1. Nĩ kĩĩ kĩngĩtũma tuuge atĩ Jehova nĩwe mwene indo ciothe? (Rora mbica kĩambĩrĩria-inĩ gĩa gĩcunjĩ gĩkĩ.)

INDO ciothe nĩ cia Jehova! Nĩwe mwene “igũrũ, o na igũrũ rĩrĩa rĩrĩ kũraya kũu matu-inĩ, o na thĩ, o na indo ciothe iria irĩ kuo.” (Gũcok. 10:14; Kũg. 4:11) Kwoguo andũ othe nĩ a Jehova tondũ nĩwe wamombire. (Thab. 100:3) O na kũrĩ ũguo, kuuma rĩrĩa andũ maambĩrĩirie gũtũũra gũkũ thĩ, Ngai akoretwo agĩthuura amwe matuĩke ake na njĩra ya mwanya.

2. Nĩa Bibilia yugaga atĩ nĩ a Jehova na njĩra ya mwanya?

² Kwa ngerekano, Thaburi 135 ĩtaga athathaiya a Jehova thĩinĩ wa Isiraeli ya tene “inagĩ kana igai rĩake kĩũmbe.” (Thab. 135:4) Ningĩ Hosea nĩ aarathĩte atĩ andũ amwe matarĩ Aisiraeli nĩ mangĩgatuĩka andũ a Jehova. (Hos. 2:23) Ũrathi ũcio wahingire rĩrĩa Jehova aambĩrĩirie gũthuura nginya andũ matarĩ Aisiraeli nĩguo magaathana na Kristo. (Atũm. 10:45; Rom. 9:23-26) ‘Rũrĩrĩ rũrũ rũtheru’ nĩ “kĩndũ kĩa Ngai kĩa mwanya” tondũ arĩa marĩ thĩinĩ waruo maitĩrĩirio maguta na roho mũtheru na magathuurũo nĩ getha magaatũũra igũrũ. (1 Pet. 2:9, 10) Ĩ nao Akristiano ehokeku arĩa marĩ na kĩĩrĩgĩrĩro gĩa gũgatũũra gũkũ thĩ? Jehova ameetaga “andũ”  ake na andũ ake “arĩa athure.”—Isa. 65:22.

3. (a) Nĩa makoragwo na ũrata wa mwanya na Jehova mahinda-inĩ maya? (b) Gĩcunjĩ gĩkĩ gĩkwarĩrĩria ũndũ ũrĩkũ?

³ Mahinda-inĩ maya “karũũru kanini,” na nĩo andũ arĩa marĩ na kĩĩrĩgĩrĩro gĩa gũgatũũra igũrũ, na “ng’ondu ingĩ,” na nĩo andũ arĩa marĩ na kĩĩrĩgĩrĩro gĩa gũgatũũra gũkũ thĩ, makoragwo marĩ “rũũru rũmwe” rũrĩa Jehova onaga rũrĩ andũ ake. (Luk. 12:32; Joh. 10:16) Nĩ twendaga mũno kuonia Jehova atĩ nĩ tũkenaga nĩ ũndũ wa gũtwĩtĩkĩria gũkorũo na ũrata wa mwanya nake. Gĩcunjĩ gĩkĩ gĩkwarĩrĩria ũrĩa tũngĩonia Jehova atĩ nĩ tũkenaga nĩ ũndũ wa gũtũhe mweke ũcio wa mwanya.

4. Tũngĩonia Jehova atĩa atĩ nĩ tũkenaga nĩ ũndũ wa gũtwĩtĩkĩria tũkorũo na ũrata nake? Na nĩ ũndũ ũrĩkũ o ta ũcio Jesu eekire?

