Rosie oigire ũũ: “Kaingĩ nĩ ndatangĩkaga igũrũ rĩgiĩ maũndũ mamwe na ngatangĩka o na makĩria rĩrĩa ndameciria.” Nĩ mĩhari ĩrĩkũ ya Bibilia yandeithirie? Ũmwe nĩ Mathayo 6:34: “Mũtikanatangĩke nĩ ũndũ wa rũciũ, tondũ rũciũ nĩ rũgaakorũo na mĩtangĩko yaruo. O mũthenya ũkoragwo na ũũru waguo.” Rosie oigire atĩ ciugo icio cia Jesu nĩ ciamũteithirie atige gwĩciria mũno ũrĩa gũkaahanĩka rũciũ. Aacokire akiuga: “Nĩ ndaarĩ na mathĩna maingĩ, na hatiarĩ na bata wa gũtinda ngĩongerera mangĩ mateekĩkĩte na matangĩekĩkire.”

Yasmine o nake nĩ aaiguaga atooretio nĩ mĩtangĩko. Oigire ũũ: “Nĩ ndaarĩraga thikũ cigana ũna harĩ wiki na rĩmwe ndionaga toro. Nĩ ndeciragia maũndũ moru na nĩ maathumbũraga mũno.” Nĩ rĩandĩko rĩrĩkũ rĩamũteithirie? Oigire atĩ nĩ 1 Petero 5:7, rĩrĩa riugaga: “O mũkĩmũikagĩria mĩtangĩko yanyu yothe, nĩ ũndũ nĩ amũrũmbũyagia.” Ningĩ oigire: “O ũrĩa mahinda maathiaga nĩ ndahoyaga Jehova na agacokia mahoya makwa. Ndaiguire ta ndaũrũo mũrigo mũritũ warĩ ciande-inĩ ciakwa. Rĩmwe na rĩmwe nĩ ndĩciragia maũndũ moru, no nĩ njũĩ atĩ no hote kũhiũrania namo.”

Mũtumia wĩtagwo Isabella ũrĩ na mĩaka 24 oigire: “Ngwĩciria famĩlĩ-inĩ itũ nĩ tũkoragwo na thĩna wa gũtĩrĩria maũndũ tondũ o na baba noguo ekaga. Nĩ ndĩragĩria gwĩka maũndũ ma bata nĩguo tu hurũke kana ndĩrorere TV. Nĩ mũtugo mũũru tondũ nĩ wongagĩrĩra mĩtangĩko na no ũtũme mũndũ eke ũndũ na njĩra njũru.” Nĩ aateithirio nĩ ũtaaro wa 2 Timotheo 2:15, ĩrĩa yugaga: “Ĩka ũrĩa wothe ũngĩhota kuonania atĩ ũrĩ mwĩtĩkĩrĩku nĩ Ngai, mũruti wĩra ũtarĩ na ũndũ angĩconokera.” Isabella oigire: “Ndiendaga gũconorithia Jehova nĩ ũndũ wa wĩra wakwa tondũ wa kũũtĩrĩria.” Nĩ ahotete gwĩka mogarũrũku rĩu.

Nake Kelsey oigire: “Nĩ ndaakoragwo ngĩenda gwĩka ũndũ ĩndĩ ngaũtĩrĩria nginya ndagĩka ya mũthia. Nĩ ndaarĩraga, ngaaga toro, na ngaigua ndĩ na ihooru. Ũndũ ũcio ndwangenagia.” Kelsey nĩ onire ũteithio ũrĩa ũrĩ thĩinĩ wa rĩandĩko rĩa Thimo 13:16: “Mũndũ o wothe mũbarĩrĩri ekaga maũndũ make na ũmenyi, ĩndĩ kĩrimũ nĩ gũtandamũra gĩtandamũraga ũrimũ wakĩo.” Nĩ aataarĩirie ũrĩa gwĩcũrania rĩandĩko rĩu kwamũrutire: “Nĩ wega kuona maũndũ ũrĩa matariĩ na kũbanga kabere. Rĩu nĩ ngoragwo na ibuku rĩrĩa nyandĩkaga maũndũ marĩa ndĩrenda gwĩka, na ũndũ ũcio nĩ ũndeithagia kũhota kwĩbanga na ngaaga gũtĩrĩria maũndũ nginya ndagĩka ya mũico.”

