“Wee Mũigua wa mahoya, andũ a mĩthemba yothe marĩũkaga kũrĩ wee.”​—Thaburi 65:2.

Andũ amwe moigaga atĩ o na gũtuĩka matiĩtĩkĩtie atĩ Ngai nĩ athikagĩrĩria mahoya mao, nĩ mahoyaga tondũ gwĩka ũguo nĩ gũtũmaga maigue wega. No mahoya to kĩndũ tu gĩa gũtũma tũigue wega na tũhote kũhiũrania na mathĩna marĩa tũragerera. Bibilia ĩtwĩraga atĩ “Jehova * akoragwo hakuhĩ na arĩa othe mamũkayagĩra, akoragwo hakuhĩ na arĩa othe mamũkayagĩra na ma. . . . Nĩ aiguaga kĩrĩro kĩao gĩa kũhoya ũteithio.”​—Thaburi 145:18, 19.

Kwoguo nĩ twagĩrĩirũo gũkorũo na ma atĩ Jehova Ngai nĩ athikagĩrĩria mahoya ma ndungata ciake. Atwĩraga ũũ arĩ na wendo: “Nĩ mũkaangaĩra na mũũke kũrĩ niĩ mũũhoe, na nĩ ngaamũthikĩrĩria.”​—Jeremia 29:12.

“Hoyagai mũtegũtigithĩria.”​—Aroma 12:12.

Bibilia ĩtwĩkĩraga ngoro ‘tũhoyage tũtegũtigithĩria,’ na ‘tũthaithanage hingo ciothe.’ Hatarĩ nganja Jehova Ngai nĩ endaga tũmũhoe.​—Mathayo 26:41; Aefeso 6:18.

Ngai endaga tũmũhoe nĩkĩ? Ta wĩcirie ũndũ ũyũ: Nĩ mũciari ũrĩkũ ũtangĩenda kũigua kaana gake gakĩmwĩra ũũ: “Baba, ndeithia”? Ũrĩa kũrĩ nĩ atĩ ithe wa kaana kau no akorũo akĩmenya ũrĩa kaana kau karaigua na kĩrĩa karabatara, no ciugo icio ciako no itũme one atĩ nĩ kamwĩhokete na nĩ kamwendete. Na njĩra o ta ĩyo, rĩrĩa twahoya Jehova Ngai nĩ tũmuonagia atĩ nĩ tũmwĩhokete na nĩ tũrenda kũmũkuhĩrĩria.​—Thimo 15:8; Jakubu 4:8.

“O mũkĩmũikagĩria mĩtangĩko yanyu yothe, tondũ nĩ amũrũmbũyagia.”​—1 Petero 5:7.

Ngai endaga tũmũhoe tondũ nĩ atwendete na nĩ atũrũmbũyagia. Nĩ akoragwo oĩ mathĩna na mĩtangĩko ĩrĩa tũragerera na nĩ endaga gũtũteithia.

Ũtũũro-inĩ wothe wa Mũthamaki Daudi, nĩ aahoyaga Jehova Ngai nĩguo amũteithie na akamwĩra maũndũ mothe marĩa areciria na ũrĩa araigua. (Thaburi 23:1-6) Hihi Ngai oonaga Daudi atĩa? Nĩ eendete Daudi na nĩ aathikagĩrĩria mahoya make. (Atũmwo 13:22) Ũndũ ũmwe na ũcio, Ngai nĩ athikagĩrĩria mahoya maitũ tondũ nĩ atũrũmbũyagia.

Ciugo icio iria irĩ thĩinĩ wa Bibilia cioigirũo nĩ mwandĩki ũmwe wa thaburi. Aarĩ na ma atĩ Ngai nĩ aathikagĩrĩria mahoya make, na ũndũ ũcio nĩ wamũteithagia mũno. Nĩ aaiguaga akuhĩrĩirie Ngai na ũndũ ũcio ũkamũhe hinya wa kũhiũrania na mathĩna na mĩtangĩko ya ũtũũro.​—Thaburi 116:1-9.

Twakorũo na ma atĩ Ngai nĩ athikagĩrĩria mahoya maitũ, nĩ tũrĩmũhoyaga tũtegũtigithĩria. Ta wĩcirie ũhoro wa Pedro ũrĩa ũikaraga bũrũri-inĩ wa Spain. Mwanake wake wa mĩaka 19 aakuire thutha wa kũgĩa na aksidenti ya ngaari. Hĩndĩ ĩyo Pedro aarĩ na kĩeha, nĩ aaitũrũrĩire Ngai ngoro yake na akĩmũhoya maita maingĩ akĩmũũria amũmĩrĩrie na amũteithie. Gwathiire atĩa? Pedro ooigire ũũ: “Jehova nĩ aacokirie mahoya makwa tondũ tũrĩ na mũtumia wakwa nĩ tuomĩrĩirio na tũgĩteithio nĩ Akristiano arĩa angĩ.”

O na gũtuĩka kũhoya gũtiatũmire mwanake wa Pedro acoke muoyo, nĩ kwamũmĩrĩirie we hamwe na famĩlĩ yake na njĩra itiganĩte. Mũtumia wake María Carmen ooigire ũũ: “Mahoya nĩ maandeithirie gũtooria kĩeha. Nĩ ndaamenyire atĩ Jehova Ngai nĩ aataũkagĩrũo nĩ niĩ tondũ ndahoya nĩ ndaiguaga ndacokwo nĩ thayũ na ngaigua hooreire.”

Bibilia na maũndũ marĩa andũ meyoneire nĩ monanagia wega atĩ Ngai nĩ aiguaga mahoya maitũ. O na kũrĩ ũguo, Ngai ndacokagia mahoya mothe. Nĩ kĩĩ gĩtũmaga Ngai age gũthikĩrĩria mahoya mamwe?