Wĩhokage Jehova o Ũrĩa Mũico Ũrakuhĩrĩria

“Tũũrai mwĩhokete Jehova tene na tene.”—ISA. 26:4.

1. Harĩ ũtiganu ũrĩkũ gatagatĩ ka ndungata cia Ngai na andũ thĩinĩ wa thĩ?

ANDŨ milioni nyingĩ thĩinĩ wa thĩ ĩrĩa tũratũũra matimenyaga mangĩiga mwĩhoko harĩ ũ kana harĩ kĩĩ, hihi tondũ manatuurio kana manooragwo ngoro maita maingĩ mũno. Kaĩ nĩ ngũrani na ndungata cia Jehova-ĩ! Nĩ ũndũ wa gũtongorio nĩ ũũgĩ wa Ngai, citiĩhokaga thĩ ĩno kana “anene” ayo. (Thab. 146:3) Ithenya rĩa ũguo-rĩ, ciigaga ũtũũro wacio na mahinda ma cio marĩa mokĩte moko-inĩ ma Jehova, cikĩmenyaga atĩ nĩ aciendete na atĩ hingo ciothe nĩ ahingagia Kiugo gĩake.—Rom. 3:4; 8:38, 39.

2. Joshua oigire atĩa igũrũ rĩgiĩ wĩhokeku wa Ngai?

2 Joshua ũrĩa wa tene nĩ onanirie atĩ Jehova nĩ mwĩhokeku biũ. Mahinda-inĩ ma mũico ma ũtũũro wake erire Aisiraeli ũũ: “Nĩmũũĩ na ngoro cianyu, o na maroho manyu, atĩ mũtirĩ mwaaga ũndũ o na ũmwe wa maũndũ mothe mega marĩa Jehova Ngai wanyu aaririe ũhoro wamo mamũkoniĩ; maũndũ macio mothe nĩmaahingirio o wega, na hatirĩ ũndũ o na ũmwe wamo wanaaga kũhingio.”—Josh. 23:14.

3. Rĩĩtwa rĩa Ngai rĩguũragia ũndũ ũrĩkũ ũmwĩgiĩ?

3 Jehova nĩ ahingagia ciĩranĩro ciake nĩ ũndũ wa wendo wake harĩ ndungata ciake no makĩria ahingagia nĩ ũndũ wa rĩĩtwa rĩake. (Tham. 3:14; 1 Sam. 12:22) Ĩkĩarĩrĩria rĩĩtwa rĩa Ngai, The Emphasized Bible, ya J. B. Rotherham yugaga atĩ rĩĩtwa rĩa Ngai riugĩte atĩ Ngai no atuĩke o kĩrĩa gĩothe angĩenda nĩguo ahingie ciĩranĩro ciake. Rĩrĩa rĩĩtwa rĩake rĩagwetwo tũririkanaga atĩ hingo ciothe we ekaga ũrĩa oigĩte. No eke ũrĩa angĩenda gwĩka ihinda o rĩothe na handũ o hothe. Hatirĩ ũndũ mũri tũ harĩ we. Hingo ciothe Jehova ekaga kũringana na ũrĩa rĩĩtwa rĩake riugĩte.

4. (a) Isaia 26:4 ĩtwĩkagĩra ngoro twĩke atĩa? (b) Nĩ maũndũ marĩkũ tũkwarĩrĩria thĩinĩ wa gĩcunjĩ gĩkĩ?

