ANDŨ amwe nĩ meriragĩria mũno kuona makĩgerio, no nĩ kũrĩ angĩ matendete o na hanini. Hihi wee ũkuona atĩa? Rĩrĩa wacemania na igerio-rĩ, wagĩrĩirũo gwĩka atĩa?

Hatarĩ nganja, ti magerio mothe mangĩkũingĩria mathĩna-inĩ manene. Kwa mũhiano, moimĩrĩro ma kũiya keki, matingĩkorũo marĩ moru mũno ta ma kwĩrorera mbica njũru. Ĩndĩ mũndũ angĩgũa magerio-inĩ mangĩtũma eingĩrie ngomanio-inĩ itaagĩrĩire, no erehere mathĩna moru mũno. Bibilia ĩheanaga mũkaana ũyũ: “Mũndũ wa gũtharia . . . nĩ kwaga aagĩte wĩcirio; ũndũ ũcio egwĩka nĩ wa kwĩnina we mwene.”—Thimo 6:32, 33.

Ũngĩcemania na igerio rĩngĩtũma wĩingĩrie maũndũ-inĩ ma ũũra-thoni-rĩ, wagĩrĩirũo nĩ gwĩka atĩa? Bibilia yugaga ũũ: “Tondũ rĩrĩ, ũũ nĩguo Ngai enda, atĩ mũtuĩke andũ aamũre; atĩ mũthemage ũmaraya; na atĩ o mũndũ wanyu amenyage ũrĩa angĩhota gũikaragia mwĩrĩ wake mwene wĩ mũtheru, akĩũtĩaga.” (1 Athesalonike 4:3, 4) No hihi ũngĩhota atĩa kwĩgirĩrĩria merirĩria ta macio? Reke twarĩrĩrie makinya matatũ mangĩgũteithia.

Kwĩrorera mbica cia ũũra-thoni nĩ gwakĩrĩria gwakagĩrĩria merirĩria mataagĩrĩire. Jesu akĩonania ũkuruhanu gatagatĩ-inĩ ga kwĩrorera kĩndũ na gũkĩĩrirĩria, oigire ũũ: “Mũndũ o wothe ũngĩrora mũndũ-wa-nja na amwĩrirĩrie, nĩarĩkĩtie gũtharia nake ngoro-inĩ yake.” Agĩkindĩra ũhoro ũcio, oigire ũũ: “Kũngĩtuĩka atĩ riitho rĩaku rĩa ũrĩo nĩ rĩa gũkũhĩngithia, rĩkũũre, ũrĩte.” (Mathayo 5:28, 29) Jesu eendaga kuuga atĩa? Nĩguo tũhote gũtooria igerio rĩa kwĩrorera mbica cia ũũra-thoni, no mũhaka tũtue itua irũmu rĩa kwaga kwenda gũciĩrorera.

 Kwa ngerekano: Ta wĩcirie ũgĩthiĩ na njĩra na o rĩmwe ũkona ũtheri mũnene wa mwaki wa mũndũ ũracinĩrĩra. Hihi ũngĩrũgama ũwĩrorere? Aca! Ũngĩhũgũka na kũngĩ, nĩguo ũgitĩre maitho maku. Ũndũ ũmwe na ũcio, ũngĩona mbica cia ũũra-thoni, wagĩrĩirũo kũhũgũka na kũngĩ na ihenya o ũrĩa kwahoteka nĩguo ũgitĩre meciria maku. Juan, mũndũrũme waamenyerete kwĩrorera mbica cia ũũra-thoni, oigire ũũ: “Ingĩona mũtumia ũrangucĩrĩria, kaingĩ ndĩĩkoraga ngĩenda kũmwĩrorera maita maigana ũna. Kwoguo ngeragia kwĩhũgũra na kũngĩ, na ngeĩra: ‘No mũhaka hoe Jehova o rĩu!’ Thutha wa kũhoya, merirĩria macio nĩ mathiraga.”—Mathayo 6:9, 13; 1 Akorintho 10:13.

Ningĩ, wĩcirie ũhoro wa Ayubu, mũthuri warĩ mwĩhokeku, ũrĩa woigire ũũ: “Niĩ nĩ twarĩkanĩire na maitho makwa: ingĩkĩhota atĩa gũcoka kwĩrorera mũirĩtu?” (Ayubu 31:1) Na githĩ ndũkĩagĩrĩire gũtua itua ta rĩu?

Geria ũũ: Ũngĩona mbica cia ũũra-thoni, wĩhũgũre na kũngĩ o rĩo. Wĩgerekanie na mwandĩki wa Bibilia ũrĩa wahoire ũũ: “Hũgũra maitho makwa matige kwĩrorera maũndũ matarĩ ma ma.” —Thaburi 119:37.

Tondũ ithuothe tũtirĩ akinyanĩru-rĩ, rĩmwe na rĩmwe no tũkorũo na merirĩria moru. Bibilia yugaga ũũ: “O mũndũ nĩ kũgerio ageragio hĩndĩ ĩrĩa ekũgucĩrĩrio nĩ merirĩria make moru, akahenererio nĩmo. Namo merirĩria macio maagĩa ihu-rĩ, maciaraga wĩhia.” (Jakubu 1:14, 15) Ũngĩhota atĩa gwĩthema merirĩria macio, marĩa matwaragĩrĩria mũndũ wĩhia-inĩ?

