Ũhoro wa harĩa mũndũ weheretio thĩinĩ wa kĩũngano egũikara hĩndĩ ya mĩcemanio ya Gĩkristiano ti ũndũ wagĩrĩirũo nĩ gũtũthumbũra.Mabuku maitũ nĩ makoretwo magĩkĩra aciari Akristiano ngoro gũteithagĩrĩria mwana wao mũnini weheretio kĩũngano-inĩ maũndũ-inĩ ma kĩĩroho. Magĩrĩirũo kũmũhe ũteithio ta ũcio angĩkorũo maikaraga nake mũciĩ na nĩ marona kwagĩrĩire gwĩka ũguo. Ngathĩti ya The Watchtower ya Novemba 15, 1988, karatathi ga 19 na 20, yoonanirie atĩ o na aciari no merute Bibilia na mwana wao mũnini weheretio thĩinĩ wa kĩũngano angĩkorũo maikaraga nake mũciĩ. Mekaga ũguo makĩrĩgagĩrĩra atĩ mwana wao nĩ egũteithĩka nĩguo ahote kũrũngĩrĩria mĩthiĩre yake.

Nyũmba-inĩ ya Ũthamaki, mwana mũnini weheretio kĩũngano-inĩ no aikare hamwe na aciari ake akirĩte ategũthumbũra arĩa angĩ. Tondũ gũtirĩ watho atĩ mũndũ weheretio thĩinĩ wa kĩũngano aikare gĩtĩ gĩa thutha-rĩ, mwana weheretio thĩinĩ wa kĩũngano no aikare na aciari ake o harĩa hothe mangĩkorũo maikarĩte. Tondũ nĩ wĩra wa aciari gũteithia mwana wao kĩĩroho, hatarĩ nganja magĩrĩirũo nĩ gũtigĩrĩra atĩ nĩ aragunĩka biũ nĩ mĩcemanio. Gũikarania na mwana wao handũ ha kũreka aikare handũ hangĩ no kũmateithie gwĩka ũguo.

No rĩrĩ, ĩ angĩkorũo mwana weheretio thĩinĩ wa kĩũngano ndaikaraga mũciĩ na aciari ake? Hihi no aikaranie na aciari ake hĩndĩ ya mĩcemanio ya Gĩkristiano? Mahinda mahĩtũku, mabuku maitũ nĩ makoretwo magĩtaarĩria wega mwerekera ũrĩa Mũkristiano agĩrĩirũo nĩ gũkorũo naguo harĩ kũnyitanĩra na mũndũ wa famĩlĩ weheretio thĩinĩ wa kĩũngano na ndaikaraga mũciĩ. * Ĩndĩ, mũndũ weheretio kĩũngano-inĩ gũikarania na andũ a famĩlĩ mĩcemanio-inĩ ya kĩũngano ategũthumbũra andũ nĩ ngũrani mũno na rĩrĩa andũ a famĩlĩ maracaria ciĩgwatio cia kũnyitanĩra nake maũndũ-inĩ mangĩ. Angĩkorũo andũ a famĩlĩ arĩa ehokeku nĩ makoragwo na mwerekera ũrĩa wagĩrĩire harĩ mũndũ wao ũrĩa weheretio kĩũngano-inĩ, na nĩ marũmagĩrĩra ũtaaro wa Kĩĩmandĩko wĩgiĩ kwaga kũnyitanĩra na mũndũ ũcio, hatirĩ bata wa gũthumbũka o na mũndũ ũcio angĩikarania nao hĩndĩ ya mĩcemanio.—1 Kor. 5:11, 13; 2 Joh. 11.

Mũndũ weheretio thĩinĩ wa kĩũngano angĩikarania na mũndũ wa famĩlĩ kana mũndũ ũngĩ o wothe mĩcemanio-inĩ ya Gĩkristiano, tũtiagĩrĩirũo nĩ gũtindanĩra na ũndũ ũcio angĩkorũo mũndũ ũcio ndarathumbũra andũ arĩa angĩ. Gwĩkĩrĩra andũ watho wĩgiĩ harĩa megũikara hĩndĩ ya mĩcemanio no kũrehe mathĩna. Angĩkorũo andũ othe, hamwe na andũ a famĩlĩ arĩa ehokeku nĩ marerutanĩria kũrũmĩrĩra motaaro ma Bibilia megiĩ arĩ meheretio kĩũngano-inĩ, na ũndũ ũcio ndũrahĩnga aarĩ na ariũ a Ithe witũ, hatirĩ bata wa gũtindanĩrĩra na ũrĩa andũ megũikara Nyũmba-inĩ ya Ũthamaki. *