4 Wĩyũrie ũũ: ‘Hihi nĩ menyete Jehova wega ũũ atĩ no hote kũmwĩhoka biũ? Nĩ njũthagĩrĩria mahinda marĩa mokĩte itarĩ na mathangania, ndĩhokete atĩ Ngai nĩ egũtongoria maũndũ wega?’ Isaia 26:4 yugaga ũũ: “Tũũrai mwĩhokete Jehova tene na tene, nĩ gũkorũo JAHU JEHOVA nĩwe Rũaro rũa Ihiga rũa tene na tene.” Ma nĩ atĩ, ũmũthĩ Ngai ndahũthagĩra ciama gũteithia andũ ũtũũro-inĩ wao ta ũrĩa eekaga mahinda ma Bibilia. O na kũrĩ ũguo-rĩ, we “Rũaro rũa Ihiga rũa tene na tene,” no tũmwĩhoke “tene na tene.” Ngai witũ mwĩhokeku ateithagia atĩa athathaiya ake ehokeku ũmũthĩ? Rekei twarĩrĩrie njĩra ici ithatũ: Nĩ atũheaga hinya wa kũhiũrania na magerio rĩrĩa twamũhoya, nĩ atũũmagĩrĩria rĩrĩa andũ marega gũtũthikĩrĩria kana magatũkararia mũno, na ningĩ agatũtirĩrĩra rĩrĩa twaritũhĩrũo nĩ mĩtangĩko. Tũkĩarĩrĩria njĩra icio-rĩ, wĩcũũranie biũ wone ũrĩa ũngĩkĩra hinya mwĩhoko waku harĩ Jehova.

Wĩhokage Ngai Rĩrĩa Ũragerio Wĩke Ũũru

5. Nĩ hĩndĩ ĩrĩkũ mwĩhoko witũ harĩ Jehova ũngĩgerio na njĩra nene?

5 Nĩ ũndũ mũhũthũ kwĩhoka Jehova ũndũ-inĩ wĩgiĩ kĩĩranĩro kĩa Paradiso na gĩa kũriũka tondũ macio nĩ maũndũ twĩriragĩria. No ti ũndũ mũhũthũ kũmwĩhoka mĩthiĩre-inĩ iitũ, na gwĩtĩkia biũ atĩ kũrũmĩrĩra njĩra ciake na ithimi ciake nĩguo ũndũ ũrĩa wagĩrĩire na ũrĩa ũngĩtũrehera gĩkeno kĩnene. Mũthamaki Suleimani aandĩkire ũũ: “Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene; Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.” (Thim. 3:5, 6) Ta rora ciugo iria ihũthĩrĩtwo hau, “mĩthiĩre-inĩ” yaku na “njĩra” ciaku. Ĩĩni, twagĩrĩirũo nĩ kuonania atĩ nĩ twĩhokete Ngai mĩthiĩre-inĩ iitũ yothe no to maũndũ-inĩ marĩa atwĩrĩire tu. Tũngĩonania mwĩhoko ũcio atĩa rĩrĩa kwagĩa magerio?

6. Tũngĩhota atĩa gwĩkĩra hinya itua riitũ rĩa kũrega mathugunda mooru?

6 Gwĩthema maũndũ moru kwambagĩrĩria meciria-inĩ maitũ. (Thoma Aroma 8:5; Aefeso 2:3.) Kwoguo-rĩ, ũngĩhota atĩa gwĩkĩra hinya itua rĩaku rĩa kũrega matarania mathũku? Wĩcirie ũhoro wa njĩra ici ithano: 1. Caria ũteithio wa Ngai na njĩra ya mahoya. (Mat. 6:9, 13) 2. Wĩcũũranie ũhoro wa cionereria cia Bibilia cia andũ arĩa maaregire gwathĩkĩra Jehova na arĩa maamwathĩkĩire. Ũcoke ũrore moimĩrĩro maarĩ marĩkũ harĩ andũ acio. * (1 Kor. 10:8-11) 3. Wĩcirie ũhoro wa ruo rwa ngoro na rwa meciria rũrĩa rũngĩrehwo nĩ mehia harĩ we na harĩ endwa aku. 4. Wĩcirie ũrĩa Ngai aiguaga rĩrĩa ũmwe wa ndungata ciake agũa mehia-inĩ maritũ. (Thoma Thaburi 78:40, 41.) 5. Ta hũra mbica ũrĩa Jehova akenaga rĩrĩa ona ndungata yake njĩhokeku ĩkĩrega gwĩka ũũru ĩgeka ũrĩa kwagĩrĩire, ĩrĩ mbere ya andũ kana ĩrĩ hitho-inĩ.  (Thab. 15:1, 2; Thim. 27:11) O nawe no ũhote kuonania atĩ nĩ wĩhokete Jehova.

