩndĩ ndĩgũkaana.” Acio angĩ othe o nao makĩambĩrĩria kuuga o taguo.+
32 Rĩrĩa maakinyire handũ heetagwo Gethisemane, akĩra arutwo ake atĩrĩ: “Ikarai thĩ haha thiĩ ngahoe.”+
33 Magĩthiĩ na Petero, na Jakubu na Johana,+ na akĩambĩrĩria kũnyitwo nĩ kĩeha* kĩnene na agĩtangĩka mũno.
34 Akĩmeera ũũ: “Ndĩ na kĩeha kĩnene mũno,+ o ta ingĩkua. Ikarai haha na mũikare mwĩiguĩte.”+
35 Na athiathia mbere hanini, akĩinamĩrĩra nginya thĩ akĩambĩrĩria kũhoya atĩ angĩkorũo no kũhoteke, ihinda rĩu rĩmweherere.
36 Akiuga ũũ: “Abba,* Baba,+ maũndũ mothe no mahoteke harĩ wee; njehereria gĩkombe gĩkĩ. Ĩndĩ ti ũrĩa niĩ ngwenda, no nĩ ũrĩa wee ũkwenda.”+
37 Na rĩrĩa aacokire agĩkora makomete, akĩũria Petero atĩrĩ: “Simoni, nĩ gũkoma ũkomete? Kaĩ ũtoima na hinya wa gũikara wĩiguĩte na arĩ ithaa rĩmwe?+
38 Ikarai mwĩiguĩte na mũhoe mũtegũtigithĩria nĩguo mũtikaingĩre magerio-inĩ.+ Nĩ ma ngoro nĩ ĩrenda, no mwĩrĩ ndũrĩ na hinya.”+
39 Na agĩthiĩ o rĩngĩ akĩhoya, agĩcokera ũndũ o ũrĩa aahoete.+
40 Agĩcoka agĩthiĩ harĩ o rĩngĩ na agĩkora makomete, nĩ gũkorũo maitho mao nĩ maatoretio nĩ toro, makĩrigwo nĩ ũrĩa mangĩmũcokeria.
41 Agĩcoka rĩa gatatũ akĩmeera: “Ihinda-inĩ ta rĩrĩ nĩrĩo mũkomete na mũkahurũka! Nĩ ũguo! Ihinda nĩ ikinyu!+ Atĩrĩrĩ, Mũrũ wa mũndũ nĩ egũkunyanĩrũo moko-inĩ ma ehia.
42 Ũkĩrai tũthiĩ. Atĩrĩrĩ, ũrĩa ũkũngunyanĩra arĩ hakuhĩ.”+
43 Na hĩndĩ o ĩyo aaragia, Judasi, ũmwe wa arĩa Ikũmi na Erĩ, agĩkinya arĩ hamwe na kĩrĩndĩ kĩnene kĩrĩ na hiũ cia njora na njũgũma gĩtũmĩtwo nĩ anene a athĩnjĩri-Ngai na andĩki-watho na athuri.+
44 Na rĩrĩ, Judasi ũcio mũmũkunyanĩri nĩ aamaheete kĩmenyithia maaiguanĩire, akameera ũũ: “Ũrĩa ngũmumunya, ũcio nĩwe; mũnyitei mũmũtware arĩ mũrangĩre.”
45 Na agĩthiĩ nginya harĩ we, akiuga, “Rabii!” na akĩmũmumunya na wororo.
46 Nao makĩmũnyita.
47 No ũmwe wa arĩa maarũgamĩte hau agĩcomora rũhiũ rwake rwa njora na agĩtinia gũtũ kwa ndungata ya mũthĩnjĩri-Ngai ũrĩa mũnene, gũkĩgwa.+
48 No Jesu akĩmoria atĩrĩ: “Muoka kũrĩ niĩ na hiũ cia njora na njũgũma ta arĩ mũtunyani muoka kũnyita?+
49 Ndĩrakoragwo na inyuĩ o mũthenya ngĩrutana thĩinĩ wa hekarũ,+ ĩndĩ mũtirokaga kũũnyita. No rĩrĩ, kũrekĩka ũũ nĩgetha Maandĩko mahinge.”+
50 Nao arutwo othe makĩmũtiganĩria makĩũra.+
51 O na kũrĩ ũguo, mwanake ũmwe wehumbĩte o nguo ya gatani ĩrĩa njega tu atarĩ na nguo ĩngĩ, agĩthiĩ amũrũmĩrĩire arĩ hakuhĩ, na makĩgeria kũmũnyita,
52 no agĩtiga nguo ĩyo yake ya gatani akĩũra arĩ njaga.*
53 Hĩndĩ ĩyo magĩtwara Jesu kũrĩ mũthĩnjĩri-Ngai ũrĩa mũnene,+ nao anene othe a athĩnjĩri-Ngai na athuri na andĩki-watho makĩũngana hamwe.+
54 No Petero agĩthiĩ amũrũmĩrĩire arĩ haraya o nginya nja kwa mũthĩnjĩri-Ngai ũrĩa mũnene; na agĩikara thĩ hamwe na ndungata cia mũciĩ ũcio agĩota mwaki mũkengu.+
