Kũrĩ Athomi Aitũ
Ngathĩti ĩrĩa rĩu ũrathoma yambĩrĩirie gũcabwo Julaĩ 1879. Maũndũ nĩ magarũrũkĩte kuuma hĩndĩ ĩyo—na noguo o na ngathĩti ĩno. (Rora mbica iria irĩ hau igũrũ.) Kwambĩrĩria na riuma rĩrĩ, nĩ ũkuona atĩ kũrĩ na mogarũrũku mangĩ ngathĩti-inĩ ya Mũrangĩri. Nĩ ũgarũrũku ũrĩkũ?
Mabũrũri-inĩ maingĩ, andũ aingĩ makĩria mendete gũthoma ũhoro Intaneti-inĩ. Na njĩra hũthũ mũno, no mathome ũhoro ũrĩa ũngĩoneka o Intaneti-inĩ tu. Mabuku maingĩ, na ngathĩti no ithomwo Intaneti-inĩ.
Tondũ rĩu andũ aingĩ mendete gũthoma ũhoro Intaneti-inĩ, nĩ tũgarũrĩte Rĩarĩro ritũ rĩa www.ps8318.com/ki, nĩguo rĩkorũo rĩrĩ rĩa kũgucĩrĩria na rĩhũthũ kũhũthĩra. Arĩa mangĩthiĩ rĩarĩro-inĩ rĩu no mathome mabuku maitũ na thiomi makĩria ma 430. O na kũrĩ ũguo, kwambĩrĩria mweri ũyũ, arĩa marĩhingũraga Rĩarĩro ritũ no mahote gũthoma icunjĩ imwe iria ikoretwo ikĩoneka ngathĩti-inĩ citũ iria icabĩtwo no rĩu irĩonekaga o Rĩarĩro-inĩ ritũ tu. *
Tondũ rĩu tũrĩkĩraga icunjĩ nyingĩ o Intaneti-inĩ tu, kwambĩrĩria na riuma rĩrĩ, ngathĩti ya Mũrangĩri ya andũ othe nĩ ĩkũnyihanyihio kuuma maratathi 32 nginya 16. Nginyagia rĩu ngathĩti ya Mũrangĩri nĩ ĩrutagwo na thiomi 204. Nĩ ũndũ wa ũguo ĩnyihĩtio, rĩu no kũhoteke ĩtaũrũo na thiomi nyingĩ makĩria.
Nĩ mwĩhoko witũ atĩ mogarũrũku macio nĩ megũtũteithia tũkinyĩrie andũ aingĩ makĩria ndũmĩrĩri ya kũhonokia andũ. Nĩ tũtuĩte itua rĩa gũthiĩ na mbere kũmenyithia andũ ũhoro ũrĩa mwega na wa kũgucĩrĩria—mũcabe na ũrĩ Intaneti-inĩ—nĩguo athomi aitũ arĩa maheete Bibilia gĩtĩo na mendete kũmenya ũrĩa ĩrutanaga kũna magunĩke.
Acabi
^ kib. 5 Icunjĩ iria irĩonekaga thĩinĩ wa Intaneti tu nĩ hamwe na: “Kũrĩ Andũ Ethĩ,” kĩrĩa kĩonanagia maũndũ andũ ethĩ mangĩka kuuma Bibilia-inĩ, na “Ndĩĩrutaga Kuumana na Bibilia,” icunjĩ iria cihaarĩrĩirio nĩ ũndũ wa aciari kũruta ciana iria itakĩrĩtie mĩaka ĩtatũ.
