Ũhoro Mwega Ũrĩa Waandĩkirũo nĩ Mathayo 9:1-38
9 Kwoguo, Jesu akĩhaica gatarũ, akĩringa mũrĩmo ũrĩa ũngĩ na akĩingĩra itũũra rĩa kwao.+
2 Nao andũ makĩmũrehera mũndũ wakuĩte ciĩga akometio karĩrĩ-inĩ. Na rĩrĩa Jesu oonire wĩtĩkio wao, akĩra mũndũ ũcio wakuĩte ciĩga atĩrĩ: “Mũriũ, gĩa na ũmĩrĩru! Nĩ woherũo mehia maku.”+
3 Na rĩrĩ, andĩki-watho amwe makĩĩrana atĩrĩ: “Mũndũ ũyũ nĩ araruma Ngai.”
4 Nake Jesu amenya meciria mao, akĩmoria ũũ: “Mũreciria maũndũ moru thĩinĩ wa ngoro cianyu nĩkĩ?+
5 Ta rĩu-rĩ, nĩ ũndũ ũrĩkũ mũhũthũ, nĩ kuuga, ‘Nĩ woherũo mehia maku-ĩ,’ kana nĩ kuuga, ‘Ũkĩra wĩtware’?+
6 No nĩguo mũmenye atĩ Mũrũ wa mũndũ arĩ na wathani wa kuohanĩra mehia gũkũ thĩ—” agĩcoka akĩra mũndũ ũcio wakuĩte ciĩga atĩrĩ: “Ũkĩra, woe karĩrĩ gaku, na ũinũke mũciĩ.”+
7 Nake mũndũ ũcio agĩũkĩra na akĩinũka mũciĩ.
8 Na rĩrĩa kĩrĩndĩ kĩoonire ũguo, gĩkĩmaka, na gĩkĩgooca Ngai, o we waheanĩte ũhoti ta ũcio kũrĩ andũ.
9 Ningĩ, Jesu oima hau, akĩona mũndũ wetagwo Mathayo aikarĩte thĩ wabici-inĩ ya kũrĩhĩra igooti, akĩmwĩra atĩrĩ: “Tuĩka mũrũmĩrĩri wakwa.” Nake agĩũkĩra na akĩmũrũmĩrĩra.+
10 Thutha-inĩ, rĩrĩa Jesu aarĩ nyũmba akĩrĩa,* etia aingĩ a mbeca cia igooti na ehia magĩũka makĩambĩrĩria kũrĩanĩra* hamwe na Jesu na arutwo ake.+
11 No rĩrĩa Afarisai moonire ũndũ ũcio, makĩũria arutwo ake ũũ: “Mũrutani wanyu arĩanagĩra na etia a mbeca cia igooti na ehia nĩkĩ?”+
12 Rĩrĩa aaiguire ũguo, akiuga atĩrĩ: “Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.+
13 Nĩ ũndũ ũcio-rĩ, thiĩi mwĩrute ũrĩa ciugo ici ciugĩte: ‘Ngwenda tha no ti igongona.’+ Tondũ ndiokire gwĩta arĩa athingu, no ndokire gwĩta ehia.”
14 Nao arutwo a Johana magĩthiĩ kũrĩ we makĩmũũria atĩrĩ: “Nĩ kĩĩ gĩtũmaga ithuĩ na Afarisai twĩhinge no arutwo aku matiĩhingaga?”+
15 Nake Jesu akĩmeera: “Arata a mũhikania matikoragwo na gĩtũmi gĩa gũcakaya hĩndĩ ĩrĩa yothe mũhikania+ arĩ hamwe nao, kana tiguo? No matukũ nĩ marĩũka rĩrĩa mũhikania akeeherio kũrĩ o,+ na hĩndĩ ĩyo nĩ makeehinga.
16 Gũtirĩ mũndũ ũtumagĩrĩra kĩraka gĩa gĩtambaya kĩerũ igũrũ rĩa nguo ngũrũ ya igũrũ, tondũ kĩraka kĩu kĩerũ kĩgucagia nguo ĩyo, nayo ĩgatarũka makĩria.+
17 O na andũ mationoragĩria ndibei njerũ* thĩinĩ wa mondo ngũrũ cia ndibei. Mangĩka ũguo, mondo icio nĩ itumũkaga na ndibei ĩgaitĩka nacio mondo igathũka. Ĩndĩ andũ monoragĩria ndibei njerũ thĩinĩ wa mondo njerũ cia ndibei, nacio cierĩ igaikara irĩ njega.”