55 Na rĩrĩ, anene a athĩnjĩri-Ngai na Sanhedrini yothe maacaragia ũira kwerekera Jesu nĩguo mamũũrage, no matiawonaga.+
56 Na andũ aingĩ nĩ maarutaga ũira wa maheeni igũrũ rĩake,+ no ũira wao ndwatwaranaga.
57 Ningĩ amwe nĩ maarũgamaga na makaruta ũira wa maheeni igũrũ rĩake, makoiga:
58 “Nĩ twamũiguire akiuga, ‘Nĩ ngũtharia hekarũ ĩno yaakirũo na moko, na njake ĩngĩ na thikũ ithatũ ĩtakĩtwo na moko.’”+
59 Ĩndĩ o na ũhoro-inĩ ũcio, ũira wao ndwatwaranaga.
60 Mũthĩnjĩri-Ngai ũrĩa mũnene agĩcoka akĩrũgama gatagatĩ-inĩ kao akĩũria Jesu atĩrĩ: “Ndũrĩ ũndũ o na ũmwe ũngĩcokia? Nĩ ũhoro ũrĩkũ ũyũ andũ aya maragũthitanga naguo?”+
61 No we agĩkira na ndaacokirie ũndũ.+ O rĩngĩ mũthĩnjĩri-Ngai ũrĩa mũnene akĩmũũria atĩrĩ: “Wee nĩwe Kristo Mũrũ wa Ũrĩa Mũrathime?”
62 Nake Jesu akĩmũcokeria ũũ: “Ĩĩ nĩ niĩ; na nĩ mũkuona Mũrũ wa mũndũ+ aikarĩte thĩ guoko-inĩ kwa ũrĩo+ kũrĩ hinya na agĩũka na matu ma igũrũ.”+
63 Mũthĩnjĩri-Ngai ũrĩa mũnene aigua ũguo, agĩtembũra nguo ciake akiuga: “Tũrakĩbatara aira angĩ a kĩ?+
64 Nĩ mweiguĩra akĩruma Ngai. Mũkuona atĩa?”* Othe makĩmũtuĩra atĩ agĩrĩire kũũragwo.+
65 Na amwe makĩambĩrĩria kũmũtuĩra mata,+ kũmũhumbĩra ũthiũ na kũmũringa ngundi, makĩmwĩraga atĩrĩ: “Tũrathĩre!” Nacio thigari cia igooti ikĩmũhũũra hĩ ũthiũ na ĩkĩmuoya.+
66 Na rĩrĩ, hĩndĩ ĩrĩa Petero aarĩ hau thĩ kũu nja, mũirĩtu ũmwe warĩ ndungata ya mũthĩnjĩri-Ngai ũrĩa mũnene agĩũka.+
67 Na rĩrĩa oonire Petero agĩota mwaki, akĩmũrora akĩmwĩra atĩrĩ: “O nawe uuma hamwe na Mũnazarethi ũcio ũretwo Jesu.”
68 No agĩkaana, akiuga ũũ: “Niĩ ndimũũĩ o na ndiramenya ũrĩa ũroiga,” na akiuma hau agĩthiĩ kĩhingo-inĩ.*
69 Arĩ hau, mũirĩtu ũcio warĩ ndungata akĩmuona na akĩambĩrĩria kwĩra andũ arĩa maarũgamĩte hau atĩrĩ: “Ũyũ nĩ ũmwe wao.”
70 O rĩngĩ Petero agĩkaana. Thutha wa kahinda kanini, acio maarũgamĩte hau makĩambĩrĩria kũmwĩra o rĩngĩ atĩrĩ: “Ti itherũ wee ũrĩ ũmwe wao, tondũ wee kũna ũrĩ Mũgalili.”
71 No akĩambĩrĩria kuuga aronyitwo nĩ kĩrumi na akĩĩhĩta akiuga ũũ: “Niĩ ndiũĩ mũndũ ũyũ mũraria ũhoro wake!”
72 Na hĩndĩ o ĩyo ngũkũ ĩgĩkũga rĩa kerĩ,+ nake Petero akĩririkana ũrĩa Jesu aamwĩrĩte: “Ngũkũ ĩtanakũga maita merĩ, ũkũngaana maita matatũ.”+ Akĩremererũo na akĩambĩrĩria kũrĩra.
Tũũhoro twa magũrũ-inĩ
^ Kana “aaikarĩte metha-inĩ.”
^ Rora Ũhoro Muongerere B14.
^ Kana “makĩarĩria mũtumia ũcio marakarĩte; makĩmũkũũma.”
^ Kana “thaburi.”
^ Kana “kũnyitwo nĩ kĩmako.”
^ Nĩ kiugo gĩa Kĩhibirania kana Kĩaramu kiugĩte “Baba!”
^ Kana “arĩ na nguo o ya thĩinĩ.”
^ Kana “Mũgwĩciria atĩa?”
^ Kana “baranda-inĩ.”
