Mũthamaki wa Suriata aacaragia Elisha mũnabii wa Jehova nĩguo amũnyite. Rĩrĩa aaiguire atĩ nĩ onetwo itũũra-inĩ rĩa Dothani rĩrĩa rĩarĩ karĩma-inĩ, agĩtũma thigari irĩ na mbarathi na makaari ma ita ũtukũ. Riũa rĩkĩratha, thigari ciake nĩ ciaingĩrĩte itũũra-inĩ.—2 Ath. 6:13, 14.

Rĩrĩa ndungata ya Elisha yokĩrire na ĩkiuma nja, ĩkĩona mbũtũ ĩyo ya thũ cia mũnabii ũcio, ĩkĩra Elisha, “Wũi! Tũgũgĩĩka atĩa, mwathi wakwa?” Nake agĩcokia atĩrĩ, “Tiga gwĩtigĩra; nĩ gũkorũo arĩa marĩ mwena witũ nĩ aingĩ gũkĩra arĩa marĩ mwena wao.” Elisha agĩcoka akĩhoya Ngai, akiuga atĩrĩ, “Jehova, ndagũthaitha ũmũhingũre maitho, nĩguo one.” Rũgano rũu rũthiaga na mbere kuuga ũũ: “Nake Jehova agĩkĩhingũra maitho ma mwanake ũcio, akĩona wega, na ti-itherũ kĩrĩma-inĩ gĩothe gwakorirũo kũiyũrĩte mbarathi o na ngari cia mwaki irigicĩirie Elisha.” (2 Ath. 6:15-17) Tũngĩĩruta atĩa kuumana na ũhoro ũcio na maũndũ mangĩ meekĩkire ũtũũro-inĩ wa Elisha?

Ona arigicĩirio nĩ mbũtũ cia Suriata, Elisha ndaarĩ na wagagu tondũ nĩ ehokete Jehova na akamenya atĩ Ngai aarĩ na hinya wa kũmũgitĩra. Mahinda-inĩ maya, tũtiĩrĩgagĩrĩra Ngai aringe ciama no nĩ tuonaga atĩ Jehova nĩ agitagĩra andũ ake marĩ gĩkundi. Na njĩra ĩngĩ nĩ ta tũkoragwo tũrigicĩirio nĩ mbarathi na ngaari cia mwaki. ‘Twaciona’ na maitho maitũ ma wĩtĩkio na hingo ciothe twĩhokage Ngai, ‘tũrĩikaraga twĩgangarĩte’ na nĩ tũrĩrathimagwo nĩ Jehova. (Thab. 4:8) Rekei tuone ũrĩa tũngĩgunĩka nĩ maũndũ mangĩ meekĩkire ũtũũro-inĩ wa Elisha.

Mũthenya ũmwe Elisha akĩrĩma, mũnabii Elija nĩ aagerire harĩ we na akĩmũikĩria nguo yake ya igũrũ ya ũtungata wa ũnabii. Elisha nĩ aamenyire gĩtũmi gĩa gũikĩrio nguo ĩyo. Aarugithĩirie arata ake iruga, akiugĩra ithe na nyina ũhoro, agĩcoka agĩthiĩ gũtungatĩra Elija. (1 Ath. 19:16, 19-21) Nĩ ũndũ wa Elisha gũkorũo eharĩirie gũtungatĩra Ngai biũ, Jehova nĩ aamũhũthĩrire na njĩra nyingĩ na agĩcoka agĩtuĩka mũnabii thutha wa Elija.

Elisha aatungatĩire Elija kĩndũ mĩaka ĩtandatũ. Ihinda-inĩ rĩu, nĩwe “waitagĩrĩria Elija maĩ moko.” (2 Ath. 3:11) Matukũ-inĩ macio warĩ mũtugo wa andũ kũrĩa  na moko handũ ha kũhũthĩra iciko, hũma kana indo ingĩ. Thutha wa kũrĩa, ndungata nĩ yaitagĩrĩria mwathi wayo maĩ moko ethambe. Kwoguo mamwe ma mawĩra marĩa Elisha aarutaga matiarĩ ma bata mũno. Ona kũrĩ ũguo, nĩ onaga kĩrĩ gĩtĩo kĩnene gũtungatĩra Elija.

Ona ũmũthĩ, Akristiano aingĩ nĩ maingĩraga thĩinĩ wa mĩthemba mwanya mwanya ya ũtungata wa hĩndĩ ciothe. Mekaga ũguo nĩ ũndũ wa wĩtĩkio na wendi mũnene wa kũhũthĩra hinya wao biũ gũtungatĩra Jehova. Amwe moimaga kwao magathiĩ gũtungatĩra Betheli kana wĩra-inĩ wa mĩako. No makorũo makĩruta mawĩra marĩa andũ aingĩ monaga ta matarĩ ma bata. Jehova nĩ akenagio mũno nĩ ũtungata ũcio, kwoguo gũtirĩ Mũkristiano wagĩrĩirũo kũwona ũtarĩ wa bata kana aũhũthie.—Ahib. 6:10.

