Bibilia nĩ yonanagia wega atĩ Jesu nĩ aariũkirie andũ. Ũhoro ũcio to ng’ano tu; nĩ maũndũ maahaanĩkire kũndũ kũũĩkaine na mahinda moĩkaine. Kwa ngerekano, gatagatĩ-inĩ ka mwaka wa 31, Jesu maarĩ hamwe na andũ aingĩ moimĩte Kaperinaumu marorete Naini. Na hĩndĩ ĩrĩa maakinyaga kũu, magĩcemania na andũ angĩ aingĩ. No wĩtĩkanie na ũhoro ũcio wa kũriũkio tondũ nĩ wandĩkĩtwo thĩinĩ wa Kiugo kĩa Ngai, Bibilia, na ningĩ tondũ wekĩkire andũ acio othe makĩĩyonagĩra.​—Thoma Luka 7:​11-15.

Ningĩ Jesu nĩ aariũkirie mũratawe Lazaro, ũrĩa waninĩte thikũ inya kuuma akua. No twĩtĩkie ũhoro ũcio wa kũriũkio kwa Lazaro tondũ Jesu eekire ũguo andũ aingĩ makĩyonagĩra.​—Thoma Johana 11:​39-45.

Jesu aariũkagia andũ tondũ nĩ aaringagwo nĩ tha. Ningĩ aariũkagia andũ nĩguo onanie atĩ nĩ aahetwo hinya wa gũtooria gĩkuũ nĩ Ithe, mũheani wa muoyo.​—Thoma Johana 5:​21, 28, 29.

Maũndũ marĩa Jesu eekire ma kũriũkania, nĩ matũmaga twĩtĩkie na ma atĩ ciĩranĩro iria atwĩrĩire nĩ ikaahinga. Nĩ akaariũkia andũ aingĩ, o hamwe na andũ arĩa mataarĩ athingu, na matarĩ ũndũ moĩ wĩgiĩ Ngai ũrĩa wa ma. Nĩ makaaheo mweke wa kwĩruta ũhoro wa Jehova Ngai, na kũmwenda.​—Thoma Atũmwo 24:15.