Hihi Nĩ Ũraririkana?
Hihi nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:
Bibliomancy nĩ kĩĩ na Akristiano magĩrĩirũo nĩ kũmĩona atĩa?
Nĩ mũtugo wa mũndũ kũhingũra ibuku na makĩria Bibilia, o harĩa ĩkahingũka, agathoma mũhari ũrĩa maitho megũcemania naguo etĩkĩtie atĩ ciugo icio nĩ ikũmũtongoria. Akristiano a ma matiragũragia. Ithenya rĩa ũguo, merutaga Bibilia nĩguo magĩe na ũmenyo wa ma na ũtongoria wa Ngai.
“Thĩ” ĩrĩa ĩgaathira nĩ ĩrĩkũ?
“Thĩ” ĩrĩa ĩgaathira nĩ andũ othe thĩinĩ wa thĩ arĩa matatũũraga kũringana na wendi wa Ngai. (1 Joh. 2:17) Thĩ ĩrĩa tũikaraga ndĩkaniinwo na andũ arĩa athingu nĩ makaahonokio.
O na gũtuĩka Habili nĩ aakuire-rĩ, atwaragĩria na njĩra ĩrĩkũ? (Ahib. 11:4)
Atwaragĩria kũgerera wĩtĩkio. No twĩrute kuumana nake na twĩgerekanie na wĩtĩkio wake. Kĩonereria gĩake kĩega kĩrĩ muoyo nginya ũmũthĩ.
Nĩ maũndũ-inĩ marĩkũ twagĩrĩirũo kwĩmenyerera tũtigathũkie ũrata witũ na Ngai?
Mamwe nĩ ta maya: wĩra witũ wa kĩĩmwĩrĩ, maũndũ marĩa tũthuuraga ma gwĩkenia, kũnyitanĩra na mũndũ wa famĩlĩ weheretio kĩũngano-inĩ, ũhũthĩri wa tekinolonjĩ, gũtangĩkĩra ũgima wa mwĩrĩ, mawoni matagĩrĩire megiĩ mbeca, na gwĩkĩrĩra mũno mawoni maitũ kana ũnene.
Tũngĩĩruta atĩa kuumana na wĩnyihia wa Musa?
Handũ ha kũreka ũnene ũrĩa aaheetwo ũtũme etũgĩrie, Musa eehokaga Ngai ithenya rĩa kwĩĩhoka we mwene. Tũtingĩenda gwĩtũgĩria atĩ tondũ nĩ tũheetwo ũnene mũna kana tondũ atĩ tũrĩ na ũũgĩ wa mũciarĩre, ithenya rĩa ũguo twagĩrĩirũo nĩ kwĩhoka Jehova. (Thim. 3:5, 6)
Arĩa makaariũkio magaatũũra kũ?
Gakundi kanini ka andũ 144,000 magaatũũra igũrũ. Ĩndĩ andũ arĩa aingĩ makaariũkio matũũre gũkũ thĩ tene na tene.
Kuuga atĩ Aisiraeli matiarĩ “aruu” ngoro nĩ kuuga atĩa? (Jer. 9:26)
Maarĩ na ngoro nyũmũ na nemi, na nĩ ũndũ ũcio nĩ mabataraga kweheria kĩrĩa gĩatũma ngoro ciao ciage gwathĩka—mwĩcirĩrie, merirĩria, kana mĩoroto yao ĩrĩa ĩtaaringaine na ya Ngai. (Jer. 5:23, 24)
Tũngiuga Jesu aarĩ kĩonereria kĩa ũtũũro warĩ na muoroto nĩkĩ?
Muoroto wake ũtũũro-inĩ warĩ gwĩka wendi wa Ngai. Nĩ eendete Ithe mũno na akenda andũ. Makĩria ma ũguo, Jesu nĩ aamenyaga atĩ Ithe nĩ aamwendete na nĩ etĩkĩrĩkĩte nĩwe. Macio nĩ maũndũ ma bata mũno harĩ gũkorũo na ũtũũro ũrĩ na muoroto.
Ithondeka rĩa Jehova gũkũ thĩ rĩhutĩtie maũndũ marĩkũ?
Kĩama Kĩrĩa Gĩtongoragia, kamĩtĩ cia wabici cia honge, arori arĩa magendaga, ciama cia athuri a ciũngano, ciũngano na mũhunjia ũmwe ũmwe.
Hihi matuĩro ma Ngai monanagia atĩ ndarĩ tha?
Jehova ndakenagio nĩ gĩkuũ kĩa mũndũ mwaganu. (Ezek. 33:11) Matuĩro make ma tene monanagia atĩ ambaga kũhe andũ mũkaana mbere ya kũhingia ituĩro rĩake. Ũndũ ũcio no ũtũhe mwĩhoko wa gũkaahonoka matuĩro ma mahinda marĩa mokĩte.
Hihi Aisiraeli mooragaga eki naĩ na njĩra ya kũmacuuria mĩtĩ-inĩ?
Aca, no mabũrũri mamwe ma tene nĩ meekaga ũguo. Kũringana na Maandĩko ma Kĩhibirania, andũ aganu maambaga kũũragwo, rĩngĩ na rĩngĩ na njĩra ya kũhũũrũo na mahiga. (Alaw. 20:2, 27) Kĩimba kĩu gĩgacoka gĩgacuurio mũtĩ-inĩ nĩguo gĩtuĩke mũkaana kũrĩ andũ arĩa angĩ.
Nĩkĩ gĩtũmĩte kwage thayũ thĩinĩ wa thĩ?
O na gũtuĩka andũ nĩ mahingĩtie maũndũ maingĩ-rĩ, matingĩhota gwĩtongoria o ene. (Jer. 10:23) Shaitani nĩwe ũratongoria thĩ, nĩ ũndũ ũcio andũ matingĩhota kũrehe thayũ. (1 Joh. 5:19)