Wĩhokage Ngai Rĩrĩa Waaga Gũthikĩrĩrio na Rĩrĩa Wakarario

7. Nĩ magerio marĩkũ Jeremia aacemanirie namo, na aiguaga atĩa rĩmwe na rĩmwe?

7 Aarĩ na ariũ a Ithe witũ aingĩ mahunjagia kũndũ kũrabatara ũkirĩrĩria mũnene mũno. Mũnabii Jeremia nĩ aatungatĩire kũndũ ta kũu— rĩrĩa kwaiyũrĩte ngũĩ matukũ-inĩ ma kũrigĩrĩria ma ũthamaki wa Juda. Tondũ wa kũhunjia ndũmĩrĩri cia matuĩro ma Ngai arĩ mwĩhokeku-rĩ, o mũthenya nĩ aacemanagia na magerio ma wĩtĩkio. O na mwandĩki wake mwĩhokeku Baruku, kũrĩ hĩndĩ aatetire atĩ nĩ aanogete. (Jer. 45:2, 3) Hihi Jeremia nĩ eetĩkĩrire gũkua ngoro? Ma nĩ atĩ kũrĩ hĩndĩ eeiguire athuthĩkĩte ngoro. Oigire ũũ: “Kũgwatwo nĩ kĩrumi-rĩ, nĩ mũthenya ũrĩa ndaciarirũo. Rĩu-rĩ, ndakiumire nda ya maitũ ndũũre na mĩtangĩko o na kĩeha nĩ ũndũ kĩ, o namo matukũ makwa makaya gũthira o ngĩconorithagio?” Jer. 20:14, 15, 18.

8, 9. Kũringana na Jeremia 17:7, 8 na Thaburi 1:1-3, twagĩrĩirũo nĩ gwĩka atĩa nĩguo tũthiĩ na mbere kũgĩa na maciaro mega?

8 O na kũrĩ ũguo-rĩ, Jeremia ndaigana gũkua ngoro. Aathire na mbere kwĩhoka Jehova. Nĩ ũndũ wa ũguo mũnabii ũcio mwĩhokeku nĩ eeyoneire kũhinga gwa ciugo cia Jehova iria irĩ thĩinĩ wa Jeremia 17:7, 8: “No rĩrĩ, gũkena-rĩ, nĩ mũndũ ũrĩa wĩhokaga Jehova, na agatua Jehova mwĩhoko wake. Nĩ ũndũ agatuĩka o ta mũtĩ ũhandĩtwo hũgũrũrũ-inĩ cia maĩ, ũrĩa ũtambagia mĩri yaguo gũkuhĩ na rũũĩ; na rĩrĩa kwagĩa ũrugarĩ wa riũa-rĩ, mũtĩ ũcio ndũngĩhoha, no ithangũ rĩaguo rĩgũtũũra rĩrĩ iruru; na rĩrĩ, mũtĩ ta ũcio ndũrĩ ũndũ ũngĩũtanga mwaka wa wathima, na ndũngĩtiga gũciara maciaro.”