⁴ Tuonagia Jehova atĩ nĩ tũkenagio nĩ ũrĩa atwĩkĩte na njĩra ya kũmwĩyamũrĩra na ngoro yothe. Na hĩndĩ ĩrĩa twabatithio tuonagia andũ arĩa angĩ atĩ tũrĩ a Jehova na atĩ nĩ tũrĩmwathĩkagĩra. (Ahib. 12:9) Jesu nĩ eekire ũndũ ta ũcio rĩrĩa aabatithirio tondũ nĩ ta eerire Jehova: “Niĩ ngenagio nĩ gwĩka wendi waku, wee Ngai wakwa.” (Thab. 40:7, 8) Eeheanire ekage wendi wa Jehova o na gũtuĩka aaciarĩirũo thĩinĩ wa rũrĩrĩ rwamũrĩirũo Ngai.

5, 6. (a) Jehova eekire atĩa rĩrĩa Jesu aabatithirio? (b) Heana ngerekano ĩronania atĩ Jehova nĩ akenaga rĩrĩa twerutĩra kũmũtungatĩra, o na gũtuĩka indo ciothe nĩ ciake.

⁵ Jehova eekire atĩa rĩrĩa Jesu aabatithirio? Bibilia yugaga ũũ: ‘Thutha wa Jesu kũbatithio, akiumĩra maĩ-inĩ o rĩmwe, narĩo igũrũ rĩkĩhingũka, akĩona roho wa Ngai ũgĩikũrũka ũhaana ta ndutura ũgĩũka igũrũ rĩake. Na rĩrĩ, mũgambo ũkiuma igũrũ ũkiuga atĩrĩ: “Ũyũ nĩ Mũrũ wakwa, ũrĩa nyendete mũno, na nĩ ndĩmwĩtĩkĩrĩte.”’ (Mat. 3:16, 17) O na gũtuĩka Jesu aarĩ o wa Jehova, Jehova nĩ aakenire nĩ kuona Mũrũwe akĩĩrutĩra gwĩka wendi wake na ngoro yothe. O na ithuĩ rĩrĩa tweyamũrĩra Jehova nĩ akenaga na agatũrathima.—Thab. 149:4.

⁶ Kwa ngerekano, ta wĩcirie ũhoro wa mũndũ ũhandĩte mahũa maingĩ gwake. Mũthenya ũmwe kairĩtu gake gagatua ihũa rĩmwe gakamũtwarĩra rĩrĩ kĩheo. Na githĩ ihũa rĩu ti rĩa ithe? Kangĩmũhe atĩa kĩndũ gĩake? Mũthuri wendete mwana wake o na ndangĩyũria ciũria ta icio. Handũ ha ũguo, angĩigua akenete mũno akĩamũkĩra kĩheo kĩu tondũ kĩronania kairĩtu gake nĩ kamwendete. Angĩona ihũa rĩu rĩrĩ rĩa bata mũno gũkĩra mahũa macio mangĩ mothe ahandĩte. O na Jehova noguo akenaga mũno rĩrĩa twerutĩra kũmũtungatĩra na ngoro yothe.—Tham. 34:14.

7. Malaki onanirie atĩa ũrĩa Jehova aiguaga kwerekera arĩa mamũtungatagĩra meyendeire?

⁷ Thoma Malaki 3:16. Angĩkorũo ndwĩyamũrĩire Jehova na ũkabatithio, wĩcirie bata wa kuoya ikinya rĩu. Ũrĩa kũrĩ nĩ atĩ, o ta andũ arĩa angĩ, watuĩkire wa Jehova kuuma rĩrĩa wambĩrĩirie gũtũũra. O na kũrĩ ũguo, ta wĩcirie ũrĩa Jehova angĩkena ũngĩmwĩyamũrĩra na wĩkage wendi wake nĩ ũndũ wa gũtĩa ũnene wake. (Thim. 23:15) Jehova nĩ amenyaga arĩa mamũtungatagĩra meyendeire na akandĩka marĩĩtwa mao thĩinĩ wa “ibuku” rĩake rĩa kĩririkano.

8, 9. Jehova andĩka marĩĩtwa maitũ thĩinĩ wa “ibuku” rĩake rĩa kĩririkano erĩgagĩrĩra twĩke atĩa?

