Nyau iria cikaraga mĩciĩ-inĩ nĩ ciũĩkaine mũno nĩ ũndũ wa mũtugo wacio wa gũikara irĩ theru. Hĩndĩ ĩrĩa itarĩ toro, no ihũthĩre gĩcunjĩ kĩa 24 harĩ 100 kĩa mahinda macio igĩĩcũnacũna. Cihotaga gwĩthamba na njĩra njega ũguo nĩ ũndũ wa ũrĩa rũrĩmĩ rwacio rũkoragwo rũthondeketwo.

 Ta wĩcirie: Rũrĩmĩ rwa nyau rũkoragwo na tũnyamũ 290 tũhaana ta tũmĩigua, tũrĩa tũkoragwo tũrorete na thutha na tũkoragwo tũrĩ tũmũ o ta ndwara cia mũndũ. O kamũigua gakoragwo na karima, karĩa kagĩaga mata hĩndĩ ĩra nyau yacokia rũrĩmĩ rwayo kanua. Rĩrĩa nyau ĩracũna guoya wayo, tũmĩigua tũu tũingĩraga guoya-inĩ ũcio biũ nginya mata magakinyĩra ngothi.

 Rũrĩmĩ rwa nyau no rũhote kũhaka ngothi na guoya wayo mililita ta 48 cia mata o mũthenya. Mata macio nĩ makoragwo na ũhoti wa kũũraga indo iria itarendekana ngothi-inĩ. Ningĩ, rĩrĩa mata macio marĩ ngothi-inĩ macinwo nĩ ũrugarĩ, nĩ mateithagĩrĩria mũno mwĩrĩ wa nyau ndũkagĩe na ũrugarĩ ũkĩrĩte njano, tondũ nyau itikoragwo na tũrima tũingĩ twa kũruta thithino.

 Kamũigua kamwe ka rũrĩmĩ kangĩnyitwo nĩ maguoya rĩrĩa nyau ĩrehura, nyau ĩingĩragia rũrĩmĩ na hinya makĩria ngothi-inĩ nginya kamũigua kau gakerigicũra. Ningĩ tũmĩthia twa tũmĩigua tũu nĩ tũtũmaga ngothi ya nyau yarahũke rĩrĩa ĩrehura. Athuthuria nĩ megerekanĩtie na maũndũ macio megiĩ rũrĩmĩ rwa nyau makĩgeria gũthondeka gĩcanũri. Mũndũ akĩhũthĩra gĩcanũri kĩu, ahũthagĩra hinya mũnini gũkĩra icanũri ici ingĩ cia kawainda. Ningĩ no gĩthambio na njĩra hũthũ, na kĩrĩ na ũhoti wa kũrigicũra njuĩrĩ. Athuthuria maugaga atĩ gwĩciria ũhoro wa rũrĩmĩ rwa nyau, no kũmateithie kũmenya njĩra njega cia gũthambia indo iria ikoragwo na maguoya kana njuĩrĩ. Ningĩ no kũmateithie kũmenya njĩra njega cia kũhaka maguta kana ndawa ngothi-inĩ iria irĩ na njuĩrĩ.

 Ũgwĩciria atĩa? Hihi rũrĩmĩ rwa nyau nĩ kwĩyumĩria rweyumĩririe-ĩ, kana nĩ kũũmbwo?