9 O ta mũtĩ ũrĩa ũciaraga maciaro mega “ũhandĩtwo hũgũrũrũ-inĩ cia maĩ” kana mũgũnda-inĩ ũrĩa unithagĩrio maĩ-rĩ, Jeremia ndaigana ‘gũtiga gũciara maciaro.’ Nĩ aaregire gũthũkio nĩ anyũrũrania aganu arĩa maamũthiũrũrũkĩirie. Handũ-inĩ ha ũguo, agĩikara enyitithanĩtie na Kĩhumo kĩa “maĩ” ma muoyo na akĩiga ngoro-inĩ maũndũ mothe marĩa Jehova aamwĩraga. (Thoma Thaburi 1:1-3; Jer. 20:9) Na githĩ Jeremia ndakĩrĩ kĩonereria kĩega harĩ ithuĩ, na makĩria arĩa tũtungatagĩra Ngai kũndũ kũrĩ na moritũ! Angĩkorũo ũhunjagia kũndũ ta kũu-rĩ, thiĩ na mbere kwĩhoka Jehova biũ, na nĩ egũkũhe ũkirĩrĩria, ‘ũkĩrutĩra Ngai igongona riũmĩte kanua-inĩ gaku.’—Ahib. 13:15.

10. Nĩ irathimo irĩkũ tũrĩ nacio, na twagĩrĩirũo nĩ kwĩyũria atĩa?

10 Nĩguo tũhiũranie na mathĩna marĩa tũracemania namo matukũ-inĩ maya ma kũrigĩrĩria-rĩ, Jehova nĩ atũheete indo nyingĩ cia kĩĩroho. Indo iria atũheete kĩmwe nĩ Bibilia ĩrĩ yothe ĩrĩa ĩrathiĩ na mbere gũtaũrũo ũrĩa kwagĩrĩire na thiomi nyingĩ. Kũgerera ngombo ĩrĩa ĩĩhokekete na njũgĩ, atũheaga irio nyingĩ cia kĩĩroho ihinda rĩrĩa rĩagĩrĩire. Ningĩ nĩ atwĩkagĩra hinya kũgerera ngwatanĩro ya aarĩ na ariũ a Ithe witũ arĩa tũkoragwo nao mĩcemanio-inĩ na igomano-inĩ. Hihi nĩ ũtigagĩrĩra atĩ nĩ wagunĩka biũ na indo icio? Arĩa othe mekaga ũguo nĩ ‘kũina marĩinaga macanjamũkĩte ngoro.’ No arĩa matathikagĩrĩria Ngai ‘nĩ gũkaya magakaya nĩ kĩeha kĩa ngoro, na marĩre na kĩgi nĩ ũndũ wa ũrĩa makuĩte ngoro.’—Isa. 65:13, 14.

Wĩhokage Ngai Rĩrĩa Ũrahiũrania na Mĩtangĩko

11, 12. Nĩ ũndũ wa mathĩna marĩa marĩ thĩinĩ wa thĩ-rĩ, twagĩrĩirũo nĩ gwĩka ũndũ ũrĩkũ wa ũũgĩ?

11 O ta ũrĩa kwarathĩtwo, andũ nĩ maracemania na mathĩna maingĩ mũno maritũ. (Mat. 24:6-8; Kũg. 12:12) Kaingĩ rĩrĩa kwagĩa mũiyũro wa maĩ ũndũ wa mbere ũkoragwo arĩ kũũrĩra kũndũ gũtũgĩru kana kũhaica nyũmba igũrũ—handũ o hothe hatũgĩru. Ũndũ ũmwe na ũguo-rĩ, o ũrĩa mathĩna thĩinĩ wa thĩ marathiĩ mongererekete andũ milioni nyingĩ maracaria rĩũrĩro harĩ mathondeka marĩa monekaga matũgĩrĩte ma kĩĩmbeca, gĩũteti, kĩndini, na ningĩ thĩinĩ wa sayanisi na tekinolonjĩ. No maũndũ macio mothe matirehaga  ũgitĩri ũrĩa wa ma. (Jer. 17:5, 6) No rĩrĩ ndungata cia Jehova ikoragwo na rĩũrĩro rĩa ma—“Rũaro rũa Ihiga rũa tene na tene.” (Isa. 26:4) Mũtungi wa Thaburi oigire ũũ: “[Jehova] nowe ndũmba yakwa ya ihiga, na nowe ũhonokio wakwa; nowe rĩangĩro rĩakwa rĩake iraya na igũrũ.” (Thoma Thaburi 62:6-9.) Tũngĩhota atĩa gũtua ndũmba ĩyo ya Ihiga rĩũrĩro riitũ?