Jehova ‘atanoya Elija igũrũ kũgerera kĩhuhũkanio,’ aambire kũmũtũma athiĩ Betheli oimĩte Giligali. Ĩndĩ Elija akĩra Elisha atĩ matigũthiĩ nake, nake Elisha akĩmũcokeria atĩrĩ, “Ndingĩgũtiga.” Maita mangĩ merĩ marĩ rũgendo-inĩ, Elija nĩ aageririe kũmwĩra acoke ĩndĩ ndaigana gwĩtĩkĩra. (2 Ath. 2:1-6) O ta ũrĩa Ruthu atetĩkĩrire gũtiga Naomi, noguo Elisha atetĩkĩrire gũtiga Elija. (Ruth 1:8, 16, 17) Nĩkĩ? Nĩ tondũ Elisha nĩ oete na ũritũ wĩra ũrĩa aahetwo nĩ Ngai wa gũtungatĩra Elija.

Elisha nĩ atũigĩire kĩonereria kĩega. Tũngĩheo wĩra mũna ithondeka-inĩ rĩa Jehova, nĩ tũrĩonaga ũrĩ wa bata mũno angĩkorũo nĩ tũrĩririkanaga tũratungatĩra Ngai. Gũtirĩ gĩtĩo gĩkĩrĩte kĩu.—Thab. 65:4; 84:10.

Marĩ rũgendo-inĩ, Elija aacokire akĩra Elisha ũũ: ‘Hoya ũrĩa ũkwenda ngwĩkĩre o mbere itanathengio harĩ wee.’ Elisha aahoire ũndũ ũngĩamũteithirie ũtungata-inĩ wake harĩ Ngai, o ta ũrĩa Suleimani ekĩte mĩaka mĩingĩ mbere ĩyo. Aahoire agaĩrũo ‘magai merĩ ma hinya wa roho ũrĩa warĩ na Elija.’ (1 Ath. 3:5, 9; 2 Ath. 2:9) Thĩinĩ wa Isiraeli, mũndũ aagayagĩra mũriũ wake wa irigithathi magai merĩ kuuma indo-inĩ ciake. (Gũcok. 21:15-17) Nĩ ũndũ ũcio, Elisha aahoyaga atuĩke mũgai wa Elija, nĩguo atuĩke mũnabii thutha wake. Ningĩ aahoyaga roho wa Elija tondũ eendaga kũgĩa na ũũmĩrĩru na kĩyo o ta kĩrĩa Elija aarĩ nakĩo ũthathaiya-inĩ wa Jehova.—1 Ath. 19:13, 14.

Elija aacokeirie ndungata yake atĩa? Aamĩrire ũũ: “Nĩwahoya ũndũ wĩ hinya; no rĩrĩ, ũngĩkorũo nĩũrĩnyona ngĩeherio harĩ wee-rĩ, ũndũ ũcio nĩũrĩgũkora; no kũngĩkorũo ti ũguo, ũndũ ũcio ndũrĩgũkora.” (2 Ath. 2:10) No kũhoteke macokio ma Elija maarĩ na maũndũ merĩ. Wa mbere nĩ atĩ, no Ngai tu ũngĩahotire gũtua kana Elisha nĩ ekũheo kĩrĩa aahoete. Wa kerĩ, nĩguo Elisha aheo roho ũcio, no mũhaka angĩathire na mbere gũikara na Elija.

Mawoni ma Ngai maarĩ marĩkũ rĩrĩa Elisha aahoire magai merĩ ma roho ũrĩa warĩ thĩinĩ wa Elija? Bibilia yugaga ũũ: “Na gũgĩkinya atĩrĩ, atĩ hĩndĩ ĩrĩa maathiaga na njĩra o ro ũguo, makĩaranagĩria-rĩ, atĩrĩrĩ, makiumĩrĩrũo nĩ ngari yarĩrĩmbũkaga ta mwaki, o na mbarathi ciarĩrĩmbũkaga ta mwaki, ikĩmagayũkania o erĩ magĩtigana; nake Elija agĩkĩambatio igũrũ na kĩhuhũkanio kĩa rũhuho. Nake Elisha agĩkĩona ngari ĩo.” * Macio nĩmo maarĩ macokio ma Jehova harĩ ihoya rĩa Elisha. Elisha nĩ onire Elija akĩoywo na igũrũ, na ta ũrĩa aahoete, akĩheo magai merĩ ma roho wa Elija na agĩtuĩka mũnabii thutha wake.—2 Ath. 2:11-14.