⁸ Jehova andĩka marĩĩtwa maitũ thĩinĩ  wa “ibuku” rĩake rĩa kĩririkano, nĩ harĩ maũndũ erĩgagĩrĩra twĩke. Malaki oigire no mũhaka ‘twĩtigagĩre Jehova na tũgecũrania ũhoro wa rĩĩtwa rĩake.’ Tũngĩthathaiya mũndũ kana kĩndũ kĩngĩ, Jehova no kweheria angĩeheria marĩĩtwa maitũ ibuku-inĩ rĩa muoyo.—Tham. 32:33; Thab. 69:28.

⁹ Kwoguo kwĩyamũrĩra Jehova nĩ makĩria ma kũmwĩra atĩ nĩ ũrĩkaga wendi wake na kũbatithio. Macio nĩ maũndũ mekagwo o ihinda inini na makahĩtũka. No gũikara mwena wa Jehova nĩ ũndũ ũbataraga tũthiĩ na mbere kũmwathĩkĩra ihinda rĩrĩa rĩothe tũgũkorũo tũrĩ muoyo.—1 Pet. 4:1, 2.

10. Nĩ ngũrani ĩrĩkũ yagĩrĩirũo gũkorũo ho gatagatĩ ka arĩa matungatagĩra Jehova na arĩa matamũtungatagĩra?

¹⁰ Gĩcunjĩ kĩu kĩngĩ nĩ kĩrarĩrĩirie ũhoro wa Kaini, Suleimani, na Aisiraeli. Meeciragia maratungatĩra Jehova no matiamũtungatagĩra na ngoro yothe. Ngerekano icio ironania wega atĩ andũ a Jehova no mũhaka mathũũre biũ maũndũ marĩa moru na mende marĩa mega. (Rom. 12:9) Na nĩkĩo thutha wa Malaki kũgweta “ibuku” rĩa kĩririkano, Jehova nĩ oigire ũhoro wa “ngũrani gatagatĩ ka mũndũ mũthingu na mũndũ mwaganu, gatagatĩ ka ũrĩa ũtungatagĩra Ngai na ũrĩa ũtamũtungatagĩra.”—Mal. 3:18.

11. Nĩkĩ nĩ twagĩrĩirũo kũreka andũ arĩa angĩ mone atĩ tũtungatagĩra Jehova na ngoro yothe?

¹¹ Harĩ o njĩra ĩngĩ tũngĩonia Jehova nayo atĩ nĩ tũkenaga nĩ ũndũ wa gũtũthuura tũtuĩke andũ ake. No mũhaka “andũ othe mone” ũrĩa tũrathiĩ na mbere kĩĩroho. (1 Tim. 4:15; Mat. 5:16) Wĩyũrie ũũ: ‘Hihi andũ arĩa angĩ nĩ monaga atĩ ndĩ mwĩhokeku biũ harĩ Jehova? Nĩ menyithagia andũ arĩa angĩ atĩ ndĩ Mũira wa Jehova?’ Jehova no aigue ũũru mũno angĩkorũo o na atũthuurĩte tũtuĩke andũ ake, nĩ tũconokaga kwĩra andũ arĩa angĩ atĩ tũrĩ ake.—Thab. 119:46; thoma Mariko 8:38.

12, 13. Nĩ maũndũ marĩkũ matũmĩte ũkorũo ũrĩ ũndũ mũritũ kũmenya andũ amwe kana nĩ Aira a Jehova?

 ¹² Ũndũ wa kĩeha nĩ atĩ andũ amwe a Jehova nĩ maregerekania na “roho wa gũkũ thĩ,” ũndũ ũrĩa ũratũma andũ mage kũmenya kana nĩ ‘maratungatĩra Ngai kana matiramũtungatĩra.’ (1 Kor. 2:12) Roho ũcio ũtũmaga andũ mahingie ‘merirĩria ma mĩĩrĩ yao.’ (Ef. 2:3) Kwa ngerekano, o na thutha wa gũkorũo tũheetwo ũtaaro mũingĩ wĩgiĩ kwĩhumba na kwĩgemia, andũ amwe no mehumbaga na makegemia na njĩra ĩtagĩrĩire. Mekĩraga nguo imanyitĩte na ironania mwĩrĩ, nginya magĩthiĩ mĩcemanio. Angĩ nao menjagwo kana magathondekwo njuĩrĩ na njĩra ĩkĩrĩtie njano. (1 Tim. 2:9, 10) Marĩ gatagatĩ-inĩ ka andũ o na ndũngĩmenya nũũ Mũira wa Jehova na nũũ “mũrata wa thĩ.”—Jak. 4:4.