12 Tũikaraga twĩnyitithanĩtie na Jehova rĩrĩa tũrathĩkĩra Kiugo gĩake, kĩrĩa kaingĩ gĩkoragwo kĩrĩ ngũrani na ũũgĩ wa andũ. (Thab. 73:23, 24) Kwa ngerekano andũ arĩa matongoragio nĩ ũũgĩ wa andũ mahota kuuga ũũ: ‘Ũtũũro no ũyũ tu; ũkenere biũ.’ ‘Caria wĩra mwega.’ ‘Caria mbeca nyingĩ biũ.’ ‘Wĩgũrĩre indo nyingĩ.’ ‘Ceeranga; ũkenere thĩ.’ No ũũgĩ wa Ngai ũringanaga wega na ũtaaro ũyũ: “[Reke] arĩa mahũthagĩra maũndũ ma gũkũ thĩ maikarage ta matekũmahũthĩra mũno; nĩ gũkorũo mũtabarĩre wa thĩ ĩno nĩ gũthira ũrathira.” (1 Kor. 7:31) Nĩ ũndũ ũcio Jesu atwĩkagĩra ngoro hingo ciothe tũigage maũndũ ma Ũthamaki mbere na njĩra ĩyo tũkeigĩra “ũtonga Igũrũ,” kũrĩa kũrĩ na ũgitĩri mwega biũ.—Mat. 6:19, 20.

13. Tũgĩciria ũhoro wa 1 Johana 2:15-17, twagĩrĩirũo nĩ kwĩyũria atĩa?

13 Mawoni maku kwerekera “thĩ” na “maũndũ marĩa me kuo gũkũ thĩ” hihi nĩ monanagia atĩ nĩ wĩhokete Ngai na ngoro yaku yothe? (1 Joh. 2:15-17) Hihi nĩ wĩriragĩria na ũkona ũtonga wa kĩĩroho na mĩeke ya ũtungata wa Ũthamaki irĩ cia bata gũkĩra maũndũ ma gũkũ thĩ? (Afil. 3:8) Nĩ wĩrutanagĩria gũtũũra wĩ na ‘riitho [irũngĩrĩru] igima?’ (Mat. 6:22) Ma nĩ atĩ, Ngai ndangĩenda ũtiganĩrie maũndũ maku na makĩria angĩkorũo ũrĩ na famĩlĩ ũrabatara gũteithia. (1 Tim. 5:8) No erĩgagĩrĩra ndungata ciake imwĩhoke biũ handũ ha kwĩhoka thĩ ya Shaitani ĩrĩa ĩrĩ hakuhĩ gũthira.—Ahib. 13:5.

14-16. Andũ amwe magunĩkĩte atĩa nĩ ũndũ wa gũtũũra marĩ na ‘riitho [irũngĩrĩru] igima’ na kũigaga maũndũ ma Ũthamaki mbere?

14 Ta wĩcirie ũhoro wa kĩonereria kĩa Richard na Ruth, aciari a twana tũtatũ. Richard oigire ũũ: “Ngoro yakwa yanjĩraga atĩ nĩ njagĩrĩirũo nĩ gũtungatĩra Jehova makĩria. Ndaarĩ na mũikarĩre mwega wa kĩĩmwĩrĩ na kwoguo ndeiguaga ta ndaarutagĩra Jehova o matigari tu. Thutha wa kũhoya igũrũ rĩgiĩ ũndũ ũcio na gũthima maũndũ mothe wega, tũkĩrĩkanĩra na Ruth atĩ njarie na ũrĩa warũgamĩrĩire wĩra nĩguo njĩtĩkĩrio kũruta wĩra o mĩthenya ĩna tu harĩ kiumia—o na gũtuĩka bũrũri-inĩ witũ hĩndĩ ĩyo kwarĩ na thĩna mũnene wa mbeca. Ihoya rĩakwa rĩgĩtĩkĩrũo na thutha wa mweri ũmwe ngĩambĩrĩria kũruta wĩra mĩthenya ĩna tu harĩ kiumia.” Hihi rĩu Richard aiguaga atĩa?

