O na gũtuĩka nĩ mũgeragia mũno gũtũma kĩhiko kĩanyu na famĩlĩ igĩe na gĩkeno, maũndũ materĩgĩrĩirũo no moimĩre, matũme ũkorũo ũrĩ ũndũ mũritũ gũikara mũkenete. (Kohelethu 9:11) Tondũ Ngai nĩ atwendete, nĩ atũheaga ũteithio rĩrĩa twacemania na moritũ. Mũngĩhũthĩra motaaro ma Kĩĩmaandĩko marĩa marũmĩrĩire, wee na famĩlĩ yaku no mũhote kũhiũrania na moritũ, o na marĩa manene.

ŨRĨA BIBILIA YUGAGA: ‘Mũrekagĩrĩrie maũndũ mothe marĩa ũtangĩkagĩra, tondũ nĩwe ũrũmbũyanagia na maũndũ maku.’ (1 Petero 5:7) Hingo ciothe ririkanaga atĩ Ngai tiwe ũrakũrehera moritũ. (Jakubu 1:13) O ũrĩa ũrĩmũkuhagĩrĩria, noguo o nake arĩgũteithagia na njĩra ĩrĩa njega biũ. (Isaia 41:10) ‘Mũitũrũragĩre ngoro yaku.’—Thaburi 62:8.

Ningĩ ũngĩthomaga na ũkeruta Bibilia o mũthenya, nĩ ũrĩhotaga kũũmĩrĩria. Na nĩ ũkwĩyonera ũrĩa Jehova ‘atũũmagĩrĩria mathĩna-inĩ maitũ mothe.’ (2 Akorintho 1:3, 4; Aroma 15:4) Atwĩrĩire atĩ nĩ arĩtũheaga “thayũ wa Ngai, ũrĩa ũtangĩmenyeka ũrĩa ũtariĩ.”—Afilipi 4:6, 7, 13.

ŨRĨA ŨNGĨKA:

• Hoya Jehova agũteithie ndũkagage meciria na ũikare ũhooreire

• Rora nĩ maũndũ marĩkũ ũngĩka, na ũthuure ũrĩa ũngĩkwagĩrĩra makĩria

ŨRĨA BIBILIA YUGAGA: “Ngoro ya ũrĩa wĩ na mbuguĩro nĩĩĩthũgũragĩra [kana, nĩ ĩcaragĩria] ũmenyi; gũtũ kwa mũndũ mũũgĩ o nakuo no ũmenyi gũcaragĩrĩria.” (Thimo 18:15) Geria kũmenya maũndũ mothe. Menya kĩrĩa o mũndũ thĩinĩ wa famĩlĩ yaku arabatara. Aranĩria nao, na ũmathikĩrĩrie.—Thimo 20:5.

Ĩ rĩrĩa wakuĩrũo nĩ mũndũ wendete? Ndũgetigĩre kuonania atĩ wĩ na kĩeha. Ririkana atĩ o na Jesu nĩ ‘aarĩrire maithori.’ (Johana 11:35; Kohelethu 3:4) Kũhurũka na gũkoma toro wa kũigana nĩ ũndũ wa bata. (Kohelethu 4:6) Ũndũ ũcio nĩ ũgũgũteithia kũhota kũhiũrania na ũritũ ũrĩa ũragerera.

ŨRĨA ŨNGĨKA:

• Gĩa na mũtugo wa kwaranagĩria na famĩlĩ yaku o na hĩndĩ ĩrĩa gũtarĩ na moritũ. Ũndũ ũcio nĩ ũkũmateithia kũhota kwaranĩria nawe rĩrĩa mathĩna moimĩra

• Aranĩria na arĩa manacemania na thĩna ta ũcio

ŨRĨA BIBILIA YUGAGA: “Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.” (Thimo 17:17) Arata aku no mende gũgũteithia, no makarigwo megũgũteithia atĩa. Ndũgetigĩre kũmeera ũrĩa ũngĩenda gũteithio. (Thimo 12:25) Ningĩ, no ũrie arĩa marĩ na ũmenyo wa Bibilia magũteithie kũmenya ũrĩa ũngĩhũthĩra ũtaaro wayo. Ũtaaro ũrĩa megũkũhe kuuma Bibilia-inĩ nĩ ũgũgũteithia.—Jakubu 5:14.

Ũngĩnyitanagĩra kaingĩ na arĩa marĩ na wĩtĩkio wa ma harĩ Ngai na mehokete ciĩranĩro ciake, nĩ ũkuona ũteithio ũrĩa ũrabatara. Ningĩ nĩ ũrĩiguaga ũmĩrĩirio mũno rĩrĩa wateithia arĩa marabatara gwĩkĩrũo ngoro. Mahe ũhoro wĩgiĩ wĩtĩkio waku harĩ Jehova na ciĩranĩro ciake. Gĩa na maũndũ maingĩ ma gwĩka ũgĩteithia arĩa marabatara ũteithio, na ndũkeyamũranie na arĩa makwendete na makũrũmbũyagia.—Thimo 18:1; 1 Akorintho 15:58.

ŨRĨA ŨNGĨKA:

• Aranĩria na mũrata waku wa hakuhĩ na ũreke agũteithie

• Gweta ũteithio ũrĩa ũrabatara ũtekũhithĩrĩra