Rebeka aarĩ mũtumia wendete Jehova. Mũthuri wake eetagwo Isaaka, na nĩ eendete Jehova o nake. Rebeka na Isaaka maamenyanire atĩa? Rebeka onanirie atĩa atĩ nĩ eendaga gũkenia Jehova? Ta reke twambe twĩrute ũhoro wa mũthuri wake, Isaaka.

Aciari a Isaaka maarĩ Iburahimu na Sara. Maaikaraga bũrũri wa Kanaani, no andũ a kũu matiahoyaga Jehova. No Iburahimu eendaga mwana wake ahikie mũtumia wahoyaga Jehova. Nĩ ũndũ ũcio agĩtũma ndungata yake, hihi ĩrĩa yetagwo Eliezeri, ĩgacarĩrie Isaaka mũtumia. Aamĩtũmire kũndũ gwetagwo Harani, kũrĩa andũ amwe a famĩlĩ ya Iburahimu maaikaraga.

Eliezeri aathiire hamwe na ndungata ingĩ cia Iburahimu. Thabarĩ ĩyo yarĩ ndaihu mũno. Maathiire na ngamĩra ikũmi ikuuĩte irio na iheo. Eliezeri aamenyire atĩa mũtumia ũrĩa egũthuurĩra Isaaka? Rĩrĩa Eliezeri na ndungata icio ingĩ maakinyire Harani, maarũgamire gĩthima-inĩ tondũ Eliezeri nĩ aamenyaga atĩ atumia nĩ megũka gũtaha maĩ. Akĩhoya Jehova akĩmwĩra: ‘Mũirĩtu ũrĩa ngũhoya maĩ na ahe niĩ hamwe na ngamĩra ciakwa, nĩ ngũmenya atĩ ũcio nĩwe ũthuurĩte.’

Rebeka agĩcoka agĩũka gĩthima-inĩ. Bibilia yugaga atĩ aarĩ mũthaka mũno.  Eliezeri akĩmwĩra amũhe maĩ ma kũnyua, nake Rebeka akiuga: ‘Nĩ ngũkũhe maĩ, na ndahĩre nginya ngamĩra ciaku.’ Ta wĩcirie ũndũ ũcio! Ngamĩra irĩ nyotu nĩ inyuaga maĩ maingĩ mũno, kwoguo Rebeka nĩ aatahire maĩ maita maingĩ. Hihi nĩ ũramuona mbica-inĩ ũrĩa araruta wĩra na kĩyo?—Eliezeri nĩ aagegirio nĩ ũrĩa Jehova aacokirie mahoya make.

Eliezeri akĩhe Rebeka iheo nyingĩ njega. Rebeka akĩra Eliezeri na ndungata icio ingĩ mathiĩ nake kwao. Maakinya, Eliezeri agĩtaarĩria kĩrĩa gĩatũmĩte Iburahimu amũtũme kuo, na ũrĩa Jehova aacoketie mahoya make. Andũ a famĩlĩ ya Rebeka magĩkena na makĩmwĩtĩkĩria athiĩ akahikio nĩ Isaaka.

No hihi nĩ ũrona ta Rebeka eendaga kũhikio nĩ Isaaka?— Rebeka nĩ aamenyire atĩ Jehova nĩwe watũmĩte Eliezeri kũu. Kwoguo rĩrĩa andũ a famĩlĩ yao maamũririe kana nĩ ekwenda gũthiĩ Kanaani akahikio nĩ Isaaka, oigire: ‘Ĩĩ, nĩ ngwenda gũthiĩ.’ O hĩndĩ ĩyo, magĩthiĩ na Eliezeri. Rĩrĩa maakinyire Kanaani, akĩhikio nĩ Isaaka.

Tondũ Rebeka nĩ eekire ũrĩa Jehova eendaga eke, Jehova nĩ aamũrathimire. Mĩaka mĩingĩ thutha ũcio, Jesu agĩciarĩrũo famĩlĩ-inĩ yao. Ũngĩkenia Jehova ta ũrĩa Rebeka eekire, o nawe no akũrathime.