Gĩcunjĩ kĩrĩa kĩhĩtũku, nĩ kĩonanĩtie kĩmenyithia kĩrĩa Jesu aaheanire. Kĩmenyithia kĩu kĩronania atĩ Ũthamaki wa Ngai nĩ ũhandĩtwo kũrĩa igũrũ, Jesu Kristo arĩ Mũthamaki.

Bibilia yonanĩtie atĩ Jesu aatuĩka Mũthamaki o ũguo, nĩ angĩaingatire Shaitani na ndaimono ciake kuuma igũrũ. Rĩu maũndũ marĩa mangĩhota gwĩka no mamekire o gũkũ thĩ, na ũcio nĩ ũndũ ũmwe ũtũmĩte maũndũ mathũke mũno kuuma mwaka wa 1914.​—Kũguũrĩrio 12:7, 9.

O na gũtuĩka maũndũ marathiĩ mathũkĩte thĩinĩ wa thĩ, Jesu arĩ we Mũthamaki wa Ũthamaki wa Ngai, nĩ akoretwo agĩka maũndũ ma gũteithia andũ thĩinĩ wa thĩ yothe. Nĩ ũndũ wa wĩra wa kũrutana Bibilia ũrĩa ũrarutwo thĩinĩ wa thĩ yothe o ta ũrĩa Jesu aarathĩte, andũ aingĩ nĩ mareruta motaaro ma Bibilia na makamahũthĩra ũtũũro-inĩ wao. (Isaia 2:2-4) Andũ aingĩ nĩ merutĩte kwaga kũreka wĩra ũkorũo ũrĩ ũndũ ũrĩa wa bata ũtũũro-inĩ wao, makeruta ũrĩa mangĩagagĩria ũtũũro wa famĩlĩ ciao, na gũkenera indo iria marĩ nacio mategũtuĩka ngombo cia indo icio. Andũ acio nĩ mareruta ũrĩa mangĩgunĩka ihinda-inĩ rĩrĩ na ũrĩa mangĩagĩrĩra gũtuĩka andũ arĩa Ngai endaga magaatũũra rungu rwa Ũthamaki wake.

O na gũtuĩka Jesu nĩ arathana kũrĩa igũrũ, thirikari cia andũ no irathana thĩinĩ wa thĩ. O na kũrĩ ũguo, Ngai erĩte Jesu ũũ: “Thiĩ ũgĩtooranagia gatagatĩ-inĩ ga thũ ciaku.” (Thaburi 110:2) Ica ikuhĩ, Jesu nĩ ekũniina biũ arĩa othe mamũkararagia na eherie mathĩna kũrĩ arĩa mathĩkagĩra Ngai.

Ihinda-inĩ rĩu Ũthamaki wa Ngai nĩ ũgeeka maũndũ maya

• Kũniina ndini cia maheeni. Ndini iria ikoretwo ikĩrutana ũhoro wa maheeni wĩgiĩ Ngai na ikahinyĩrĩria andũ nĩ ikaaniinwo. Bibilia ĩringithanagia ndini cia maheeni na mũmaraya. Kũniinwo kwa ndini cia maheeni nĩ gũkaamakia andũ aingĩ.​—Kũguũrĩrio 17:15, 16.

• Kũniina wathani wa andũ. Ũthamaki wa Ngai nĩ ũkoya ikinya rĩa kũniina wathani wothe wa andũ.​—Kũguũrĩrio 19:15, 17, 18.

• Kũniina andũ aganu. Gũgaathiĩ atĩa harĩ andũ arĩa mekaga maũndũ moru makĩendaga na makarega gwathĩkĩra Ngai? Bibilia yugaga ũũ: “Andũ arĩa aganu, nĩ makaaninwo mehere thĩinĩ wa thĩ.”—Thimo 2:22.

• Kũniina Shaitani na ndaimono. Shaitani na ndaimono matikahota “kũhĩtithia ndũrĩrĩ rĩngĩ.”​—Kũguũrĩrio 20:3, 10.

Maũndũ macio mothe makaahutia andũ arĩa mathĩkagĩra Ũthamaki wa Ngai na njĩra ĩrĩkũ?

Jesu arĩ Mũthamaki kũrĩa igũrũ nĩ akaahingia maũndũ maingĩ marĩa matarĩ mahingio nĩ mũthamaki ũngĩ o wothe. Nĩ agaateithĩrĩrio gwathana nĩ andũ angĩ 144,000, arĩa mathuurĩtwo kuuma harĩ andũ. (Kũguũrĩrio 5:9, 10; 14:1, 3) Nĩ agaatigĩrĩra atĩ wendi wa Ngai nĩ ũrekĩka gũkũ thĩ. Ũthamaki wa Ngai ũgeekĩra andũ arĩa magaakorũo thĩinĩ wa thĩ maũndũ marĩkũ?

• Kũniina mĩrimũ na gĩkuũ. “Gũtirĩ mũikari wakuo ũkoiga: ‘Ndĩ mũrwaru,’” na “gĩkuũ gĩtigaacoka gũkorũo kuo rĩngĩ.”​—Isaia 33:24; Kũguũrĩrio 21:4.

• Gũtũma kũgĩe thayũ wa ma na ũgitĩri. “Thayũ wa ariũ aku nĩ ũgaakorũo ũrĩ mũingĩ,” na “magaaikaraga thĩ, o mũndũ rungu rwa mũthabibũ wake na rungu rwa mũtĩ wake wa mũkũyũ, na gũtirĩ mũndũ ũgaatũma maigue guoya.”​—Isaia 54:13; Mika 4:4.

• Kũhe andũ wĩra mwega. “Andũ akwa arĩa athuure nĩ magaakenagĩra wĩra wa moko mao biũ. Matikaaruta wĩra wa tũhũ.”​—Isaia 65:22, 23.

• Gũthondeka thĩ. “Werũ na bũrũri ũrĩa mũngʼaru nĩ igaakena mũno, werũ ũrĩa mwaraganu nĩ ũgaakena na ũcanũke ta mahũa ma nyeki-inĩ.”​—Isaia 35:1.

• Kũruta andũ ũrĩa mangĩka nĩguo matũũre tene na tene. “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa watũmire, nĩwe Jesu Kristo.”​—Johana 17:3.

Ngai nĩ endaga ũgaakenera irathimo icio. (Isaia 48:18) Gĩcunjĩ kĩrĩa kĩrũmĩrĩire nĩ kĩarĩrĩirie maũndũ ũngĩka ihinda-inĩ rĩrĩ, nĩguo ũgaakenera ihinda rĩu rĩega rĩgooka.