¹³ Kũrĩ o na maũndũ mangĩ monanagia atĩ andũ amwe a Jehova matireganĩte biũ na mĩtugo ya thĩ. Marĩ maruga-inĩ mainaga na njĩra ĩtagĩrĩire na mageka maũndũ mangĩ matagĩrĩire gwĩkwo nĩ Mũkristiano. Angĩ nao mandĩkaga maũndũ matagĩrĩire Mũkristiano thĩinĩ wa intaneti (social media) na magekĩra mbica ciao itagĩrĩire. No makorũo matirĩ marakinya gwĩka mehia maritũ mangĩtũma moerũo ikinya, no no mathũkie aarĩ na ariũ a Ithe witũ arĩa marerutanĩria gũkorũo na mĩthiĩre mĩega.—Thoma 1 Petero 2:11, 12.

14. Twagĩrĩirũo gwĩka atĩa nĩguo tũgitĩre ũrata witũ na Jehova?

¹⁴ Thĩ ĩtindĩkagĩrĩria andũ makorũo na “merirĩria ma mwĩrĩ na merirĩria ma maitho na mwĩyonanio wa indo iria mũndũ arĩ nacio.” (1 Joh. 2:16) No tondũ ithuĩ tũrĩ a Jehova, Bibilia ĩtwĩkĩraga ngoro “kũrega merirĩria ma thĩ, na gũtũũra tũrĩ na meciria mega na ũthingu na wĩyamũrĩri Ngai mũtabarĩre-inĩ ũyũ wa maũndũ.” (Tit. 2:12) Maũndũ mothe marĩa twĩkaga, akorũo nĩ kũrĩa na kũnyua, kwĩhumba na kwĩgemia, mũrutĩre wa wĩra, kana mwarĩrie, magĩrĩirũo kuonia andũ arĩa angĩ atĩ tũtungatagĩra Jehova na ngoro yothe.—Thoma 1 Akorintho 10:31, 32.

15. Twagĩrĩirũo kwenda Akristiano arĩa angĩ na kũmekaga maũndũ mega nĩkĩ?

¹⁵ Nĩ tuonanagia atĩ nĩ tuonaga ũrata witũ na Jehova ũrĩ wa bata kũgerera ũrĩa tũikaranagia na Akristiano arĩa angĩ. O nao nĩ a Jehova. Angĩkorũo nĩ tũrĩririkanaga ũndũ ũcio, tũrĩikaranagia nao na njĩra ĩronania nĩ tũmendete na tũkamekaga maũndũ mega. (1 Thes. 5:15) Jesu eerire arũmĩrĩri ake ũũ: “Nĩ ũndũ ũcio andũ othe nĩ marĩmenyaga atĩ mũrĩ arutwo akwa, mwakorũo na wendo gatagatĩ-inĩ kanyu.”—Joh. 13:35.

16. Nĩ ngerekano ĩrĩkũ kuuma Watho-inĩ wa Musa ĩronania ũrĩa Jehova onaga andũ ake?

¹⁶ Nĩguo tuone ũrĩa twagĩrĩirũo gũikarania na andũ arĩa angĩ thĩinĩ wa kĩũngano, ta wĩcirie ũndũ ũyũ: Indo iria ciarĩ thĩinĩ wa hekarũ ya Jehova ciahũthagĩrũo na ũthathaiya mũtheru tu. Watho wa Musa nĩ woigĩte ũrĩa indo icio ciagĩrĩire kũmenyererũo na mũndũ angĩagire gwĩka ũguo aagĩrĩire kũũragwo. (Ndar. 1:50, 51) Angĩkorũo Jehova nĩ aarũmbũyagia mũno indo icio itarĩ muoyo-rĩ, na githĩ ndakĩrũmbũyagia o na makĩria athathaiya ake ehokeku! Hĩndĩ ĩmwe Jehova akĩarĩria andũ ake aamerire atĩ ‘mũndũ ũrĩa wothe ũmahutagia, no ta kĩũma kĩa riitho rĩake ahutagia.’—Zek. 2:8.