Kirsten oigire ũũ: “Mũthuri wakwa aathire na akĩndiga na ciana inya.” Nĩ ũtaaro ũrĩkũ wa Bibilia wamũteithirie? Thimo 17:17 yugaga ũũ: “Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.” Kirsten nĩ eethire ũteithio harĩ andũ maatungatagĩra Jehova o take. Nĩ aateithĩkire? Oigire ũũ: “Arata akwa nĩ maandeithirie na njĩra nyingĩ mũno. Amwe nĩ maatigaga indo cia kũruga na mahũa mũrango-inĩ wakwa. Maita matatũ gakundi ka arata akwa nĩ maatũteithirie gũthama. Mũndũ ũmwe nĩ aandeithirie gũcaria wĩra. Arata akwa nĩ maandeithagia hingo ciothe.”

Delphine ũrĩa ũragwetetwo gĩcunjĩ-inĩ kĩrĩa kĩraarĩ hau kabere o nake nĩ aahiũranagia na kũigua atiganĩirio. Oigire ũũ thutha wa gũcemania na mathĩna marũmanĩrĩire: “Ndonaga andũ arĩa angĩ magĩikarania hamwe no niĩ ndaarĩ wiki ndĩ na ihooru.” Rĩandĩko rĩmwe rĩamũteithirie nĩ Thaburi 68:6: “Ngai-rĩ, arĩa etũũria-gĩthũnũ [marĩ oiki] atũmaga magĩe na mĩciĩ.” Aataarĩirie ũũ: “Nĩ ndamenyaga atĩ mũhari ũcio woigaga atĩ no ngĩe na mũciĩ na njĩra ya mũhaano. Nĩ ndataũkĩirũo atĩ Ngai no ahe mũciĩ wa kĩĩroho handũ harĩa ingĩagĩire na mwĩgitio na ũrata wa ma harĩ andũ arĩa mathathayagia Jehova. No nĩ ndamenyaga atĩ ndingĩahotire gũkuhĩrĩria andũ angĩ angĩkorũo ndingĩambire gũkuhĩrĩria Jehova. Nĩ ndateithirio nĩ Thaburi 37:4 ĩrĩa yugaga: ‘Nĩrĩo ũngĩtũũra wĩkenagĩra nĩ ũndũ wa Jehova, nake nĩarĩkũheaga maũndũ marĩa ngoro yaku ĩhoyaga.’”

Akĩrĩkĩrĩria oigire ũũ: “Nĩ ndamenyire atĩ nĩ ndabataraga kwĩnyitithania na Jehova makĩria. Nĩ we mũrata ũrĩa mwega biũ. Ngĩcoka ngĩandĩka maũndũ marĩa ingĩakeneire hamwe na andũ arĩa angĩ, nĩguo hote kũgĩa ũrata na andũ arĩa mendete Jehova. Nĩ nderutire kuonaga maũndũ mega ma andũ arĩa angĩ na kwaga gũtindanĩrĩra na mahĩtia mao.”

Ũhoro wa ma nĩ atĩ, andũ arĩa matungatagĩra Ngai nĩ mahĩtagia. Aira a Jehova nĩ mahiũranagia na mathĩna o ta andũ arĩa angĩ. No maũndũ marĩa merutaga Bibilia-inĩ nĩ matũmaga mateithie andũ arĩa angĩ rĩrĩa kwahoteka. Nĩ ũndũ wa ũũgĩ gũkorũo na arata ta acio. O na kũrĩ ũguo, hihi motaaro ma Bibilia no matũteithie kũhiũrania na mathĩna marĩa tũracemania namo ũmũthĩ ta mĩrimũ ya gũtũũra na kĩeha?