Ndakũrĩire Puerto Limón, taũni ĩrĩ hũgũrũrũ-inĩ cia mwena wa irathĩro wa gĩcũa gĩa Costa Rica. Aciari akwa maarĩ na ciana inyanya na nĩ niĩ ndarĩ wa mũgwanja. Baba aakuire ndĩ na mĩaka ĩnana. Thutha ũcio mami aatũrerire arĩ wiki.

Gũthaka baseball kwarĩ ũndũ wa bata mũno ũtũũro-inĩ wakwa. Nĩ ndakenagĩra gũthaka mũbira ũcio ndĩ mũnini. Itanakinyia mĩaka 20, nĩ ndaingĩrire timũ ĩmwe ya mũbira wa baseball ya andũ maathakaga no ũndũ wa gwĩkenia. Hĩndĩ ĩmwe ngĩthaka timũ-inĩ ĩyo ndĩ na ũkũrũ wa makĩria ma mĩaka 20, mũndũ ũmwe wa gwetha athaki ega nĩ aanjũririe kana no thakagĩre timũ ĩmwe ya kũrĩhwo ya bũrũri wa Nicaragua. O na kũrĩ ũguo, tondũ mami aarĩ mũrũaru na nĩ niĩ ndamũtungataga, ndiendaga gũthiĩ gũikaraga Nicaragua. Kwoguo ngĩrega. Thutha ũcio mũndũ ũngĩ wa gwetha athaki ega akĩnjũria ngathakagĩre timũ ya mũbira wa baseball ya bũrũri wa Costa Rica ĩrĩa yarĩ na athaki maathuurĩtwo kuuma timũ-inĩ cia andũ arĩa maathakaga no ũndũ wa gwĩkenia. Rita rĩrĩ nĩ ndetĩkĩrire. Nĩ ndathakĩire timũ ya bũrũri kuuma mwaka wa 1949 nginya 1952, na nĩ twathire gũthaka mabũrũri-inĩ mangĩ ta Cuba, Mexico, na Nicaragua. Harĩa ndaigĩtwo thakagĩre nĩ ndathakaga wega, na rĩmwe nĩ ingĩathakire maita 17 itekũhĩtia o na rĩmwe. Nĩ ndakenaga kũigua andũ makiugĩrĩria rĩĩtwa rĩakwa.

No ũndũ wa kĩeha nĩ atĩ ndarĩ na mĩthiĩre ya waganu. O na gũtuĩka no mũirĩtu ũmwe tu twatumĩte ndũgũ, no ndaceeraga na atumia angĩ. Ningĩ nĩ ndanyuaga njohi mũno. Mũthenya ũmwe nĩ ndanyuire njohi mũno ũũ atĩ ndokĩra rũcinĩ mũthenya ũyũ ũngĩ ndiamenyaga ũrĩa ndakinyĩte mũciĩ. Ningĩ nĩ ndothaga ciũthi cia kũrĩa mbeca ta mĩthako ya domino na kũgũra kandi cia mũnyaka.

Ihinda-inĩ o rĩu ndatũũraga ũtũũro ũcio, mami agĩtuĩka Mũira wa Jehova. Nĩ aageririe kũngucĩrĩria wĩtĩkio-inĩ wake no akĩamba kũremwo tondũ nĩ ndanyitĩtwo meciria mũno nĩ mathako. O na mathaa ma kũrĩa mangĩakinyire ndĩ kĩhaaro-inĩ ngĩthaka, ndingĩaiguire ndĩ mũhũtu. Meciria makwa meeciragia o ũhoro wa mũbira. Ndendete baseball gũkĩra kĩndũ kĩngĩ o gĩothe.

O na kũrĩ ũguo, ndĩ na mĩaka 29, nĩ ndaguraririo ũũru ngĩgeria kũnyita mũbira tũgĩthaka. Thutha wa kũhona, ngĩtiga gũthakaga mũbira wa kũrĩhwo. Ĩndĩ no ndathire na mbere kũnyitanĩra mathako-inĩ  macio na njĩra ya kũmenyeria athaki maathakaga timũ-inĩ ĩtaarĩ ya kũrĩhwo hakuhĩ na mũciĩ gwitũ.

Mwaka-inĩ wa 1957, nĩ ndanyitirũo ũgeni kĩgomano-inĩ kĩmwe kĩa Aira a Jehova kĩrĩa gĩekagĩrũo kĩhaaro-inĩ kĩmwe ndanathakĩra mũbira wa baseball. Njikarĩte thĩ kĩgomano-inĩ kĩu, nĩ ndeyoneire ũtiganu mũnene mũno ũrĩa warĩ ho gatagatĩ ka mĩthiĩre ya gĩtĩo ya Aira a Jehova na ũrĩa kĩrĩndĩ kĩahũyũkaga rĩrĩa gĩoka kwĩrorera mũbira wa baseball. Maũndũ marĩa ndeyoneire kĩgomano-inĩ kĩu nĩ maandindĩkire kwambĩrĩria kwĩruta Bibilia na Aira a Jehova na ngĩambĩrĩria gũthiaga mĩcemanio-inĩ yao.