17. Nĩ kĩĩ Jehova ‘athikagĩrĩria akaigua’?

¹⁷ Malaki oigire atĩ Jehova nĩ ‘athikagĩrĩria akaigua’ ciugo iria andũ ake marerana na maũndũ marĩa marekana. (Mal. 3:16) Hatarĩ nganja Jehova “nĩ oĩ arĩa ake mwene.” (2 Tim. 2:19) Nĩ amenyaga maũndũ mothe marĩa twĩkaga na marĩa tugaga. (Ahib. 4:13) Rĩrĩa tweka kana twoiga maũndũ matarĩ mega kwerekera aarĩ na ariũ a Ithe witũ, Jehova nĩ ‘athikagĩrĩria akaigua.’ Ningĩ tũrĩ na ma atĩ nĩ amenyaga rĩrĩa twanyita andũ arĩa angĩ ũgeni, twamatuga, twamohera, na twameka maũndũ mega.—Ahib. 13:16; 1 Pet. 4:8, 9.

18. Tũngĩonania atĩa atĩ nĩ tũkenaga nĩ ũndũ wa gũkorũo tũrĩ andũ a Jehova?

¹⁸ Nĩ twendaga mũno kuonia Jehova atĩ nĩ tũkenaga nĩ ũndũ wa gũkorũo tũrĩ andũ ake. Nĩ tuonaga arĩ ũndũ mwagĩrĩru gwĩtĩkĩra tũrĩ ake na njĩra ya kũmwĩyamũrĩra twĩyendeire. O na tũgĩikaraga “gatagatĩ-inĩ ka rũciaro ruogomu na rũhĩngĩcanu,” no twende andũ othe mone atĩ tũtirĩ ‘ũcuke na tũrĩ atheru, tũkĩhenagia ta ũtheri thĩinĩ wa thĩ ĩno.’ (Afil. 2:15) Nĩ twĩthemaga biũ gwĩka maũndũ moru. (Jak. 4:7) Na nĩ tuonagia aarĩ na ariũ a Ithe witũ wendo na tũkamatĩa tondũ o nao nĩ a Jehova.—Rom. 12:10.

19. Jehova arathimaga andũ ake atĩa?

¹⁹ Bibilia ĩranĩire atĩ “Jehova ndarĩ hĩndĩ agate kĩrĩndĩ gĩake.” (Thab. 94:14) Kĩĩranĩro kĩu nĩ gĩa gũtũũra gũtekũmakania nĩ maũndũ marĩkũ mangĩtũkora. O na gĩkuũ gĩtingĩtũtigithũkania na wendo wa Jehova. (Rom. 8:38, 39) “Twatũũra, tũtũũraga nĩ ũndũ wa Jehova, na tũngĩkua tũkuaga nĩ ũndũ wa Jehova. Kwoguo-rĩ, o na tũngĩtũũra kana tũkue, tũrĩ a Jehova.” (Rom. 14:8) Nĩ twĩriragĩria mũno hĩndĩ ĩrĩa Jehova akariũkia arata ake othe ehokeku. (Mat. 22:32) O na ihinda-inĩ rĩrĩ nĩ twamũkagĩra irathimo nyingĩ. Nĩkĩo Bibilia yugaga: “Gũkena, nĩ rũrĩrĩ rũrĩa Jehova arĩ we Ngai waruo, o kĩo kĩrĩndĩ kĩrĩa ethurĩire gĩgatuĩka igai rĩake.”—Thab. 33:12.