KUUMA NGOTHI-INĨ: HIHI NGAI NĨ ARĨ THA?
Nĩkĩ Gĩtũmaga Andũ Moige atĩ Ngai Ndarĩ Tha?
HIHI kũũria kĩũria kĩu kĩrĩ ngothi-inĩ nĩ ũũru? Amwe nĩ monaga ũguo, no andũ aingĩ ũmũthĩ nĩ meyũragia kĩũria kĩu tondũ monaga Ngai ta atarĩ tha. Nĩkĩ?
Andũ amwe arĩa mahonoka icanjama cia ndũire moragia ũũ: “Ngai aretĩkĩria maũndũ maya nĩkĩ? Hihi nĩatindanagĩra? Hihi nĩ arĩ tha?”
Nao angĩ no moragia kĩũria kĩu rĩrĩa mathoma Bibilia. Na rĩrĩa mathoma ũhoro ta wa Kĩguũ kĩa hĩndĩ ya Nuhu, nĩ meyũragia ũũ, ‘Nĩkĩ kĩngĩtũma Ngai ũrĩ wendo aniine andũ acio othe? Hihi nĩ arĩ tha?’
Hihi rĩmwe nĩ wĩyũragia ciũria ta icio? Kana hihi ũkaremwo gũcokeria arĩa moria ciũria ta icio? Angĩkorũo nĩguo, wĩcirie ũrĩa kĩũria gĩkĩ kĩngĩgũteithia.
NĨKĨ GĨTŨMAGA TŨTHŨŨRE WAGI WA THA?
Na njĩra nguhĩ, nĩ tũthũire wagi wa tha tondũ nĩ tũkũũranaga wega na ũũru. Na kwoguo tũrĩ ngũrani mũno na nyamũ. Ngai aatũmbire na ‘mũhianĩre o ta wake’ (Kĩambĩrĩria 1:27) Ũguo nĩ kuuga atĩa? Nĩ aatũheire ũhoti wa kuonanagia ngumo na ithimi ciake, cia gũkũũranaga wega na ũũru. Ta wĩcirie ũndũ ũyũ: Angĩkorũo nĩ Ngai watũheire ũhoti ũcio, na kwoguo tũgathũũra wagi wa tha-rĩ, na githĩ ũcio ti ũndũ ũronania atĩ o nake nĩ athũire wagi wa tha?
Bibilia yonanagia atĩ Ngai nĩ athũire wagi wa tha tondũ atwĩraga ũũ: “Mĩthiĩre yakwa ĩraihanĩrĩirie na mĩthiĩre yanyu, o na meciria makwa magakĩra meciria manyu.” (Isaia 55:9) Kwoguo tũngiuga atĩ Ngai ndarĩ tha, githĩ tũtingĩkorũo tũkiuga mũgarũ na ũrĩa rĩandĩko rĩu riugĩte atĩ njĩra ciitũ nĩcio njega gũkĩra cia Ngai? Nĩ ũndũ wa bata gũthuthuria ũhoro makĩria ũtanatua ũguo. Handũ ha kũũria kana hihi Ngai nĩ arĩ tha, nĩ kaba twĩyũrie nĩkĩ ciĩko imwe ciake cionekaga ta itarĩ cia tha. Nĩguo tũmenye ũhoro ũcio makĩria, reke tuone “kwaga tha” nĩ kuuga atĩa?
Rĩrĩa twoiga atĩ mũndũ ndarĩ tha, tũmũtuagĩra kũringana na itũmi ciake cia gwĩka ũndũ ũcio. Mũndũ ũtarĩ tha nĩ ũrĩa ũkenagĩra kuona andũ arĩa angĩ makĩnyarirĩka kana ũtarũmbũyanagia na mathĩna mao. Kwoguo mũciari ũrĩa ũherithagia mwana wake, nĩguo akenere kuona mwana ũcio akĩigua ruo eragwo ndarĩ tha. No mũciari ũrĩa ũherithagia mwana wake nĩguo amũrute kana amũgitĩre nĩ mũciari mwega. Nĩ gũkorũo hingo ciothe tũtingĩmenya gĩtũmi kĩa mũndũ gwĩka ũndũ mũna twahota kũmũtuĩra ũrĩa gũtarĩ.
Reke twarĩrĩrie itũmi igĩrĩ iria itũmaga andũ mone Ngai ta atarĩ tha: icanjama cia ndũire iria tuonaga ũmũthĩ na matuĩro marĩa Ngai aatuĩrĩire andũ, marĩa tũthomaga thĩinĩ wa Bibilia. Hihi maũndũ macio monanagia atĩ ngai ndarĩ tha?