15 Oigaga ũũ: “Mũcara wakwa waanyihire na gĩcunjĩ kĩa mĩrongo ĩrĩ harĩ igana, no rĩu ngoragwo na thikũ ingĩ 50 o mwaka cia gũkorũo hamwe na famĩlĩ yakwa na kũruta ciana ciakwa. Nĩ hotaga kũhunjia maita merĩ ma ũrĩa ndaahunjagia, ngagĩa na arutwo a Bibilia maita matatũ ma arĩa ndakoragũo nao na ngakorũo na itemi inene maũndũ-inĩ ma kĩũngano. Ningĩ tondũ wa gũkorũo na mahinda maingĩ ma gũteithia Ruth gũikara na ciana, rĩmwe na rĩmwe nĩ atuĩkaga painia-wa-gũteithĩrĩria. Nĩ nduĩte atĩ nĩ ngũthiĩ na mbere na kũrũmĩrĩra mũbango ũcio o ũrĩa kũngĩhoteka.”

 16 Nĩguo maingĩre ũtungata-inĩ wa hĩndĩ ciothe, Roy na Petina arĩa nginyagia rĩu marĩ na mũirĩtu wao mũciĩ nĩ maanyihirie mahinda mao ma wĩra. Roy oigire ũũ: “Ndutaga wĩra thikũ ithatũ harĩ kiumia, nake Petina akaruta igĩrĩ. Ningĩ nĩ twaathamĩire nyũmba nyinyi gũkĩra ĩrĩa twarĩ, ĩrĩa arĩ ũhũthũ kũmenyerera. Tũtanagĩa ciana ciitũ igĩrĩ twarĩ mapainia na o na thutha ũcio wendi witũ wa gũtuĩka mapainia ndwathirire. Kwoguo rĩrĩa ciana ciitũ ciagimarire, nĩ twacokereire ũtungata wa hĩndĩ ciothe. Tũtingĩringithania irathimo iria tuonete na mbeca o na angĩkorũo nĩ cigana.”

Reke “Thayũ wa Ngai” Ũikaragie Ngoro Yaku

17. Tondũ wa gũkorũo ũtoĩ ũrĩa gũkahaana rũciũ-rĩ, Maandĩko makũmĩrĩirie atĩa?

17 Gũtirĩ o na ũmwe witũ ũngĩmenya ũrĩa gũkahaana rũciũ, tondũ “ihinda na ũndũ ũterĩgĩrĩirũo ikinyagĩrĩra andũ othe.” (Koh. 9:11, NW) O na gũtuĩka tũtiũĩ ũrĩa gũkahaana rũciũ-rĩ, tũtiagĩrĩirũo nĩ kũũrũo nĩ thayũ wa meciria ũmũthĩ, ta ũrĩa arĩa matarĩ na ũgitĩri ũrĩa uumanaga na gũkorũo na ũrata na Ngai moragwo nĩ thayũ. (Mat. 6:34) Mũtũmwo Paulo aandĩkire ũũ: “Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu.”—Afil. 4:6, 7.

18, 19. Ngai ahũthagĩra njĩra irĩkũ gũtũũmĩrĩria? Heana ngerekano.

