•  Oho shi endifa ngahelipi ngeenge to ningi oinima ihapu pefimbo limwe?

•  Omutotolombo u na sha nokuninga oinima ihapu pefimbo limwe

•  Onghedi ya denga mbada

•  Osho oomakula voye tava ti

Mbela oho shi endifa ngoo nawa ngeenge to longo oilonga ihapu pefimbo limwe? Ovanhu vahapu ohava diladila kutya ovo va putuka hava longifa outeknologi ove shii okulonga oilonga ihapu pefimbo limwe ve dule ovo va ka hovela oku u longifa eshi va kula. Ndele mbela osho oshoshili tuu?

OSHO ile HASHO?

• Okulonga oilonga ihapu poshikando ohashi endelele.

• Ngeenge owe lideula okukala ho longo oilonga ihapu poshikando, otashi ke ku kwafela u kale ho longo to endelele.

• Ovanyasha otava dulu okulonga oilonga ihapu poshikando ve dule ovakulunhu.

Ngeenge owa ti “osho” koitwa aishe oyo, osha yela kutya owa nwefwa mo “komutotolombo u na sha nokulonga oilonga ihapu pefimbo limwe.”

Mbela oho diladila kutya oto dulu okulonga oilonga ivali oshita? Oto dulu okuninga ngaho ngeenge oshilonga shimwe inashi pumbwa okupewa elitulemo lihapu. Pashihopaenenwa, ngeenge oto pwilikine komusika eshi to wapaleke onduda yoye osha yela kutya onduda otai ka kala ya yela.

Ashike ngeenge oto kendabala okulonga oilonga ivali oyo aishe ya pumbwa okupewa elitulemo, osha yela kutya aishe otai ka longwa oipalupalu. Nomolwaashi tashi dulika omunyasha wedina Katherine a popya shi na sha nokulongela oilonga mumwe a ti: “Ngeenge owa hala oinima inyonaukile, i longela oshita.”

Caleb okwa ti: “Onda li handi popi naumwe, ndele handi tuminwa etumwalaka olo nda li nda pumbwa okunyamukula. Onda li nda kendabala oku i ningila aishe oshita. Osho osha ningifa nge ndi kale inandi uda ko osho nda li handi lombwelwa kwaao nda li handi popi naye, noitya aishe konyala oyo nda shanga metumwalaka oya li ya tumakana.”

Sherry Turkle, omushivinawa wouteknologi, okwa ti: “Ngeenge ohatu diladila kutya ohatu dulu okulonga oilonga ihapu oshita, . . . oshilonga keshe ohatu ke shi longa oshimbweenga, noitashi ka kala sha wapala. Okulongela oilonga mumwe otashi dulika tu diladile kutya ohatu shi endifa nawa, ashike paushili woovene hasho nandenande.” *

Tamara okwa ti: “Omafimbo amwe ohandi diladila kutya ohandi ningi nawa okukala hatu litumine omatumwalaka nomunhu umwe, ofimbo handi popi vali naumwe. Osho osha ningifa nge ndi tumakanife omandola, onda ka haluka ashike osho nda li ndi na okushanga metumwalaka osho handi popi naao nda li handi popi naye, ofimbo osho nda li handi popi osho handi shange metumwalaka.”

Ovanhu ovo hava kendabala okulongela oilonga ihapu oshita ohave litwike omutengi. Pashihopaenenwa, ohashi va pula efimbo lihapu opo va manife oifiilwalonga yavo. Ile otashi dulika va ka longife efimbo lihapu mokuningulula oilonga oyo va li tava diladila kutya ove i mana. Osho ohashi va ningifa vehe lifiile po efimbo lokuninga oinima oyo va li va hala okulonga.

Thomas Kersting, omuxungimwenyo nomuyandjimayele wovanafikola, okwa ti: “Ouluvi womunhu oo ta kendabala okulonga oilonga ihapu oshita, owa fa oishangomwa i li moshikopa inai unganekwa nawa.” *

Teresa okwa ti: “Shimha ashike wa hovele okulonga oilonga ihapu oshita, oinima aishe oya dundakana osho. Otashi ke ku pula efimbo lokulongulula oilonga oyo wa li to longo, noto ka hepeka efimbo olo wa li u na okuxupifa.”

• Lihonga okukala ho yandje elitulemo koshinima shimwe pefimbo limwe. Osho otashi ka kala eshongo ngeenge ou na onghedindjikilile yokulongela oilonga mumwe, ngaashi okutuma omatumwalaka ofimbo to ningi oifiilwalonga. Ashike Ombiibeli oye tu lombwela tu “shiive oinima oyo ya fimanenena.” (Ovafilippi 1:10) Hailonga aishe hatu longo ya fimana. Onghee hano, kala ho tameke naashi sha fimana unene nokuyandja elitulemo fiyo sha pwa.

  Maria okwa ti: “Ouluvi oo uhe hole okuyandja elitulemo koshinima shimwe ashike, owa fa okaana kanini oko ke hole okuninga keshe shimwe. Omafimbo amwe oove wa pumbwa oku u kangheka.”

• Henuka okupiyaanekwa. Mbela oho kala to yelekwa u longife ongodi ofimbo to lesha? I tula monduda imwe. Dima o-TV, noino kala to diladila komakwatafano opaintaneta. Ombiibeli oya ti: “Longifeni nawa efimbo leni.” — Ovakolossi 4:5.

  Onya okwa ti: “Onda mona kutya ohandi shi endifa nawa ngeenge handi yandje elitulemo koshinima shimwe pefimbo limwe. Kungaho, ohandi kala nda hafa ngeenge nda manifa oshilonga shange shomwaayo i li melandulafano, opo nee handi hovela okulonga nda shikula elandulafano olo. Osho ohashi ningifa nge ndi kale ndi udite nda pondola.”

• Yandja ashike elitulemo komunhu umwe. Okukala to tokatoka ongodi ofimbo to popi nomunhu umwe otashi dulu okweetifa oidjemo ii nohashi ulike yo kutya ku na omikalo. Ombiibeli oye tu lombwela tu kale hatu ungaunga novanhu monghedi omo twa hala va ungaunge nafye. — Mateus 7:12.

  David okwa ti: “Omafimbo amwe ngeenge handi popi nomumwamemekadona oha kala ta tumine umwe omatumwalaka ile ta tokatoka ongodi yaye. Oshinima osho ohashi udifa nge nai neenghono. Ashike okupopya oshili yovene vene, naame omafimbo amwe osho handi ningi.”