Rĩrĩa wagĩa na merirĩria moru, ririkanaga atĩ no ũthuure kũgucĩrĩrio nĩmo kana kũregana namo. Geria kũrũa na merirĩria macio. Meherie biũ meciria-inĩ maku. Wĩtheme gũikara ũgĩciragia maũndũ mataagĩrĩire. Troy, ũrĩa wamenyerete kwĩroragĩra mbica cia ũũra-thoni Intaneti-inĩ, oigire ũũ: “Ndeheririe merirĩria moru meciria-inĩ makwa na njĩra ya gwĩciragia maũndũ marĩa magĩrĩire. Ndwarĩ ũndũ mũhũthũ, tondũ ndekoraga o ngĩĩciria maũndũ moru. No thutha mũtheri, nĩ ndaahotire  kwĩgiragĩrĩria.” Mũtumia ũmwe wĩtagwo Elsa wahiũranagia na magerio megiĩ maũndũ ma ũũra-thoni arĩ tinĩnja, oigire ũũ: “Nĩ ndahotire gũtooria meciria macio moru na njĩra ya gũkorũo na maũndũ maingĩ ma gwĩka, o hamwe na kũhoya Jehova.”

Geria ũũ: Rĩrĩa wambĩrĩria gwĩciria maũndũ moru, hoya o rĩo. Matoorie na njĩra ya gwĩciria “maũndũ o marĩa ma ma, namo marĩa matĩĩku, na ma kĩhooto, na marĩa matheru, na marĩa mangĩendeka, o na marĩa me na ũhoreri-rĩ; ningĩ kũngĩrĩ na ũndũ wĩ mwagĩrĩru, kana ũndũ wa kũgathwo.” —Afilipi 4:8.

Nĩ ũndũ mũhũthũ mũno mũndũ kũingĩra thĩna-inĩ, angĩgĩa na merirĩria moru, acemanie na igerio na mweke wĩyumĩrie o rĩo. (Thimo 7:6-23) Ũngĩĩthema atĩa kũingĩra mũtego-inĩ ũcio?

Bibilia ĩheanaga ũtaaro ũyũ: “Mũndũ mũbarĩrĩri onaga gũkĩgĩa ũũru, akehitha, no arĩa matarĩ ogĩ mathiagĩrĩra o na mbere, magakĩya kũhera.” (Thimo 22:3) Kwoguo, gitagĩra makinya maku. Wĩcirie kabere maũndũ marĩa mangĩgũikia ũgwati-inĩ, na ũmetheme. (Thimo 7:25) Filipe, ũrĩa watooririe mũtugo mũũru wa kwĩroragĩra mbica cia ũũra-thoni, oigire ũũ: “Njigaga kompiuta harĩa andũ othe mangĩnyona ngĩmĩhũthĩra, na nĩ ndĩmĩthondekete ũndũ ĩcungaga mbica iria itaagĩrĩire. Niĩ hũthagĩra Intaneti rĩrĩa kũrĩ na andũ.” Troy, ũrĩa ũkũgwetetwo hau igũrũ, nake oigire ũũ: “Ndĩthemaga kwĩrorera mbica cia ũũra-thoni na kũnyitanĩra na andũ arĩa maaragia maũndũ ma ũtũrĩka megiĩ ngomanio. Ndiendaga o na hanini gwĩtonyia magerio-inĩ.”

Geria ũũ: Wĩthuthurie wega nĩguo ũmenye thĩna waku na ũbange kabere gwĩthema maũndũ marĩa mangĩkũingĩria magerio-inĩ.—Mathayo 6:13.

Ĩ angĩkorũo o na thutha wa kwĩrutanĩria ũguo wothe nĩ wagũa magerio-inĩ rĩngĩ? Handũ ha gũkua ngoro, thiĩ na mbere kwĩrutanĩria. Bibilia yugaga ũũ: “Amu mũndũ mũthingu agũaga magũa mũgwanja, o agĩcokaga gũũkĩra.” (Thimo 24:16) Ũhoro wa ma nĩ atĩ, Ithe witũ wa igũrũ atwĩkagĩra ngoro ‘tũũkĩre.’ Hihi wee nĩ ũgwĩtĩkĩra ũteithio ũrĩa aheanaga na njĩra ya wendo? Angĩkorũo nĩguo, ndũkananoge kũmũhoya. Wĩrutage Bibilia, nĩguo ũgĩe na wĩtĩkio mũrũmu. Ĩkĩra itua rĩaku hinya na njĩra ya gũthiaga mĩcemanio ya Aira a Jehova. Ririkanaga kĩĩranĩro gĩkĩ kĩa Ngai: ‘Nĩ ndĩkuongagĩrĩra hinya, ĩĩ, ti-itherũ nĩ ndĩgũteithagia.’—Isaia 41:10.

Cody, ũrĩa ũkũgwetetwo kĩambĩrĩria-inĩ, oigire ũũ: “Ndaabataraga kĩyo kĩingĩ nĩguo ndoorie mũtugo ũrĩa ndarĩ naguo wa kwĩrorera mbica cia ũũra-thoni. Nĩ ndekoraga ngĩcokerera mũtugo ũcio kaingĩ, ĩndĩ thutha-inĩ, Ngai nĩ aandeithirie kũũtooria.” Ningĩ Dylan, ũrĩa ũkũgwetetwo hau kabere, oigire ũũ: “Ndaarĩ hakuhĩ gũkomania na mũirĩtu twarutaga wĩra nake, ĩndĩ nĩ ndatuire itua irũmu na ngĩmwĩra ‘Aca!’ Nĩ ngenaga mũno nĩ ũndũ wa gũkorũo ndĩ na thamiri theru. Ũndũ ũrĩa wa bata mũno nĩ kũmenya atĩ, nĩ ndaakenirie ngoro ya Jehova.”

Rĩrĩa wagĩa na itua irũmu na waregana na igerio, koragwo na ma atĩ o nawe Ngai nĩ arĩkenagio nĩwe!—Thimo 27:11.