18 Na rĩrĩa aameeraga maũndũ macio, mũtongoria ũmwe wokĩte harĩ we akĩmũinamĩrĩra, akĩmwĩra: “No mũhaka mwarĩ wakwa akorũo rĩu nĩ mũkuũ, no ũka ũmũigĩrĩre guoko, na nĩ egũcoka muoyo.”+
19 Nake Jesu agĩũkĩra na akĩmũrũmĩrĩra, arĩ hamwe na arutwo ake.
20 Na rĩrĩ, mũtumia wanyamarĩkĩte nĩ gũtũũra oiraga thakame mĩaka 12+ agĩthiĩ thutha wake na akĩhutia gĩcũrĩ kĩa nguo yake ya igũrũ,+
21 tondũ eeĩraga ũũ: “Ingĩhutia tu nguo yake ya igũrũ, nĩ ngũhona.”
22 Jesu akĩĩhũgũra, na amuona, akĩmwĩra: “Mwarĩ ũyũ, gĩa na ũmĩrĩru! Wĩtĩkio waku nĩ watũma ũhone.”+ Na kuuma hĩndĩ ĩyo mũtumia ũcio akĩhona.+
23 Na rĩrĩa Jesu aakinyire kwa mũtongoria ũcio nyũmba na akĩona ahuuhi a mĩtũrirũ na kĩrĩndĩ kĩrĩ na inegene inene,+
24 akĩmeera atĩrĩ: “Umai, tondũ kairĩtu gaka ti gũkua gakuĩte, ĩndĩ nĩ gũkoma gakomete.”+ Maigua ũguo, makĩambĩrĩria kũmũthekerera na kĩnyũrũri.
25 Rĩrĩa kĩrĩndĩ kĩarutirũo nja, agĩtonya na akĩnyita kairĩtu kau guoko,+ nako gagĩũkĩra.+
26 Hatarĩ nganja, ũhoro ũcio nĩ watheremire gĩcigo-inĩ kĩu gĩothe.
27 Rĩrĩa Jesu ooimaga kũu, arũme erĩ atumumu+ makĩmũrũmĩrĩra, makĩanagĩrĩra ũũ: “Tũiguĩre tha, Mũrũ wa Daudi.”
28 Thutha wa Jesu kũingĩra nyũmba, arũme acio atumumu magĩthiĩ harĩ we, nake akĩmoria atĩrĩ: “Hihi mũrĩ na wĩtĩkio atĩ no hote kũmũhonia?”+ Makĩmũcokeria: “Ĩni, Mwathani.”
29 Agĩcoka akĩhutia maitho mao,+ akiuga: “O ta ũrĩa wĩtĩkio wanyu ũtariĩ, nĩ gwĩkĩke ũguo harĩ inyuĩ.”
30 Namo maitho mao makĩambĩrĩria kuona. Ningĩ Jesu akĩmahe mũkaana mũrũmu, akĩmeera ũũ: “Mũtikareke mũndũ o na ũrĩkũ amenye ũhoro ũcio.”+
31 No rĩrĩa mooimire nja, makĩmemerekia ũhoro ũcio wĩgiĩ Jesu gĩcigo-inĩ kĩu gĩothe.
32 Na rĩrĩa mooimaga kũu, andũ makĩmũrehera mũndũ warĩ bubu na aarĩ na ndaimono,+
33 na thutha wa kũrutwo ndaimono-rĩ, mũndũ ũcio warĩ bubu akĩhota kwaria.+ Kĩrĩndĩ gĩkĩgega mũno na gĩkiuga ũũ: “Gũtirĩ kuoneka ũndũ ta ũyũ thĩinĩ wa Isiraeli.”+
34 Ĩndĩ Afarisai mooigaga atĩrĩ: “Aingataga ndaimono na hinya wa mũnene wa ndaimono.”+
35 Na Jesu agĩthiĩ matũũra-inĩ mothe na icagi-inĩ ciothe, akĩrutanaga thunagogi-inĩ ciao na akĩhunjagia ũhoro ũrĩa mwega wa Ũthamaki na akĩhonagia andũ mĩrimũ ya mĩthemba yothe na wathe wa mĩthemba yothe.+
36 Rĩrĩa oonire kĩrĩndĩ, agĩkĩiguĩra tha+ tondũ kĩarĩ kĩnyamarie na gĩkahurunjwo ta ng’ondu itarĩ na mũrĩithi.+
37 Agĩcoka akĩra arutwo ake atĩrĩ: “Magetha nĩ maingĩ, no aruti wĩra nĩ anini.+
38 Kwoguo-rĩ, hoyai Mwene magetha atũme aruti wĩra magetha-inĩ make.”+
Tũũhoro twa magũrũ-inĩ
^ Kana “aaikarĩte nyũmba metha-inĩ.”
^ Kana “magĩikara metha-inĩ.”
^ Kana “ndibei ya mũhihano.”
