Thutha wa kũmenereria Afarisai nĩ ũndũ wa morutani mao ma mwĩyendo, Jesu akoimagara hamwe na arutwo ake. Agathiĩ matũũra-inĩ ma Turo na Sidoni gĩcigo-inĩ kĩa Foinike, kilomita nyingĩ mwena wa rũgongo.

Akinya kuo akona nyũmba angĩikara, no ndarenda andũ mamenye atĩ arĩ kũu. No o na kũu ndangĩĩhitha. Mũtumia Mũngiriki waciarĩirũo gĩcigo-inĩ kĩu akona Jesu na akambĩrĩria kũmũthaitha akamwĩra: “Njiguĩra tha, Mwathani, Mũrũ wa Daudi. Mũirĩtu wakwa nĩ aranyarirũo mũno nĩ ndaimono.”​—Mathayo 15:22; Mariko 7:26.

Thutha wa kahinda, arutwo a Jesu makamwĩra: “Mwĩre athiĩ tondũ aratũrũmĩrĩra agĩkayaga.” Jesu akamataarĩria kĩrĩa kĩratũma aage gũtindanĩra nake, akameera: “Ndiatũmirũo kũrĩ andũ angĩ o tiga kũrĩ ng’ondu iria ciũrĩte cia rũrĩrĩ rwa Isiraeli.” No mũtumia ũcio agathiĩ o na mbere kũmũthaitha. Agakuhĩrĩria na akagwa mbere ya Jesu akamwĩra: “Mwathani, ndeithia!”​—Mathayo 15:​23-25.

Hihi nĩgetha agerie wĩtĩkio wake, Jesu akagweta ciugo ihũthagĩrũo nĩ Ayahudi cia kũhũthia andũ matarĩ Ayahudi akoiga: “Ti wega gũikĩria tũgui mũgate wa ciana.” (Mathayo 15:26) Akĩaria ũhoro wa “tũgui,” Jesu aronania nĩ acayagĩra andũ arĩa matarĩ Ayahudi. No kũhoteke ũthiũ wake na mũgambo wake wa tha o nacio nĩ ironania ũndũ ũcio.

Handũ ha kũrakara, mũtumia ũcio akoerera ũhoro ũcio wĩgiĩ mũthutũkanio wa Ayahudi na akoiga ũũ enyihĩtie: “Ĩĩ nĩguo Mwathani, no tũgui nĩ tũrĩaga rũitĩki rũrĩa rũgũaga kuuma metha-inĩ ya ene tuo.” Jesu ona atĩ mũtumia ũcio arĩ na mwerekera mwega wa ngoro, akamwĩra: “Mũtumia ũyũ, wĩtĩkio waku nĩ mũnene; nĩ gwĩkĩke o ta ũguo wahoya.” (Mathayo 15:​27, 28) Na gũgekĩka o ũguo, o na gũtuĩka mwarĩ ndarĩ hau. Mũtumia ũcio acoka mũciĩ, agakora mwarĩ akomete ũrĩrĩ-inĩ, e mũhonu biũ. “Ndaimono ĩyo nĩ yoimĩte”!​—Mariko 7:30.

Moima gĩcigo kĩa Foinike, Jesu na arutwo ake magatuĩkania bũrũri ũcio marorete mwena wa rũgongo wa Rũĩ rwa Jorodani. Kwahoteka makaringĩra rũĩ rũu mwena wa rũgongo wa Iria rĩa Galili na magathiĩ gĩcigo-inĩ kĩa Dekapoli. Makinya kũu makambata kĩrĩma-inĩ, no kĩrĩndĩ gĩkamarũmĩrĩra. Andũ makarehera Jesu andũ ao arĩa onju, atumumu, na arĩa matarahota kwaria. Magakomia andũ acio arwaru magũrũ-inĩ ma Jesu, nake akamahonia. Andũ acio makagega, na makagooca Ngai wa Isiraeli.

Jesu akarũmbũyania makĩria na mũndũ ũmwe ũtarahota kũigua na kwaria. No ũgerie gwĩciria ũrĩa mũndũ ũcio areigua atariĩ mbere ya kĩrĩndĩ kĩnene. Hihi nĩ ũndũ wa kuona mũndũ ũcio arĩ na kaguoya, Jesu akamũtwara haraihu na andũ. Marĩ o erĩ tu, Jesu akonania ũndũ ũrĩa arenda kũmwĩkĩra. Agaikia ciara ciake matũ-inĩ ma mũndũ ũcio, na thutha wa gũtua mata, akamũhutia rũrĩmĩ. Jesu agacoka akarora igũrũ, akoiga “Efatha,” kiugo kĩrĩa kiugĩte “Hingũka.” O rĩo mũndũ ũcio akahota kũigua, na akahota kwaria o wega. Jesu ndarenda ũndũ ũcio ũmenyeke nĩ andũ aingĩ, tondũ arona kaba andũ mamwĩtĩkie nĩ ũndũ wa maũndũ marĩa mareyonera na makeiguĩra o ene.​—Mariko 7:​32-36.

Ũhoti wa Jesu wa kũhonia mĩrimũ ta ĩyo ũkahutia ngoro cia andũ arĩa marerorera, na ‘makagega mũno.’ Makoiga: “Ciĩko ciake ciothe nĩ cia magegania. Arahonia nginya andũ matarĩ na ũhoti wa kũigua na arĩa matarĩ na ũhoti wa kwaria.”​—Mariko 7:37.