ITHOMO RĨA 6
Kũrĩ na Kĩĩrĩgĩrĩro Kĩrĩkũ Harĩ Arĩa Makuĩte?
1. Ũhoro ũrĩa mwega wĩgiĩ arĩa makuĩte nĩ ũrĩkũ?
Rĩrĩa Jesu aakinyire Bethania hakuhĩ na Jerusalemu, mũratawe Lazaro aaniinĩte thikũ inya kuuma akua. Jesu agĩthiĩ harĩa mbĩrĩra yarĩ marĩ na Maritha na Mariamu, aarĩ a nyina na Lazaro. Thutha wa kahinda kanini, kĩrĩndĩ gĩgĩcokanĩrĩra ho. Ta wĩcirie ũrĩa Maritha na Mariamu maakenire rĩrĩa Jesu aariũkirie Lazaro!—Thoma Johana 11:21-24, 38-44.
Maritha nĩ aamenyete ũhoro ũrĩa mwega wĩgiĩ arĩa makuĩte. Nĩ aamenyete atĩ Jehova nĩ akaariũkia arĩa makuĩte matũũre thĩinĩ wa thĩ rĩngĩ.—Thoma Ayubu 14:14, 15.
2. Hihi arĩa makuĩte matariĩ atĩa?
Ngai eerire Adamu ũũ: “Wee ũrĩ rũkũngũ na ũgaacoka o rũkũngũ-inĩ.” —KĨAMBĨRĨRIA 3:19.
Andũ moombirũo kuumana na rũkũngũ. (Kĩambĩrĩria 2:7; 3:19) Tũtikoragwo tũrĩ ciũmbe cia roho irĩ na mĩĩrĩ ya nyama. Tũrĩ ciũmbe cia kĩĩmwĩrĩ, kwoguo gũtirĩ kĩndũ thĩinĩ witũ gĩthiaga na mbere gũtũũra twakua. Rĩrĩa twakua, tombo witũ nĩ ũkuaga, na meciria maitũ magathira. Nĩ ũndũ ũcio gũtirĩ ũndũ Lazaro ooigire wĩgiĩ maũndũ eeyoneire hĩndĩ ĩyo aakuĩte, tondũ arĩa makuĩte gũtirĩ ũndũ moĩ.—Thoma Thaburi 146:4; Kohelethu 9:5, 6, 10.
Hihi Ngai nĩ aherithagia andũ na mwaki thutha wa gũkua? Tondũ Bibilia yonanagia atĩ arĩa makuĩte gũtirĩ ũndũ moĩ-rĩ, icua rĩa mwaki nĩ ũrutani wa maheeni na nĩ ũcambithagia Ngai. Rĩciria rĩa kũherithia andũ na mwaki nĩ arĩthũire mũno.—Thoma Jeremia 7:31.
Wĩrorere video ya Hihi Arĩa Makuĩte Matariĩ Atĩa?
3. Hihi no twaranĩrie na arĩa makuĩte?
Arĩa makuĩte matingĩhota kwaria kana kũigua. (Thaburi 115:17) Ĩndĩ araika amwe nĩ oru, na no maarĩrie andũ metuĩte arĩa maakuire. (2 Petero 2:4) Jehova nĩ akananĩtie andũ kũgeria gũtuĩria ũhoro harĩ arĩa makuĩte.—Thoma Gũcokerithia Maathani 18:10, 11.
4. Nĩa magaacokio muoyo?
Andũ milioni nyingĩ arĩa marĩ mbĩrĩra-inĩ nĩ magaacokio muoyo thĩinĩ wa thĩ. O na amwe arĩa meekaga maũndũ moru nĩ ũndũ wa kwaga kũmenya Ngai nĩ makaariũkio.—Thoma Luka 23:43; Atũmwo 24:15.
Arĩa makaariũkio nĩ makaagĩa na mweke wa kwĩruta ũhoro wa ma wĩgiĩ Ngai na kuonania wĩtĩkio wao harĩ Jesu na njĩra ya kũmwathĩkĩra. (Kũguũrĩrio 20:11-13) Arĩa magaacokio muoyo na meke maũndũ mega nĩ magaakenera muoyo tene na tene thĩinĩ wa thĩ.—Thoma Johana 5:28, 29.
5. Kũriũka gũtũrutaga atĩa igũrũ rĩgiĩ Jehova?
Nĩ gũkaahoteka andũ mariũkio tondũ Ngai nĩ aatũmire Mũrũ wake arute muoyo wake nĩ ũndũ witũ. Kwoguo kũriũka gũtũrutaga ũrĩa Jehova akoragwo na wendo na ũtugi mũnene. Rĩrĩa arĩa makuĩte magaacokio muoyo-rĩ, wee wĩriragĩria mũno gũkoona ũ?—Thoma Johana 3:16; Aroma 6:23.
