Nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:

Hihi nĩ wega Akristiano gũcina kĩimba?

Itua rĩa gũcina kana kwaga gũcina kĩimba nĩ rĩa mũndũ kĩũmbe. O na gũtuĩka Bibilia ndĩgwetete ĩmwe kwa ĩmwe ũhoro wa mũtugo ũcio, nĩ wega kũririkana atĩ ciimba cia Mũthamaki Saulu na mũriũ wake Jonathani ciambire gũcinwo igĩcoka igĩthikwo. (1 Sam. 31:​2, 8-​13)​—6/15, karatathi ka 7.

Tũngĩkorũo na ma atĩa atĩ Ngai ndatũmaga maũndũ moru mekĩke?

Ngai nĩ mũthingu maũndũ-inĩ mothe. Nĩ arĩ kĩhooto, nĩ mwĩhokeku, na nĩ wa ma. Ningĩ Jehova nĩ aiyũirũo nĩ wendo na tha. (Gũcok. 32:4; Thab. 145:17; Jak. 5:11)​—7/1, karatathi ga 4.

Nĩ moritũ marĩkũ mũndũ angĩcemania namo agĩtungata kũndũ kũrĩ na bata mũnene wa ahunjia bũrũri-inĩ ũngĩ?

Moritũ matatũ nĩ (1) gũcenjia mũtũũrĩre ũrĩa mũndũ aramenyerete, (2) ihooru rĩa kuuma mũciĩ, na (3) kũgĩa na arata bũrũri-inĩ ũcio. Arĩa mahĩtũkĩire moritũ macio nĩ magĩte na irathimo nyingĩ.​—7/15, karatathi ga 4-5.

Nĩkĩ gĩatũmĩte Jusufu amenwo nĩ ariũ a ithe?

Ũndũ ũmwe nĩ atĩ, Jakubu nĩ onirie Jusufu wendo mũnene, akĩmũtumithĩria kanjũ ya mwanya. Ariũ a ithe na Jusufu nĩ maamũiguĩrĩire ũiru na makĩmwendia agatuĩke ngombo.​—8/1, karatathi ga 11-13.

Nĩ kĩĩ gĩtũmaga trakti iria njerũ ikorũo na moimĩrĩro mega na irĩ hũthũ kũhũthĩra?

Trakti icio ciothe ibangĩtwo na njĩra ĩhaanaine. O trakti nĩ ĩtũteithagia kuona rĩandĩko rĩrĩa tũgũthomera mwene nyũmba na kĩũria kĩrĩa tũkũmũria. Gũtekũmakania ũrĩa egũcokia, no tũhumbũrie trakti ĩyo thĩinĩ na tũmuonie ũrĩa Bibilia yugaga. Ningĩ no tũcoke tũmuonie kĩũria kĩrĩa tũkaarĩrĩria twacoka.​—8/15, karatathi ga 13-14.

Peshitta ya Gĩĩsuriata nĩ ndũ?

Rũthiomi rwa Gĩĩsuriata rwambĩrĩirie kũhũthĩka mũno karine-inĩ ya kerĩ kana ya gatatũ. No kũhoteke atĩ rũthiomi rwa Gĩĩsuriata nĩruo rwarĩ rwa mbere kũhũthĩrũo gũtaũra icunjĩ imwe cia Maandĩko ma Kĩngiriki ma Gĩkristiano. Bibilia ya rũthiomi rwa Gĩĩsuriata yetagwo Peshitta.​—9/1, karatathi ga 13-14.

Aciari Akristiano mangĩka atĩa nĩguo mahotage kũrĩithia ciana ciao?

Nĩguo ũmenye ciana ciaku, nĩ harĩ bata gũcithikagĩrĩria. Wĩrutanagĩrie gũcihe irio cia kĩĩroho. Citongoragie ũrĩ na wendo, makĩria rĩrĩa ironania ta irekĩrĩra nganja maũndũ ma kĩĩroho.​—9/15, karatathi ga 18-21.

Nĩ maũndũ marĩkũ matagakorũo kuo rĩngĩ hĩndĩ ya wathani wa Ũthamaki wa Ngai?

Mĩrimũ, gĩkuũ, wagi wa wĩra, mbaara, ng’aragu, na ũthĩni itigaakorũo kuo rĩngĩ.​—10/1, karatathi ga 6-7.

Nĩ kĩrĩkanĩro kĩrĩkũ Bibilia-inĩ gĩkaahotithia andũ angĩ gũthamaka hamwe na Kristo?

Thutha wa Jesu gũkũngũĩra Pasaka ya mũico hamwe na atũmwo ake, nĩ aarĩkanĩire na arutwo ake ehokeku kĩrĩkanĩro kĩa Ũthamaki. (Luk. 22:​28-​30) Kĩrĩkanĩro kĩu nĩ gĩatũmire magĩe na ma atĩ nĩ magaathamaka hamwe na Jesu igũrũ.​—10/15, karatathi ga 16-17.

Heana ngerekano igĩrĩ kuuma Bibilia-inĩ cia kuonania atĩ Shaitani nĩ kĩũmbe kĩa biũ.

Maandĩko monanagia atĩ hĩndĩ ĩrĩa Shaitani aageragia Jesu nĩ maaririe nake. Ningĩ matukũ-inĩ ma Ayubu, Shaitani nĩ aaririe na Ngai. Maũndũ macio nĩ ũira wa atĩ Shaitani nĩ kĩũmbe kĩa biũ.​—11/1, karatathi ga 4-5.

Andũ a “gwĩtanio na rĩĩtwa rĩake” arĩa Jakubu aaririe ũhoro wao thĩinĩ wa Atũmwo 15:14 nĩa?

Acio maarĩ Akristiano Ayahudi na matarĩ Ayahudi arĩa Ngai aathurire magĩtuĩka rũrĩrĩ rwamũre nĩguo “mũhunjanagĩrie mawega” ma ũrĩa wametire. (1 Pet. 2:​9, 10)​—11/15, karatathi ga 24-25.

Timgad yarĩ kũ, na andũ amwe a kuo maarĩ na mwerekera ũrĩkũ?

Timgad yarĩ taũni nene ya Kĩĩroma ĩrĩa yarĩ Afrika ya Rũgongo (bũrũri ũrĩa wĩtagwo Algeria ũmũthĩ). Nĩ kũrĩ ciugo cionekire ciandĩkĩtwo ihiga-inĩ iria cionanagia mwerekera ũrĩa andũ amwe maarĩ naguo. Ciaandĩkĩtwo ũũ: “Kũhĩta, Gwĩthamba, Gũthaaka, Gũtheka​—Ũcio Nĩguo Ũtũũro!” Mwerekera ũcio no ta ũrĩa ũrĩ thĩinĩ wa1 Akorintho 15:32.​—12/1, karatathi ga 8-10.