Elisha akĩoya nguo ya ũtungata wa ũnabii ĩrĩa aikĩirio nĩ Elija akĩmĩkĩra. Kuuma hĩndĩ ĩyo, nguo ĩyo yoonanagia atĩ Elisha nĩ mũnabii wa Jehova. Ũira ũngĩ wekĩrire mũkonde atĩ nĩ aamũrĩtwo nĩ Ngai wonekire rĩrĩa aaringire kĩama akĩgayũkania maĩ ma Rũĩ rwa Jorodani.

Elisha ndangĩariganĩirũo nĩ ũndũ ũrĩa onire rĩrĩa Elija aambatagio igũrũ na kĩhuhũkanio. Gũtirĩ mũndũ ũtangĩgega angĩona ngaari na mbarathi cia ita ikĩrĩrĩmbũka mwaki! Maũndũ macio maarĩ ũira wa atĩ Jehova nĩ aahete Elisha kĩrĩa aahoete. Ngai ndacokagia mahoya maitũ kũgerera kĩoneki kĩa mbarathi na ngaari ya ita irarĩrĩmbũka mwaki. O na kũrĩ ũguo, nĩ tũkoragwo na ũira atĩ Ngai nĩ ahũthagĩra hinya wake mũingĩ gũtũteithia na gũtigĩrĩra atĩ wendi wake nĩ ũrekwo. Ningĩ rĩrĩa tũrona Jehova akĩrathima ithondeka rĩake gũkũ thĩ, nĩ ta tũkoragwo  ‘tũkĩona’ ngaari yake ya mũhaano ĩgĩthiĩ na mbere.—Ezek. 10:9-13.

Elisha nĩ eeyoneire maũndũ maingĩ marĩa maamũteithirie biũ kuona atĩ Jehova nĩ arĩ ũhoti mũnene. Roho wa Ngai wamũhotithirie kũringa ciama 16, maita merĩ ma iria ciaringĩtwo nĩ Elija. * Riita rĩa kerĩ Elisha kuona mbarathi na ngaari cia ita ikĩrĩrĩmbũka mwaki nĩ rĩrĩa aarĩ Dothani, hĩndĩ ĩrĩa maahithũkĩirũo nĩ mbũtũ ya Suriata ta ũrĩa hatarĩirio kĩambĩrĩria-inĩ gĩa gĩcunjĩ gĩkĩ.

O na rĩrĩa aarigicĩirio nĩ thũ itũũra-inĩ rĩa Dothani, ndaarĩ na wagagu. Nĩkĩ? Tondũ aarĩ na wĩtĩkio mũrũmu harĩ Jehova. O na ithuĩ nĩ tũbataraga wĩtĩkio ta ũcio. Nĩ ũndũ ũcio, rekei tũhoyage Ngai roho wake nĩguo tũhotage kuonania wĩtĩkio na maciaro marĩa mangĩ ma roho mũtheru.—Luk. 11:13; Gal. 5:22, 23.

Ningĩ ũndũ ũrĩa wekĩkire Dothani nĩ watũmire Elisha agĩe na gĩtũmi kĩngĩ gĩa kwĩhoka Jehova na ũgitĩri wa mbũtũ ciake iria itonekaga. Mũnabii ũcio nĩ onire atĩ Ngai nĩ aatũmĩte araika mathiũrũkĩrie itũũra rĩu na mamũgitĩre kuumana na arĩa mookĩte gũtharĩkĩra. Kũringa kĩama gĩa gũtumumaria thũ, nĩ gwatũmire Elisha na ndungata yake mahonoke. (2 Ath. 6:17-23) Hĩndĩ ĩyo ya gĩcanjama kĩu, Elisha nĩ onanirie biũ wĩtĩkio na mwĩhoko wake harĩ Jehova o ta ũrĩa eekĩte maũndũ-inĩ mangĩ.

O ta Elisha-rĩ, rekei twĩhokage Jehova. (Thim. 3:5, 6) Tweka ũguo, ‘Ngai nĩ arĩtũkinyagĩria wega wake na nĩ arĩtũrathimaga.’ (Thab. 67:1) Ũrĩa kũrĩ nĩ atĩ, ithuĩ tũtithiũrũrũkĩirio nĩ mbarathi na ngaari irarĩrĩmbũka mwaki. O na kũrĩ ũguo-rĩ, hĩndĩ ya ‘thĩna ũrĩa mũnene,’ Jehova nĩ akaagitĩra andũ ake marĩ gĩkundi matikaniinwo. (Mat. 24:21; Kũg. 7:9, 14) Hĩndĩ ĩyo ĩtanakinya, rekei tũririkanage atĩ Ngai “nĩ we handũ haitũ ha gwĩtharĩra.”—Thab. 62:8, The Holy Bible in Gĩkũyũ Language.