Bibilia nĩ yugaga ũrĩa wagĩrĩirũo nĩ gwĩka nĩguo ũtaũkĩrũo nĩyo. Gũtekũmakania kũrĩa uumĩte, ndũmĩrĩri ya Ngai ĩrĩa ĩkoragwo Bibilia-inĩ ‘nĩ hũthũ, na ndĩrĩ kũraya nawe.’—Gũcokerithia Maathani 30:11.

Maũndũ mangĩgũteithia ũtaũkĩrũo nĩ Bibilia

1.   Gĩa na mwerekera ũrĩa wagĩrĩire. Ĩtĩkĩra Bibilia ĩrĩ Kiugo kĩa Ngai. Korũo ũrĩ mwĩnyihia tondũ Ngai nĩ athũire arĩa etĩi. (1 Athesalonike 2:13; Jakubu 4:6) O na kũrĩ ũguo, ndũgetĩkie maũndũ marĩa wathoma kana waigua ũtarĩ na ũũma namo, tondũ Ngai endaga ũhũthĩre ‘ũhoti waku wa gwĩciria.’—Aroma 12:1, 2.

2.   Hoya ũheo ũũgĩ. Bibilia yugaga ũũ thĩinĩ wa Thimo 3:5: ‘Tigaga gwĩtiirania na mbuguĩro yaku mwene.’ Handũ ha ũguo, ‘thiĩ na mbere kũhoya Ngai’ akũhe ũũgĩ nĩguo ũtaũkĩrũo nĩ Bibilia.—Jakubu 1:5.

3.   Mĩthomage hĩndĩ ciothe. No ũgunĩke makĩria ũngĩmĩthomaga ũtegũtĩrĩria.—Joshua 1:8.

4.   Thuthuria ũndũ ũmwe. Gũthuthuria ũndũ ũmwe thutha wa ũrĩa ũngĩ, no gũgũteithie gũthathaũra ũrĩa Bibilia yugaga igũrũ rĩgiĩ ũndũ mũna, na nĩ njĩra njega ya kwĩruta Maandĩko. Ambĩrĩria na “ũrutani wa mũthingi,” ũcoke wĩrute maũndũ marĩa maritũ ‘ma ũgima.’ (Ahibirania 6:1, 2) Weka ũguo nĩ ũkũhota can kũringithania rĩandĩko na rĩngĩ na nĩ ũkuona atĩ icunjĩ imwe cia Bibilia nĩ itaaragĩria iria ingĩ, o nginya maũndũ marĩa “maritũ gũtaũkĩrũo” nĩmo.—2 Petero 3:16.

5.   Hoya ũteithio. Bibilia ĩtwĩkĩraga ngoro twĩtĩkĩre ũteithio kuuma kũrĩ arĩa marĩ na ũmenyo wayo. (Atũmwo 8:30, 31) Aira a Jehova nĩ a marutaga andũ Bibilia hatarĩ marĩhi. O ta Akristiano a tene, mahũthagĩra Maandĩko gũteithia arĩa angĩ mamenye ũrĩa Bibilia ĩrutanaga kũna.—Atũmwo 17:2, 3.

Maũndũ marĩa ũtarabatara

1.   Gĩthomo kĩa igũrũ. Arutwo a Jesu 12 nĩ maataũkagĩrũo nĩ Maandĩko na makaruta andũ arĩa angĩ, o na gũtuĩka monagwo marĩ “andũ matarĩ igweta na matarĩ athomu.”—Atũmwo 4:13.

2.   Mbeca. No wĩrute ũrĩa Bibilia yugaga hatarĩ marĩhi. Jesu eerire arutwo ake atĩ, “Mũheetwo tũhũ, heanagai tũhũ.”—Mathayo 10:8.