18 Hĩndĩ ĩrĩa marĩ magerio-inĩ aarĩ na ariũ a Ithe witũ aingĩ nĩ maiguaga marĩ na thayũ wa ngoro kuuma kũrĩ Jehova. Mwarĩ wa Ithe witũ ũmwe oigire ũũ: “Ndagĩtarĩ nĩ aageririe maita maingĩ kũnjĩkĩra guoya nĩguo njĩtĩkĩre gwĩkĩrũo thakame. ‘Rĩu ũyũ nĩ ũrimũ ũhaana atĩa kũrega gwĩkĩrũo thakame?’ Icio nĩcio ciarĩ ciugo ciake cia mbere. Kuuma hĩndĩ ĩyo ndaahoyaga Jehova na ngoro, naguo thayũ wake ũgaikara igũrũ rĩakwa. Ndeiguaga haana rũaro rwa ihiga. O na gũtuĩka ndaarĩ mũhinyĩrĩrĩku mũno nĩ ũndũ wa thakame yakwa kũnyiha-rĩ, nĩ ndaahotire kũheana itũmi njega kuuma Maandĩko-inĩ cia kũrega gwĩkĩrũo thakame.”

19 Rĩmwe na rĩmwe Ngai no ahũthĩre mwarĩ kana mũrũ wa Ithe witũ, kana irio cia kĩĩroho cia ihinda rĩrĩa rĩagĩrĩire gũtũũmĩrĩria hĩndĩ ĩrĩa tũbataire. No kũhoteke wanaigua mũrũ kana mwarĩ wa Ithe witũ akiuga ũũ: “Ũyũ nĩguo ũhoro ũrĩa ndĩrabataraga. Nĩ ta arĩ niĩ ndĩrandĩkagĩrwo!” Ĩĩni o na maũndũ kana mabataro maitũ mangĩkorũo mahaana atĩa, Jehova nĩ arĩonanagia atĩ nĩ atwendete tũngĩmwĩhoka. Ningĩ-rĩ tũrĩ “ng’ondu,” ciake na nĩ twĩtanĩtio na rĩĩtwa rĩake.—Thab. 100:3; Joh. 10:16; Atũm. 15:14, 17.

20. Nĩkĩ ndungata cia Jehova nĩ igaikaraga ciĩgangarĩte rĩrĩa thĩ ya Shaitani ĩkaniinwo?

20 Hĩndĩ ya ‘mũthenya ũrĩa ũkuhĩrĩirie wa marakara ma Jehova,’ indo iria thĩ ya Shaitani ĩhokaga ciothe nĩ ikaanangwo. Thahabu, betha, na indo ingĩ cia goro itikagitĩra andũ o na hanini. (Zef. 1:18; Thim. 11:4) Rĩũrĩro riki tu rĩgakorũo rĩrĩ “Rũaro rũa Ihiga rwa tene na tene.” (Isa. 26:4) Kwoguo-rĩ, rekei tuonanie atĩ nĩ twĩhokete Jehova biũ na njĩra ya gũthiĩ na mbere kũrũmĩrĩra njĩra ciake cia ũthingu tũrĩ na wathĩki, kũhunjia ndũmĩrĩri ya Ũthamaki o na rĩrĩa andũ mararega gũtũthikĩrĩria kana magatũkararia, na ningĩ na njĩra ya kũmũikagĩria mĩtangĩko iitũ yothe. Tweka maũndũ macio-rĩ, tũrĩ na ma atĩ ‘tũrĩikaraga o na mwĩgangaro, tũtũũre o tũhoreire gũtarĩ ũndũ mũũru wa gũtũma tũigue guoya.’—Thim. 1:33.

[Kohoro ka magũrũ-inĩ]

Hihi no Ũtaarĩrie?

Tũngĩhoka Ngai atĩa

• rĩrĩa tũragerio twĩke ũũru?

• rĩrĩa tũraaga gũthikĩrĩrio kana tũgakarario?

• rĩrĩa tũrahiũrania na mĩtangĩko?

[Ciũria cia wĩruti]

[Mbica karatathi ka 15]

Kũrũmĩrĩra ithimi cia Ngai kũrehaga gĩkeno

[Mbica karatathi ka 17]

“Jehova nĩwe Rũaro rũa ihiga rũa tene na tene”