Maita maingĩ Bibilia ĩtaga Jesu “Mũrũ wa Ngai.” (Johana 1:49) Ciugo “Mũrũ wa Ngai” cionanagia atĩ Ngai nĩwe Mũũmbi, kana nĩwe Kĩhumo kĩa muoyo wothe, nginya wa Jesu. (Thaburi 36:9; Kũguũrĩrio 4:11) Bibilia ndĩrutanaga atĩ Ngai aagĩire mwana na njĩra ta ĩrĩa andũ magĩaga ciana nayo.

 Bibilia ningĩ nĩ ĩtaga araika “ariũ a Ngai ũrĩa wa ma.” (Ayubu 1:6) Na yugaga atĩ mũndũ wa mbere, Adamu, aarĩ “mũrũ wa Ngai.” (Luka 3:38) O na kũrĩ ũguo, tondũ Jesu nĩwe warĩ wa mbere kũũmbwo nĩ Ngai na nowe tu wombirũo ĩmwe kwa ĩmwe nĩ Ngai, Bibilia yonanagia atĩ Jesu nĩwe Mũrũ wa Ngai ũrĩa wa bata mũno.

•  Hihi Jesu aatũũraga igũrũ atanaciarũo gũkũ thĩ?

•  Jesu eekaga atĩa atanoka gũkũ thĩ?

 Ĩĩ. Jesu aarĩ kĩũmbe kĩa roho kũrĩa igũrũ atanaciarũo gũkũ thĩ arĩ mũndũ. Jesu we mwene ooigire ũũ: “Ndiumĩte igũrũ ngoka gwĩka wendi wakwa niĩ mwene.”—Johana 6:38; 8:23.

 Ngai oombire Jesu atanomba kĩndũ kĩngĩ o gĩothe. Bibilia yugaga ũũ igũrũ rĩgiĩ Jesu:

•   “Nĩwe . . . irigithathi harĩ ũũmbi wothe.”—Akolosai 1:15.

•   Nĩwe “kĩambĩrĩria kĩa ũũmbi wa Ngai.”—Kũguũrĩrio 3:14.

 Jesu nĩ aahingirie ũrathi wĩgiĩ mũndũ “ũrĩa kĩhumo gĩake [arĩ] kuuma mahinda ma tene, kuuma matukũ marĩa ma tene.”—Mika 5:2; Mathayo 2:4-6.

 Aarĩ na gaturũa kanene kũrĩa igũrũ. Jesu aaragĩrĩria gaturũa kau rĩrĩa aahoire ũũ: “Awa, rĩu ngoocithia . . . na riri o ta ũrĩa ndakoragwo naguo ndĩ hakuhĩ nawe thĩ ĩtanombwo.”—Johana 17:5.

 Nĩ aateithirie Ithe kũũmba indo iria ingĩ ciothe. Jesu aarutithanirie wĩra hamwe na Ngai arĩ “mũruti wĩra njorua.” (Thimo 8:30) Bibilia yugaga ũũ igũrũ rĩgiĩ Jesu: “Indo iria ingĩ ciothe ciombirũo kũgerera harĩ we, iria irĩ igũrũ na iria irĩ thĩ.”—Akolosai 1:16.

 Ngai aahũthĩrire Jesu kũũmba indo iria ingĩ ciothe. Indo icio ingĩ ciothe nĩ hamwe na araika, o hamwe na thĩ na igũrũ. (Kũguũrĩrio 5:11) Na njĩra ĩngĩ, Ngai aarutithanirie wĩra na Jesu o ta ũrĩa mũcori wa mĩako arutithanagia wĩra na mwaki wa nyũmba. Mũcori acoraga mwako, nake mwaki agaka mwako ũcio.

 Nĩwe warĩ Ũhoro. Bibilia ĩkĩaria ũhoro wa Jesu atanoka gũkũ thĩ ĩmwĩtaga “Ũhoro.” (Johana 1:1, The Bible in Gikũyũ) Ũguo nĩ kuuga atĩ no kũhoteke Ngai aahũthagĩra Mũrũ wake kũheana ndũmĩrĩri na ũtongoria kũrĩ ciũmbe iria ingĩ cia roho.

 Ningĩ kuonekaga ta Jesu aahũthĩkire arĩ we Mwaria wa Ngai harĩ andũ gũkũ thĩ. No kũhoteke Ngai aaragia kũgerera Jesu arĩ Ũhoro, rĩrĩa aaheaga Adamu na Hawa ũtongoria mũgũnda-inĩ wa Edeni. (Kĩambĩrĩria 2:16, 17) No gũkorũo Jesu nĩwe mũraika ũrĩa watongoririe Aisiraeli marĩ werũ-inĩ, na nĩwe Aisiraeli maarĩ maathĩkĩre mũgambo wake.—Thama 23:20-23. a