Igongona rĩa Jesu nĩyo njĩra ĩrĩa Ngai ahũthĩraga gũkũũra, kana kũhonokia andũ kuuma kũrĩ mehia na gĩkuũ. Bibilia ĩtaga thakame ya Jesu ĩrĩa yaitirũo thogora wa ũkũũri. (Aefeso 1:7; 1 Petero 1:18, 19) Nĩkĩo Jesu oigire atĩ okire nĩguo “arute muoyo wake ũtuĩke wa gũkũũra andũ aingĩ.”—Mathayo 20:28.

‘Ũkũũri nĩ ũndũ wa andũ aingĩ’ wabataranagia nĩkĩ?

 Mũndũ wa mbere, Adamu, ombirũo arĩ mũkinyanĩru, kana atarĩ na mehia. Aarĩ na kĩĩrĩgĩrĩro gĩa gũtũũra tene na tene no agĩgĩte rĩrĩa aathuurire kwaga gwathĩkĩra Ngai. (Kĩambĩrĩria 3:17-19) Ciana iria aagĩire, nĩ ciagaire mehia kuuma kũrĩ we. (Aroma 5:12) Nĩ ũndũ ũcio, Bibilia yonanagia atĩ Adamu ‘eyendirie’ hamwe na ciana ciake ũkombo-inĩ wa mehia na gĩkuũ. (Aroma 7:14) Tondũ matiarĩ akinyanĩru, gũtirĩ o na ũmwe wao ũngĩahotire gũkũũra kĩrĩa Adamu aateire.—Thaburi 49:7, 8.

 Ngai nĩ aiguĩrĩire ciana cia Adamu tha nĩ ũndũ itiarĩ na kĩĩrĩgĩrĩro. (Johana 3:16) O na kũrĩ ũguo, tondũ Ngai nĩ wa kĩhooto, ndangĩahotire kũhũthĩrĩria ũndũ ũcio kana kũmohera mehia mao hatarĩ na mũthingi mwega. (Thaburi 89:14; Aroma 3:23-26) Ngai nĩ endete andũ, nĩ ũndũ ũcio nĩ aabangire kũgĩe na mũthingi mwega wa kũmohera na kũmehereria mehia macio biũ. (Aroma 5:6-8) Ũkũũri nĩguo mũthingi ũcio mwega.

Ũkũũri ũrutaga wĩra atĩa?

 Thĩinĩ wa Bibilia, kiugo “ũkũũri” kĩhutĩtie maũndũ maya matatũ:

1.   Nĩ irĩhi.—Ndari 3:46, 47.

2.   No ũhote kũrekereria, kana kũhonokia.—Thama 21:30, The Holy Bible in Gĩkũyũ Language.

3.   Ũiganaine na thogora wa kĩrĩa kĩrarĩhĩrũo, kana ũgakĩhumbĩra. a

 Ta rora wone ũrĩa maũndũ macio mararingana na igongona rĩa ũkũũri rĩa Jesu Kristo.

1.   Irĩhi. Bibilia yugaga atĩ Akristiano ‘maagũrirũo na thogora.’ (1 Akorintho 6:20; 7:23) Thogora ũcio nĩ thakame ya Jesu, ĩrĩa aahũthĩrire ‘kũgũrĩra Ngai andũ kuuma mĩhĩrĩga-inĩ yothe na thiomi na iruka na ndũrĩrĩ.’—Kũguũrĩrio 5:8, 9.

2.   Kũrekereria. Igongona rĩa Jesu nĩ rĩhotaga ‘kũhonokia kuuma mehia-inĩ kũgerera ũkũũri.’—1 Akorintho 1:30; Akolosai 1:14; Ahibirania 9:15.

3.   Kũiganana. Igongona rĩa Jesu rĩiganaine biũ na kĩrĩa Adamu aateire​—muoyo mũkinyanĩru. (1 Akorintho 15:21, 22, 45, 46) Bibilia yugaga ũũ: “O ta ũrĩa kwaga gwathĩka kwa mũndũ ũcio ũmwe [Adamu] gwatũmire andũ aingĩ matuwo ehia, no taguo gwathĩka kwa mũndũ ũcio ũmwe [Jesu Kristo] gũgaatũma andũ aingĩ matuwo athingu.” (Aroma 5:19) Ũndũ ũcio wonanagia ũrĩa gĩkuũ kĩa mũndũ ũmwe kĩngĩkũũra andũ aingĩ ehia. Ũrĩa kũrĩ nĩ atĩ, igongona rĩa Jesu nĩ “ũkũũri ũringaine nĩ ũndũ wa andũ othe” arĩa moyaga makinya marĩa magĩrĩire nĩguo magunĩke narĩo.—1 Timotheo 2:5, 6.