Ruthu 1:1-22
1 Na rĩrĩ, matukũ-inĩ marĩa atiirĩrĩri bũrũri+ maathanaga,* nĩ kwagĩire ng’aragu bũrũri-inĩ; na mũndũ ũmwe akiuma Bethilehemu+ thĩinĩ wa Juda agatũũre arĩ mũgeni bũrũri-inĩ wa* Moabi,+ marĩ na mũtumia wake na ariũ ake erĩ.
2 Mũndũ ũcio eetagwo Elimeleku,* mũtumia wake eetagwo Naomi,* nao ariũ ake erĩ meetagwo Mahaloni* na Kilioni.* Maarĩ Aefiratha kuuma Bethilehemu thĩinĩ wa Juda. Magĩgĩkinya bũrũri wa Moabi na magĩikara kuo.
3 Thutha wa ihinda, Elimeleku mũthuri wa Naomi agĩkua, kwoguo agĩtigwo na ariũ ake erĩ.
4 Anake acio magĩcoka makĩhikia atumia Amoabi; ũmwe eetagwo Oripa, nake ũcio ũngĩ eetagwo Ruthu.+ Magĩikara kũu ta mĩaka ikũmi.
5 Thutha-inĩ anake acio eerĩ, Mahaloni na Kilioni o nao magĩkua, kwoguo mũtumia ũcio agĩtigwo atarĩ ciana ciake cierĩ na mũthuriwe.
6 Nake akĩambĩrĩria rũgendo marĩ na atumia a ariũ ake kuuma bũrũri wa Moabi, tondũ arĩ kũu Moabi nĩ aaiguĩte atĩ Jehova nĩ aaririkanĩte andũ ake akamahe irio.*
7 Agĩthama kũndũ kũu kũrĩa aakoretwo agĩikara hamwe na atumia acio erĩ a ariũ ake. Na marĩ njĩra-inĩ magĩcoka bũrũri-inĩ wa Juda,
8 Naomi akĩra atumia acio eerĩ a ariũ ake atĩrĩ: “Thiĩi o mũndũ acoke mũciĩ kwa nyina. Jehova aromuonia wendo mwĩhokeku,+ o ta ũrĩa mũwonanĩtie harĩ anake acio makuĩte na harĩ niĩ.
9 Jehova arotũma* o ũmwe wanyu agĩe na mũthuri na agĩe na ũhurũko mũciĩ-inĩ wake.”+ Agĩcoka akĩmamumunya, na makĩrĩra manĩrĩire.
10 Ĩndĩ o maamwĩraga ũũ: “Aca, tũgũthiĩ nawe kũrĩ andũ anyu.”
11 No Naomi akĩmeera: “Cokai, airĩtu akwa. Mũrenda gũthiĩ na niĩ nĩkĩ? Hihi ndĩ na ũhoti wa kũgĩa ariũ mangĩcoka matuĩke athuri anyu?+
12 Cokai, airĩtu akwa. Thiĩi, nĩ gũkorũo ndĩ mũkũrũ mũno wa kũhika. O na kũngĩtuĩka atĩ no ngorũo na mwĩhoko wa kũgĩa na mũthuri ũtukũ ũyũ na ngĩe na ariũ-rĩ,
13 hihi no mũikare o mũmetereire nginya magaatuĩka andũ agima? Hihi no mwĩgirĩrĩrie kũhika rĩngĩ nĩ ũndũ wao? Aca, airĩtu akwa, ndĩraigua ndĩ na kĩeha nĩ ũndũ wanyu, tondũ guoko kwa Jehova nĩ kũnjũkĩrĩire.”+
14 O rĩngĩ makĩrĩra manĩrĩire, na Oripa akĩmumunya nyaciarawe na agĩthiĩ. No Ruthu akĩĩgwatania nake.
15 Nĩ ũndũ ũcio Naomi akiuga: “Ta rora mũiruguo nĩ acoka kũrĩ andũ ake na kũrĩ ngai ciake. Cokania hamwe na mũiruguo.”
16 Ĩndĩ Ruthu akiuga atĩrĩ: “Ndũkaningĩrĩrie ngũtige, ndige gũtwarana nawe; nĩ gũkorũo kũrĩa ũgũthiĩ nokuo ngũthiĩ, kũrĩa ũkũraara nokuo ngũraara. Andũ anyu megũtuĩka andũ akwa, nake Ngai waku atuĩke Ngai wakwa.+
17 Kũrĩa ũgaakuĩra nokuo ngaakuĩra, na kũu nokuo ngaathikwo. Jehova aroherithia ingĩreka ũndũ ũngĩ ũtũtigithũkanie nawe o tiga gĩkuũ.”
18 Na rĩrĩ, rĩrĩa Naomi oonire atĩ Ruthu nĩ eendaga biũ mathiĩ nake, agĩtiga kũgeria kũmũiguithia.
19 Na magĩthiĩ na mbere na rũgendo marĩ eerĩ nginya magĩkinya Bethilehemu.+ Na rĩrĩa maakinyire Bethilehemu, itũũra rĩothe rĩkĩgega nĩ ũndũ wao, nao atumia mooragia ũũ: “Ũyũ nĩ Naomi?”
20 Nake eeraga atumia acio atĩrĩ: “Mũtikanjĩte Naomi.* Njĩtai Mara,* nĩ gũkorũo Mwene-Hinya-Wothe nĩ atũmĩte ũtũũro ũkorũo ũrĩ na ruo mũno harĩ niĩ.+
21 Ngĩthiĩ ndarĩ mũiyũru, ĩndĩ Jehova atũmĩte njoke moko matheri. Mũrakĩnjĩta Naomi nĩkĩ, na nĩ Jehova ũreganĩte na niĩ na ũrĩa Mwene-Hinya-Wothe nĩwe ũndeheire mathĩna?”+
22 Ũguo nĩguo Naomi aacokire oimĩte bũrũri wa Moabi,+ marĩ na Ruthu ũcio Mũmoabi mũtumia wa mũrũwe. Magĩkinya Bethilehemu kĩambĩrĩria-inĩ kĩa magetha ma cairi.+
Tũũhoro twa magũrũ-inĩ
^ Ũkk., “maatuanagĩra ciira.”
^ Kana “gĩcigo-inĩ kĩa.”
^ Rĩĩtwa rĩu riugĩte “Ngai Wakwa nĩ Mũthamaki.”
^ Rĩĩtwa rĩu riugĩte “Ũgemu Wakwa.”
^ Hihi kuumana na kiugo gĩa Kĩhibirania kĩrĩa kiugĩte “kwaga hinya; kũrwara.”
^ Rĩĩtwa rĩu riugĩte “Mũndũ Ũraremererũo; Mũndũ Ũrakinya Mũthia.”
^ Ũkk., “mũgate.”
^ Kana “aromũhe kĩheo.”
^ Rĩĩtwa rĩu riugĩte “Ũgemu Wakwa.”
^ Rĩĩtwa rĩu riugĩte “Marũrũ.”
