Andũ aingĩ nĩ meriragĩria gũthiĩ igũrũ. Jesu oigire atĩ arutwo ake ehokeku nĩ mangĩgaatũũra kuo. Atanakua nĩ aamerire atĩ, nĩ angĩkaamathondekera ciikaro igũrũ, matũũranie na Ithe wao wa matu-inĩ.—Thoma Johana 14:2.

Muoroto hihi wa kũriũkia andũ na kũmahe muoyo kũrĩa igũrũ nĩ ũrĩkũ? Na nĩ wĩra ũrĩkũ magaathiĩ kũruta? Jesu eerire arutwo ake atĩ nĩ mangĩgatuĩka athamaki. Maathanage gũkũ thĩ.—Thoma Luka 22:28-30; Kũguũrĩrio 5:10.

Thĩinĩ wa bũrũri, andũ anini tu no o maathanaga. Na tondũ arĩa makaariũkio nĩ Jesu magaathiĩ igũrũ nĩguo maathanage gũkũ thĩ-rĩ, no mũhaka o nao makorũo ti aingĩ. (Luka 12:32) Bibilia nĩ ĩtwĩraga mũigana wa andũ acio magaathana na Jesu.—Thoma Kũguũrĩrio 14:1.

Arĩa magaatũũra kũrĩa igũrũ to o tu makaheo muoyo. Andũ ehokeku arĩa magaathamakĩrũo nĩ Ũthamaki wa Jesu, nĩ makaaheo muoyo wa tene na tene thĩinĩ wa paradiso gũkũ thĩ. (Johana 3:16) Amwe arĩa makaingĩra thĩinĩ wa Paradiso magakorũo mahonokete kũniinwo kwa andũ arĩa aaganu. Angĩ nao makaingĩra kuo thutha wa kũriũkio.—Thoma Thaburi 37:29; Johana 5:28, 29.