Nĩ ndakenirio nĩ morutani maingĩ ma Bibilia marĩa nderutaga. Kwa ngerekano, Jesu nĩ aarathĩte atĩ matukũ-inĩ ma kũrigĩrĩria, arutwo ake nĩ mangĩkaahunjia ũhoro ũrĩa mwega wa Ũthamaki wa Ngai thĩinĩ wa thĩ yothe. (Mathayo 24:14) Ningĩ nĩ nderutire atĩ Akristiano a ma matirutaga ũtungata wao nĩ getha magunĩke kĩĩmbeca. Jesu oigire ũũ: “Mũheetwo tũhũ, heanagai tũhũ.”—Mathayo 10:8.

Ngĩĩruta Bibilia nĩ ndaringithanagia maũndũ marĩa yoigaga na maũndũ marĩa ndonaga gatagatĩ-inĩ ka Aira a Jehova. Nĩ ndagucagĩrĩrio mũno nĩ kĩyo kĩrĩa maarĩ nakĩo gĩa kũhunjia ũhoro ũrĩa mwega wa Ũthamaki wa Ngai thĩinĩ wa thĩ yothe. Nĩ ndonaga marĩ na roho wa kũheana ũrĩa Jesu aathire Akristiano monanagie. Kwoguo rĩrĩa ndathomire Mariko 10:21 na ngĩona rĩĩtana rĩa Jesu, ‘ũka ũtuĩke mũrũmĩrĩri wakwa,’ ngĩenda gũtuĩka Mũira wa Jehova.

No nĩ ndoire ihinda mbere ya hotete kũgarũrĩra mũtũũrĩre wakwa biũ. Kwa ngerekano, kwa ihinda rĩa mĩaka mĩingĩ, nĩ ndothaga gĩũthi na hĩndĩ ciothe ndaiyũragia namba yakwa ya “mũnyaka” o kiumia. O na kũrĩ ũguo, nĩ ndeerutire kuuma Bibilia-inĩ atĩ Ngai nĩ athũire athathaiya a ngai “ĩrĩa ĩĩtagwo Mũrehi-Mũnyaka” na nĩ athũire andũ akoroku. (Isaia 65:11; Akolosai 3:5) Kwoguo ngĩtua itua rĩa gũtiga gũũtha ciũthi cia mbeca. Thutha wa gũtiga ciũthi icio, mũthenya wa Kiumia ũrĩa warũmĩrĩire namba yakwa ya “mũnyaka” nĩ yahotanire. Andũ nĩ maambĩrĩirie kũnyũrũria tondũ ndiathakĩte kiumia kĩu na makĩambĩrĩria kũndindĩkĩrĩria njokerere gũũtha no ndietĩkĩrire. Ndirĩ ndacoka gũũtha ciũthi cia mbeca rĩngĩ.

Nĩ ndacemanirie na igerio rĩngĩ harĩ “ũmũndũ [wakwa] mwerũ” mũthenya ũrĩa ndaabatithirio kĩgomano-inĩ kĩa Aira a Jehova. (Aefeso 4:24) Hwaĩ-inĩ ũcio, ndacoka mũkawa-inĩ ũrĩa ndaikaraga ndakorire mũirĩtu ũrĩa twarĩ ndũgũ anjetereire mũrango-inĩ. Aanjĩrire ũũ: “Ũka Sammy tũkenere hamwe.” No ndamwĩrire o rĩmwe “Aca!” Ngĩmũririkania atĩ rĩu ndatũũraga kũringana na ithimi cia mĩtugo iria irĩ Bibilia-inĩ. (1 Akorintho 6:18) Akĩnjũria, “Atĩ atĩa?” Agĩcoka akĩaria na njĩra ya kũhũthĩrĩria mawoni ma Bibilia megiĩ ngomanio na akĩgeria kũndindĩkĩrĩria tũcokie ũrata witũ. No ndaingĩrire rumu yakwa na ngĩhinga mũrango. Ũmũthĩ ndĩ na gĩkeno ngiuga atĩ kuuma rĩrĩa ndatuĩkire Mũira wa Jehova mwaka-inĩ wa 1958 nĩ hotete gũtũũra kũringana ũgarũrũku ũrĩa ndekire mũtũũrĩre-inĩ wakwa ndĩ mwĩhokeku.

Nĩ nyonaga ta ingĩandĩka ibuku rĩgima rĩgiĩ ũrĩa ng’unĩkĩte kuumana na kũrũmĩrĩra ũtongoria wa Bibilia. Maũndũ mamwe ng’unĩkĩte namo nĩ atĩ rĩu ndĩ na arata aingĩ a ma, ũtũũro ũrĩ na muoroto, na gĩkeno kĩa ma.

No ngenagĩra baseball, ĩndĩ rĩu nĩ ngarũrĩire muonere wakwa wa maũndũ. Mũthako-inĩ ũcio wa baseball nĩ ndegĩrĩire igweta na mbeca, no indo icio itiatũũrire. No ũrata wakwa hamwe na Ngai na ũrũmwe ũrĩa ngenagĩra gatagatĩ-inĩ ka ndungata cia Ngai nĩ maũndũ matagathira. Bibilia yugaga ũũ: “Thĩ nĩ gũthira ĩrathira o hamwe na merirĩria mayo, no mũndũ ũrĩa wĩkaga wendi wa Ngai egũtũũra tene na tene.” (1 Johana 2:17) Rĩu nyendete Jehova Ngai o hamwe na andũ ake gũkĩra kĩndũ kĩngĩ o gĩothe.